بۇگىن قازاق ونكولوگيا جانە راديولوگيا عىلىمي-زەرتتەۋ ينستيتۋتىندا العاش رەت قىتاي حالىق رەسپۋبليكاسىنداعى بەيجىڭ ۋنيۆەرسيتەتىنىڭ №1 اۋرۋحاناسىمەن بىرلەسىپ, Sagebot SR–2000 روبوتتاندىرىلعان حيرۋرگيالىق جۇيەسى ارقىلى قازاقستاندا بۇرىن-سوڭدى بولماعان قاشىقتان وپەراتسيا ءساتتى جۇرگىزىلدى.
شامامەن ەكى ساعاتقا سوزىلعان وپەراتسيا بارىسىندا بۇيرەكتىڭ ورگاندى ساقتاپ قالاتىن پارتسيالدى رەزەكتسياسى جاسالدى. بۇل — قاتەرلى ىسىكتى الىپ تاستاي وتىرىپ, اعزانىڭ قىزمەتىن ساقتاپ قالۋعا جانە وتادان كەيىنگى اسقىنۋ قاۋپىن ازايتۋعا باعىتتالعان وتا.
وپەراتسيانى دوكتور لي سيۋە سۋن (M.D., Ph.D.) پەكين قالاسىنان قاشىقتان باسقاردى. ول زاماناۋي تەلەكوممۋنيكاتسيالىق تەحنولوگيالاردى پايدالانا وتىرىپ, حيرۋرگيالىق پروتسەستى تولىق باقىلاۋدا ۇستادى. ال الماتىدا ورنالاسقان قازوجرعزي-ءدىڭ حيرۋرگى, PhD حۋسان تاليپباەۆيچ ۋمۋرزاكوۆ وتانىڭ ورىندالۋىن قاداعالادى.
روبوتتاندىرىلعان حيرۋرگيا — ۋرولوگيا, گينەكولوگيا جانە جالپى حيرۋرگيا سالالارىندا كەڭىنەن قولدانىلاتىن زاماناۋي جانە ءتيىمدى ادىستەردىڭ ءبىرى. بۇل ءتاسىل لاپاروسكوپيانىڭ از ينۆازيۆتىلىگى مەن تىندەرگە مينيمالدى زاقىم كەلتىرۋ ارتىقشىلىقتارىن جوعارى دالدىك, 3D ۆيزۋاليزاتسيا جانە ينتەللەكتۋالدى باسقارۋ جۇيەلەرىمەن ۇشتاستىرادى. ناتيجەسىندە ناۋقاستىڭ وڭالۋ مەرزىمى قىسقارىپ, اۋرۋحانادا جاتۋ ۋاقىتى ازايادى, اسقىنۋ قاۋپى تومەندەيدى.
الداعى ايلاردا وسى جۇيە ارقىلى 50 جوعارى تەحنولوگيالى وپەراتسيا جاساۋ جوسپارلانىپ وتىر. ولار ۋرولوگيا, گينەكولوگيا جانە ابدومينالدى حيرۋرگيا سالالارىن قامتيدى.
بۇگىنگى تاڭدا قىتاي مەن تۇركيانىڭ جەتەكشى ونكولوگيالىق ورتالىقتارىمەن جاسالعان كەلىسىمدەر اياسىندا ىسىكتەردى ەمدەۋدىڭ يننوۆاتسيالىق ادىستەرىن, ونىڭ ىشىندە روبوتتاندىرىلعان حيرۋرگيانى قولداناتىن بىرلەسكەن جوبالار ىسكە اسىرىلماق.