الماتىداعى دوستىق ۇيىندە قازاقستان حالقى اسسامبلەياسىنان (قحا) سايلانعان پارلامەنت ءماجىلىسى دەپۋتاتتارىنىڭ قحا جانە ەتنومادەني بىرلەستىكتەر مۇشەلەرىمەن كەزدەسۋى ءوتتى. اتالعان ءىس-شاراعا ءماجىلىس دەپۋتاتتارى جۇماتاي اليەۆ, ەگور كاپپەل, رومان كيم, احمەد مۇرادوۆ, نادەجدا نەستەروۆا, يۋري تيموششەنكو, قحا كەڭەسىنىڭ مۇشەلەرى, رەسپۋبليكالىق ەتنومادەني بىرلەستىكتەردىڭ جەتەكشىلەرى, قوعام قايراتكەرلەرى قاتىستى.
كەزدەسۋ بارىسىندا دەپۋتاتتاردىڭ اتقارعان جۇمىستارى بويىنشا جەكە-جەكە ەسەپتەرى تىڭدالىپ, قحا جىلى ارالىعىندا اتقارعان ءىس-شارالارىنىڭ قورىتىندىسى جاريا ەتىلدى. سونداي-اق, قحا جىلىن ۇيىمداستىرۋ جانە وتكىزۋ بويىنشا وتكەن مەملەكەتتىك كوميسسيا وتىرىسىندا جۇكتەلگەن تاپسىرمالار قاراستىرىلدى.
– ءبىزدىڭ الماتىعا اتباسىن بۇرۋداعى ماقساتىمىز – قازاقستان حالقى اسسامبلەياسىنان سايلانعان دەپۋتاتتار وزدەرىنىڭ 3,5 جىلدا اتقارعان جۇمىستارى تۋرالى بايانداپ بەرۋ, – دەدى دەپۋتاتتىق توپتىڭ جەتەكشىسى جۇماتاي اليەۆ. – بيىل قحا-عا 20 جىل تولدى. قحا – ەلباسىنىڭ نوۋ-حاۋى. اسسامبلەيا – ەلىمىزدەگى ەتنوسارالىق جانە كونفەسسياارالىق كەلىسىمنىڭ بىرەگەي مودەلى. مۇندا ۇلتى مەن دىنىنە قاراماستان ءاربىر ازامات كونستيتۋتسيا كەپىلدىك ەتەتىن ازاماتتىق قۇقىق پەن بوستاندىقتى تولىعىمەن پايدالانادى. ال پارلامەنت وزدەرىڭىز بىلەسىزدەر, زاڭ شىعارۋشى ورگان. ەندەشە, وسى اسا جاۋاپتى ىستە قحا-دان سايلانعان توعىز دەپۋتات قانداي ۇلەس قوستى دەگەنگە كەلسەك, ولاردىڭ بارلىعى ءار بەيىندەگى كوميتەتتەردە جۇمىس ىستەيدى.
ولاردىڭ ارقايسىسى جۇمىسشى توپتىڭ جەتەكشىسى نەمەسە مۇشەسى. ولار الەۋمەتتىك, اگرارلىق, ت.ب. سالاداعى ءاربىر قابىلدانعان زاڭدارعا, ەلىمىزدەگى تىنىشتىققا, كەلىسىمگە ءوز ۇلەستەرىن قوسىپ جاتىر. جالپى العاندا, وسى ۋاقىت ارالىعىندا سايلانعان دەپۋتاتتاردىڭ توپ جەتەكشىسى رەتىندە ايتارىم, ولاردىڭ ارقايسىسى وزدەرىن قاي جاعىنان بولسىن ساۋاتتى, بەلسەندى كورسەتە ءبىلدى. ولاردىڭ ارقايسىسى پارلامەنتتەگى ارىپتەستەرىنىڭ اراسىندا ابىرويلى, سونداي-اق, حالىقتىڭ اراسىندا دا بەدەلى جوعارى. ولار وزدەرىنىڭ, بولماسا باسقا دا ءتۇرلى ەتنوست وكىلدەرىنىڭ مۇددەسىن ەمەس, قازاقستاندىق يدەيانى, قازاقستاندىق پاتريوتتىق سەزىمدى قورعادى. قوعامدىق كەلىسىمدى ساقتاۋعا ۇلەس قوستى. ال كەشەگى سايلاۋداعى پرەزيدەنتىمىزدىڭ جەڭىسى حالقىمىزدى ودان ءارى بىرىكتىردى.
