استانانىڭ باستى الاڭىنىڭ ۇستىندە ۇلى وتان سوعىسىنداعى جەڭىستىڭ 80 جىلدىعىنا ارنالعان اسكەري پاراد شەڭبەرىندە ونداعان ۇشۋ اپپاراتى اۋەگە كوتەرىلدى. پارادتى قر مەملەكەتتىك تۋى مەن قارۋلى كۇشتەردىڭ جالاۋىن الىپ ۇشقان مي-171 تىكۇشاعىنىڭ سالتاناتتى ۇشۋى اشتى, دەپ حابارلايدى Egemen.kz.
كورەرمەندەر الەمدەگى ەڭ كەڭ تارالعان كوپ ماقساتتى تىكۇشاقتاردىڭ ءبىرى – مي-17-ءنى تاماشالادى. بۇل تەحنيكا قۇرلىق اسكەرلەرىنىڭ موبيلدىلىگىن ارتتىرۋعا, جەكە قۇرام مەن قارۋ-جاراقتى جەتكىزۋگە, سونداي-اق قيىن جاعدايلاردا – تاۋلى ايماقتار مەن جوعارى تەمپەراتۋرادا اسكەري تاپسىرمالاردى ورىنداۋعا قولدانىلادى.
سونداي-اق مي-35م سوعىس تىكۇشاقتارى دا پارادقا قاتىستى. ولار قۇرلىق اسكەرلەرىنە ۇرىس الاڭىندا قولداۋ كورسەتۋگە ارنالعان جانە قارسىلاس تەحنيكالارى مەن ءتىرى كۇشىن جويۋدا قولدانىلادى.
مي-8 جانە مي-171 ارميالىق تىكۇشاقتارى دا كورسەتىلدى. ولار دەسانت ءتۇسىرۋ, وق-ءدارى مەن جۇك تاسىمالداۋ, جارالىلاردى ەۆاكۋاتسيالاۋ جانە قارسىلاس وشاقتارىن جويۋعا ارنالعان.
توتەنشە جاعدايلار مينيسترلىگى اتىنان ەس-145 جانە ن-145 تىكۇشاقتارى قاتىستى. بۇل اۋە تەحنيكالارى اپات سالدارىن جويۋ, ىزدەستىرۋ-قۇتقارۋ وپەراتسيالارى, ءورت ءسوندىرۋ جانە مەديتسينالىق ەۆاكۋاتسيا كەزىندە قولدانىلادى.
اسكەري-كولىكتىك اۆياتسيا س-295 ۇشاعىن كورسەتتى. ول 9 تونناعا دەيىن جۇك نەمەسە 70 اسكەري قىزمەتكەردى تاسىمالداي الادى جانە 5000 شاقىرىمعا دەيىن ۇشۋعا قابىلەتتى. ۇشاق زاماناۋي ناۆيگاتسيالىق جانە دياگنوستيكا جۇيەلەرىمەن جابدىقتالعان.
L-410 جەڭىل كوپ ماقساتتى ۇشاعى دا كورسەتىلدى. ول دايىندالماعان اۋەجايلاردا جۇمىس ىستەي الادى جانە 19 جولاۋشى نەمەسە 1800 كگ جۇك تاسىمالداي الادى.
كۋرسانتتاردى كەز كەلگەن اۋا رايىندا دايىنداۋعا ارنالعان L-39 وقۋ-جاۋىنگەرلىك ۇشاعى دا پارادقا قاتىستى. بۇل ۇشاق ۇشۋ, بارلاۋ جانە نىسانالارعا سوققى جاساۋ داعدىلارىن ۇيرەتۋگە كومەكتەسەدى.
سونداي-اق پارادتا قورعانىس مينيسترلىگىنىڭ اۋەدەگى كوماندالىق پۋنكتى – تۋ-154 ۇشاعى كورسەتىلدى. ول 180 اسكەري قىزمەتكەردى 5000 شاقىرىمعا دەيىن تاسىمالداي الادى جانە جۇك ۇشاعى رەتىندە دە قولدانىلادى.
كوپشىلىكتىڭ نازارىن العاش رەت پارادقا قاتىسقان A-400M ۇشاعى اۋداردى. بۇل ءتورت قوزعالتقىشتى زاماناۋي ءتۋربوۆينتتى كولىك ۇشاعى 2024 جىلدىڭ سوڭىندا اۋە قورعانىس كۇشتەرىنىڭ قارۋىنا ەنگەن. ول اسكەري تاسىمالدان باستاپ گۋمانيتارلىق ميسسيالار مەن مەديتسينالىق ەۆاكۋاتسياعا دەيىنگى ءتۇرلى تاپسىرمالاردى ورىنداي الادى.
سۋ-30سم جويعىشتارى اسپاندى قازاقستاننىڭ مەملەكەتتىك تۋىنىڭ تۇسىنە بويالعان ءتۇتىن جولاقتارىمەن كومكەرىپ, اسەرلى كورىنىس جاسادى. بۇل اۋىر فرونتتىق جويعىش كەز كەلگەن اۋا رايىندا, كۇندىز-ءتۇنى جاۋ نىساندارىن ءدال جويۋعا قابىلەتتى.
پارادتى «ۇشاتىن تانك» اتانعان سۋ-25 شابۋىلداۋشى ۇشاقتارىنىڭ ۇشۋى قورىتىندىلادى. ولار اسكەرگە اۋەدەن قولداۋ كورسەتىپ, كەز كەلگەن جاعدايدا – تىكەلەي كورىنەتىن نىسانداردى جويۋ قابىلەتىمەن ەرەكشەلەنەدى.
جالپى پارادقا 66 بىرلىك اۆياتسيالىق تەحنيكا قاتىستى.