الماتى قالاسىندا جەڭىس كۇنى قارساڭىندا جەرگىلىكتى اسكەري باسقارۋ ورگاندارىنىڭ اسكەري قىزمەتشىلەرى قازاقستاننىڭ حالىق ءارتىسى, وپەرا ونەرىنىڭ اڭىزى بيبىگۇل تولەگەنوۆانى ارنايى بارىپ قۇتتىقتادى, دەپ حابارلايدى Egemen.kz.
سالتاناتتى كەزدەسۋ بارىسىندا اسكەري قىزمەتشىلەر ۇلت ماقتانىشىنا اينالعان انشىگە گۇل شوقتارىن تارتۋ ەتىپ, اتى اڭىزعا اينالعان باتىر باۋىرجان مومىش ۇلى تۋرالى كىتاپتى سىيعا تارتقان.
بوستاندىق اۋدانىنىڭ قورعانىس ىستەرى جونىندەگى باسقارماسىنىڭ باستىعى, پولكوۆنيك ارمان تۇرعانباەۆ بيبىگۇل احمەتقىزىنا شەكسىز ريزاشىلىعىن ءبىلدىرىپ, ىزگى تىلەكتەرىن جەتكىزگەن.
ء«سىز – تاڭعاجايىپ ەرىك-جىگەر مەن ومىرگە دەگەن قۇشتارلىقتىڭ جارقىن ۇلگىسىسىز. سىزگە زور دەنساۋلىق, ۇزاق عۇمىر جانە شىعارماشىلىق تابىس تىلەيمىز», دەدى پولكوۆنيك.
ءوز كەزەگىندە بيبىگۇل تولەگەنوۆا اسكەري قىزمەتشىلەرگە العىسىن ايتىپ, مامىر ايىنداعى قوس مەرەكە – وتان قورعاۋشىلار جانە جەڭىس كۇنىمەن قۇتتىقتادى.
«جەڭىس كۇنىنە وراي جولدانىپ جاتقان قۇتتىقتاۋلار جۇرەگىمدى ەلجىرەتەدى. مەن بارلىق قازاقستاندىقتارعا اشىق اسپان مەن تىنىش ءومىر, مول اماندىق پەن مەرەكەلىك كوڭىل-كۇي تىلەيمىن. ۇلى وتان سوعىسىندا جەڭىسكە جەتۋگە باعا جەتپەس ۇلەس قوسقان ارداگەرلەرىمىز بەن ولاردىڭ وتباسىلارىنا ەرەكشە قۇرمەت بىلدىرەمىن. قازاقستان حالقى سوعىس دەگەن ءسوزدى ەشقاشان بىلمەسىن», دەدى ءانشى.