2025 جىلدىڭ باسىنان باستاپ استانا مەن الماتى قالالارىندا ەرەكشە قاجەتتىلىكتەرى بار ازاماتتارعا ينۆاتاكسي قىزمەتىن كورسەتۋ بويىنشا پيلوتتىق جوبا ىسكە قوسىلدى. بۇل باستاما قر ەڭبەك جانە حالىقتى الەۋمەتتىك قورعاۋ مينيسترلىگىنىڭ ۇسىنىسىمەن جۇزەگە اسىرىلىپ جاتىر, دەپ حابارلايدى Egemen.kz.
اتالعان جوبا شەڭبەرىندە جىل باسىنان بەرى ەلوردا مەن الماتىدا ينۆاتاكسي قىزمەتى 138,1 مىڭ رەت كورسەتىلگەن. ال 2024 جىلدىڭ قورىتىندىسى بويىنشا رەسپۋبليكا كولەمىندە مۇگەدەكتىگى بار جاندارعا بۇل قىزمەت 207,2 مىڭ رەت ۇسىنىلعان.
مينيسترلىكتىڭ حابارلاۋىنشا, ينۆاتاكسي قىزمەتىنىڭ جىلدامدىعى مەن ساپاسىن ارتتىرۋ ماقساتىندا جەرگىلىكتى اكىمدىكتەرمەن بىرلەسىپ, قىزمەت كورسەتۋ تەتىگىنە بىرقاتار وزگەرىس ەنگىزۋ تۋرالى شەشىم قابىلداعان. بۇرىن ازاماتتار ساپارعا ءبىر كۇن بۇرىن تەلەفون ارقىلى جازىلىپ, كولىك قۇرالدارىنىڭ جەتىسپەۋشىلىگىنە بايلانىستى ۇزاق كۇتۋگە ءماجبۇر بولاتىن. بۇل فاكتورلار ەرەكشە قاجەتتىلىگى بار ادامدار ءۇشىن قولايسىزدىق تۋعىزاتىن.
«وسى ماسەلەلەردى شەشۋ جانە قىزمەتتى جەڭىلدەتۋ ءۇشىن ەڭبەكمينى ينۆاتاكسي قىزمەتىنە تاكسي اگرەگاتورلارىن تارتۋ جونىندەگى پيلوتتىق جوبانى قولعا الدى. بۇل جوبانىڭ باستى شارتى – تاكسي اگرەگاتورلارى تاراپىنان ساپار اقىسىنان كوميسسيالىق پايىز الماۋ. بۇل تالاپتى قولداعان ياندەكس كومپانياسى پيلوتتىق جوباعا وتەۋسىز نەگىزدە قاتىسۋعا نيەت ءبىلدىردى», دەلىنگەن حابارلامادا.
ناتيجەسىندە, ازاماتتار ەندى ياندەكس Go ءموبيلدى قوسىمشاسى ارقىلى ينۆاتاكسي قىزمەتىن قولدانا الادى. قوسىمشا ارقىلى كولىكتى جەدەل تاڭداپ, تاپسىرىستىڭ مارتەبەسىن ونلاين باقىلاپ, ساپارلار بويىنشا تولىق مونيتورينگ جۇرگىزۋگە مۇمكىندىك بار. سونىمەن قاتار, قوسىمشادا ارنايى مۇمكىندىكتەر ەكرانى ىسكە قوسىلعان. ول ارقىلى مۇگەدەكتىگى بار ازاماتتار ساپار بارىسىندا جۇرگىزۋشىگە وزدەرىنىڭ ەرەكشە قاجەتتىلىكتەرى جايلى ەسكەرتە الادى. ال جۇرگىزۋشىلەرگە جولاۋشىنى كولىككە وتىرعىزۋ جانە ءتۇسىرۋ كەزىندە كومەك كورسەتۋگە ارنالعان ارنايى نۇسقاۋلىقتار بەرىلگەن.
ايتا كەتەيىك, بيىل استانا مەن الماتى قالالارىندا جوبا پيلوتتىق رەجيمدە جۇزەگە اسىپ جاتىر. بۇل جۇمىسقا ەرەكشە قاجەتتىلىكتەرى بار ازاماتتار قاتارىنان قۇرىلعان فوكۋس-توپتار دا بەلسەندى اتسالىسۋدا. الداعى ۋاقىتتا جوبانى ەلىمىزدىڭ وزگە وڭىرلەرىنە دە كەزەڭ-كەزەڭىمەن ەنگىزۋ جوسپارلانىپ وتىر.