ەنەرگەتيكا ۆيتسە-ءمينيسترى الىبەك جاماۋوۆ جۇمىس ساپارىمەن «بەينەۋ–بوزوي–شىمكەنت» ماگيسترالدىق گاز قۇبىرىنىڭ ەكىنشى جەلىسىن سالۋ جوسپارلانعان ۋچاسكەگە باردى. ساپار ماقساتى – ەلىمىزدىڭ ەنەرگەتيكالىق ينفراقۇرىلىمىنداعى ستراتەگيالىق ماڭىزدى جوبالاردىڭ ءبىرى بويىنشا قۇرىلىس جۇمىستارىنا دايىندىق بارىسىن كوزبەن كورىپ, باقىلاۋ, دەپ جازادى Egemen.kz
ۆيتسە-مينيستر جۇمىس بارىسىندا قۇرىلىس-مونتاج كەزەڭدەرىمەن جان-جاقتى تانىسىپ, مەردىگەر ۇيىم وكىلدەرىمەن كەڭەس وتكىزدى. كەڭەس بارىسىندا جوبانىڭ ىسكە اسىرىلۋ كەستەسى, ماتەريالدىق-تەحنيكالىق قامتاماسىز ەتۋ, لوگيستيكالىق ۇيىمداستىرۋ, سونداي-اق جەرگىلىكتى اتقارۋشى ورگاندارمەن ءوزارا ءىس-قيمىل ماسەلەلەرى جان-جاقتى قاراستىرىلدى.
«بەينەۋ–بوزوي–شىمكەنت» گاز قۇبىرىنىڭ ەكىنشى جەلىسىنىڭ ىسكە قوسىلۋى – قازاقستاننىڭ ەنەرگەتيكالىق قاۋىپسىزدىگىن نىعايتۋعا باعىتتالعان ماڭىزدى قادام. بۇل – وتىن-ەنەرگەتيكا كەشەنىنىڭ تۇراقتى دامۋىن قامتاماسىز ەتەتىن مەملەكەتتىك ساياساتتىڭ باسىم باعىتى», دەدى ەنەرگەتيكا ۆيتسە-ءمينيسترى الىبەك جاماۋوۆ.
جوبا ەكى كەزەڭدە جۇزەگە اسىرىلادى. ونىڭ ناتيجەسىندە ماگيسترالدىق گاز قۇبىرىنىڭ جالپى وتكىزۋ قابىلەتى جىلىنا 15 ميلليارد تەكشە مەترگە دەيىن ۇلعايادى. بۇل ەلىمىزدىڭ وڭتۇستىك, ورتالىق جانە سولتۇستىك ايماقتارىن تۇراقتى ءارى سەنىمدى گازبەن قامتۋعا مۇمكىندىك بەرمەك.
ايتا كەتۋ كەرەك, اتالعان جوبا قازاقستان ۇكىمەتى مەن قاتار مەملەكەتى ۇكىمەتى اراسىنداعى كەلىسىم اياسىندا جۇزەگە اسىرىلادى. قۇرىلىسقا كاتارلىق ينۆەستور تارتىلىپ وتىر. قازاقستان تاراپى, سونىڭ ىشىندە QazaqGaz ۇلتتىق كومپانياسى ارقىلى شەتەلدىك سەرىكتەسكە جوبانى ويداعىداي ىسكە اسىرۋ ءۇشىن بارلىق قاجەتتى جاعدايدى جاساپ وتىر.