اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە ۇلى جەڭىستىڭ 70 جىلدىعىنا جانە كورنەكتى عالىم, كەڭەس وداعىنىڭ باتىرى مالىك عابدۋلليننىڭ 100 جىلدىق مەرەيتويىنا ارنالعان «پوەتيكا جانە ولەڭتانۋ ماسەلەلەرى VII» اتتى حالىقارالىق عىلىمي-تەوريالىق كونفەرەنتسياسى ءوز جۇمىسىن باستادى.
باتىر, ادەبيەتشى ءارى كورنەكتى عالىم مالىك عابدۋلليننىڭ ەڭبەگى مەن قىزمەتىنە, قوعامدىق ماسەلەلەرگە ەتەنە ارالاسقان ءومىر جولىنا ارنالعان كەلەلى كەڭەسكە قازاقستان ۇلتتىق عىلىم اكادەمياسىنىڭ اكادەميگى, فيلولوگيا عىلىمدارىنىڭ دوكتورى, مالىك عابدۋلليننىڭ شاكىرتى, پروفەسسور سەرىك قيراباەۆ, قازاقستان جازۋشىلار وداعىنىڭ توراعاسى, قازاقستان رەسپۋبليكاسى پارلامەنت سەناتىنىڭ دەپۋتاتى نۇرلان ورازالين, مۇحتار اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى, فيلولوگيا عىلىمدارىنىڭ دوكتورى, پروفەسسور ءۋاليحان قاليجانوۆ, باتىردىڭ قىزى مايدان عابدۋللينا قاتىستى. كونفەرەنتسيانى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى, ۇلتتىق عىلىم اكادەمياسىنىڭ اكادەميگى, پروفەسسور سەرىك پىراليەۆ قۇتتىقتاۋ سوزبەن اشىپ, عىلىمي كونفەرەنتسياعا قاتىسۋشىلارعا ساتتىلىك تىلەدى.
ۇلى وتان سوعىسىندا ەرەن ەرلىگىمەن كوزگە تۇسكەن, كەڭەس وداعىنىڭ باتىرى, كورنەكتى عالىم, قوعام قايراتكەرى, ۇلاعاتتى ۇستاز ءھام پاراساتتى باسشى بولا بىلگەن مالىك عابدۋلليننىڭ ءومىرى مەن ادەبيەتكە سىڭىرگەن ەڭبەگىن تالقىلاۋعا ارنالعان عىلىمي كەڭەسكە شۆەيتساريا, شۆەتسيا, بولگاريا, لاتۆيا, پولشا, يزرايل, ەستونيا, رەسەي, وزبەكستان سەكىلدى الەمنىڭ وننان اسا ەلىنەن كەلگەن عالىمدار قاتىسىپ, كونفەرەنتسيا بارىسىندا جالپى ولەڭ ورنەكتەرى, سوعىس زاردابى, ادەبي ميگراتسيا جانە ۇلتتار دوستىعى تاقىرىپتارىندا دا باياندامالار جاسالدى.
عىلىمي-تەوريالىق كونفەرەنتسيانىڭ رەسمي شاراسى بارىسىندا «مالىك عابدۋللين» اتتى قوس تومدىق ەڭبەكتىڭ تۇساۋ كەسەر ءراسىمىن بەلگىلى عالىم سەرىك قيراباەۆ پەن باتىردىڭ قىزى مايدان عابدۋللينا اتقاردى. ۋنيۆەرسيتەت رەكتورى سەرىك پىراليەۆ اتقارىلىپ جاتقان يگى ىستەرمەن قاتار, بيىلعى جىلى اتاپ وتىلەتىن قازاق حاندىعىنىڭ 550 جىلدىعى, ۇلى جەڭىستىڭ 70 جىلدىعى سەكىلدى تاريحي شارالارعا توقتالدى. سونداي-اق, كوپ جىلداردان بەرى اباي اتىنداعى قازاق مەملەكەتتىك پەداگوگيكالىق ۋنيۆەرسيتەتىنىڭ ۇستازدارى وزگە دە عالىمدارمەن بىرلەسىپ مالىك عابدۋلليننىڭ شىعارماشىلىعى مەن عىلىمي ەڭبەكتەرى جونىندە تىڭعىلىقتى جۇمىستار اتقارىپ جاتقاندىعىن تىلگە تيەك ەتتى. ودان كەيىن ءسوز العان سەرىك قيراباەۆ ءوزىنىڭ ۇستازى مالىك عابدۋللين تۋرالى ەستەلىكتەر ايتىپ, قازاق حالقىنىڭ باتىر ۇلىنىڭ ەڭبەگى مەن ءومىر جولى جايىندا ساليقالى اڭگىمە شەرتتى. پارلامەنت سەناتىنىڭ دەپۋتاتى, اقىن نۇرلان ورازالين مەن پروفەسسور ءۋاليحان قاليجانوۆ تا كورنەكتى عالىمنان العان ءتالىم-تاربيەسى حاقىندا, عابدۋلليننىڭ قازاق ادەبيەت عىلىمىنا قوسقان زور ۇلەسى مەن ۇلتتىق جىر جاۋھارلارىن ساقتاپ قالۋ جولىنداعى جانكەشتى قىزمەتىن ءسوز ەتتى.
مالىك عابدۋلليننىڭ 100 جىلدىعىنا ارنالعان عىلىمي كونفەرەنتسيانىڭ پلەنارلىق ءماجىلىسى مەن سەكتسيالىق جۇمىستارىندا «مالىك عابدۋلليننىڭ عيبراتتى عۇمىرى», «مالىك عابدۋللين جانە قوبىلاندى باتىر», «ءبىزدىڭ قاھارمان جەرلەسىمىز», «قيلى كەزەڭ, قاھارمان تۇلعالار», «ءمالىك عابدۋللين – وتاندىق فولكلورتانۋدىڭ كلاسسيگى» جانە «مالىك عابدۋللين تۋرالى قازاقستان رەسپۋبليكاسىنىڭ ورتالىق مەملەكەتتىك مۇراعاتىندا ساقتالعان دەرەكتەر» اتتى تاقىرىپتار مەن وتاندىق جانە تمد كولەمىندەگى بەلگىلى ادەبيەتشىلەر مەن عالىمداردىڭ مالىك عابدۋللين جايىندا جازعان عىلىمي ەڭبەكتەرى, ماقالالارى مەن تالدامالى جۇمىستارى جايلى باياندامالار تالقىلاندى.
ايتۋلى عالىم مالىك عابدۋلليننىڭ 100 جىلدىق مەرەيتويى قارساڭىندا ۇيىمداستىرىلىپ وتىرعان اتاۋلى شارا بارىسىندا اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ كىرەبەرىسىنە باتىر ۇل, پاراساتتى تۇلعاعا ارنالعان ەسكەرتكىش تاقتا اشىلدى.
قانات ەسكەندىر,
«ەگەمەن قازاقستان».
الماتى.
سۋرەتتى تۇسىرگەن
مىرزان ايتجانوۆ.