استانادا ساياساتتانۋشى بەرىك ابدىعالي ۇلىنىڭ «زابىتىە گەروي. گەروي سوۆەتسكوگو سويۋزا» اتتى كىتابىنىڭ تۇساۋكەسەر ءراسىمى ءوتتى. بۇل ەڭبەكتە ەكىنشى دۇنيەجۇزىلىك سوعىستا ەرەكشە كوزگە ءتۇسىپ, قاجىر-قايراتىمەن كوپكە ۇلگى بولعان وتانداستارىمىزدىڭ ەرەن ەرلىگى ارقاۋ بولعان.
بۇگىنگى كۇنگە دەيىن 1941-1945 جىلدار بەدەرىندەگى قازاقستان تۋرالى از كىتاپ جازىلىپ, از فيلم تۇسىرىلمەگەن. الايدا, سۇراپىل سوعىستا وت پەن وقتىڭ اراسىندا جۇرسە دە ەرلىكتەرى ەسكەرۋسىز, ەسىمدەرى ەلەۋسىز قالعان تالاي باتىردىڭ بولعانى انىق. بۇل كىتاپقا سونداي ازاماتتاردىڭ كۇرەسكەرلىگى وزەك بولىپتى. ياعني, مۇندا زۇلمات جىلدارى كورسەتكەن ەرلىكتەرى ءۇشىن دەر كەزىندە «كەڭەس وداعىنىڭ باتىرى» اتاعىنا ۇسىنىلىپ, بىراق, بەلگىسىز سەبەپتەرمەن باتىر اتاعى بەرىلمەگەن, تىپتەن ەل جادىنان وشۋگە اينالعان قاريالار تۋرالى تىڭ مالىمەتتەر توپتاستىرىلعان.
كىتاپ اۆتورى وسىدان 5 جىل بۇرىن مەملەكەتتىك ءتىلدى دامىتۋ قورىنىڭ ديرەكتورى قىزمەتىن اتقارىپ تۇرعان كەزىندە «حالىق باتىرى» جوباسى اياسىندا سوعىس جىلدارىنان حابار بەرەتىن تىڭ دەرەكتەردى ىزدەستىرۋ, سارالاۋ, زەرتتەۋ, قورىتۋ ماقساتىندا ۇلكەن جۇمىس اتقارىپتى. جەڭىستىڭ 70 جىلدىق مەرەيتويى شەڭبەرىندە جۇزەگە اسىرىلعان بۇل ەڭبەك – سونىڭ يگى ناتيجەسى. ازىرگە, «كەڭەس وداعىنىڭ باتىرى» اتاعىنا ۇسىنىلعان 10 قازاقستاندىق باتىر جايىندا عانا ماعلۇمات پەن قۇجات تابىلىپتى. رەسەيدىڭ قورعانىس مينيسترلىگىنىڭ مۇراعاتىنان الىنعان ماڭىزدى مالىمەتتەردىڭ باسىم كوپشىلىگى العاش رەت جۇرتشىلىققا ۇسىنىلۋدا.
ەڭبەك اۆتورىنىڭ ايتۋىنشا, جوبانىڭ ماقساتى – تاريحي ادىلەتتىلىكتى قالپىنا كەلتىرۋ جانە جاس ۇرپاق بويىنا وتانسۇيگىشتىك قاسيەتتى ءسىڭىرۋ. ال بۇل باستاماعا «نۇر وتان» پارتياسىنىڭ قوعامدىق ساياسات ينستيتۋتى مەن «بايكادام حولدينگ» كومپانياسى قولداۋ تانىتقان ەكەن.
ءلايلا ەدىلقىزى,
«ەگەمەن قازاقستان».