– قحا اتىنان سايلانعان دەپۋتاتتار اراسىندا ءماجىلىستىڭ 7 كوميتەتىندە جۇمىس جاسايتىن وكىلىمىز بار, – دەدى ءوز سوزىندە دەپۋتات نادەجدا نەستەروۆا. – وسى ءۇش جارىم جىلدا ءبىزدىڭ دەپۋتاتتىق توپ ناعىز پىكىرتالاس الاڭىنا اينالدى. ءبىزدىڭ جيىنداردا وتە وزەكتى ماسەلەلەر شەشىلەدى. ارينە, پىكىرلەر ءارتۇرلى, ۇنەمى قىزۋ پىكىرتالاس بولادى. مەنىڭ ءوزىم ءۇش جىلدا 56 زاڭ جوباسىنا قورىتىندى شىعاردىم. بۇگىنگى تاڭدا جۇمىس توبى 39 وتىرىس وتكىزدى. قازاقستان پرەزيدەنتى, قحا توراعاسى نۇرسۇلتان نازارباەۆتىڭ وبلىستىق ءماسليحات ىشىندە ءبىزدىڭ جۇمىس توبىنا ۇقساس دەپۋتاتتىق توپتاردى قۇرۋ تۋرالى تاپسىرماسى دا ءوز دەڭگەيىندە ورىندالدى. اتالعان توپتار قازاقستاندا بەيبىتشىلىك پەن كەلىسىم ماسەلەلەرىن قاداعالايتىن بولادى, – دەدى نادەجدا نەستەروۆا.
سونداي-اق, ءسوز العان دەپۋتات ەگور كاپپەل بۇگىنگى كەزدەسۋدە بۇرىنعى دەپۋتاتتاردى دا كورىپ وتىرعانىن, ال قحا مۇشەلەرى, ەتنومادەني بىرلەستىكتەر قحا-دان سايلانعان دەپۋتاتتاردىڭ ەسەبىن تىڭداۋعا مىندەتتى ەكەنىن, ويتكەنى, ولار دا ءبىزدىڭ نە ىستەپ, نە قويىپ جاتقانىمىزدى بىلۋلەرى كەرەكتىگىن, ال دەپۋتاتتاردىڭ ارقايسىسى ءوز يميدجدەرىن جاساۋى قاجەتتىگىن ايتسا, دەپۋتات احمەد مۇرادوۆ بارلىعىمىزدىڭ قازاقستاننىڭ پاتريوتتارى ەكەنىمىزدى ۇمىتپاۋعا شاقىرىپ, قحا-نىڭ بۇگىندە حالىقارالىق ينستيتۋتقا اينالىپ وتىرعانىن جەتكىزدى.
دوڭگەلەك ۇستەلگە قاتىسۋشىلار اتىنان ءسوز العان ەتنومادەني ءبىرلەستىكتەردىڭ وكىلدەرى اسسامبلەيادان سايلانعان دەپۋتاتتاردىڭ جۇمىسىنا وڭ باعا بەرىپ, ءوز ۇسىنىستارىن دا ءبىلدىرىپ جاتتى. ماسەلەن, «احىسكا» ەتنومادەني بىرلەستىگىنىڭ توراعاسى زياتدين كاسانوۆ قحا-دان سايلانعان پارلامەنتتەگى دەپۋتاتتار ولاردىڭ بەتكە ۇستار وكىلدەرى ەكەنىن, سوندىقتان جوعارى دەڭگەيدە كورگىلەرى كەلەتىنىن, وسىنداي كەزدەسۋلەر جۇيەلى تۇردە وتكىزىلىپ تۇرسا, ماسەلەن, 3 اي سايىن ەكى دەپۋتات وسىلاي ەسەپ بەرىپ وتىرسا, سوندا ولاردىڭ دا جۇمىستارى كورىنەتىنىن, سونداي-اق, ۇسىنىستارى دا پارلامەنتتە ايتىلاتىنىن جەتكىزدى. «مەنىڭشە, اسسامبلەيا جەرگىلىكتى جەرلەردە – اۋىلداردا, اۋدانداردا جاقسى جۇمىس جاساۋى كەرەك. ول ءۇشىن اسسامبلەيانى جوعارىدان تومەن – حالىققا جاقىنداتسا, ونىڭ بەدەلى ودان دا ارتا تۇسەر ەدى», – دەدى ول.
كەزدەسۋ سوڭىندا بەلسەندىلەر, قحا مەن ەتنومادەني بىرلەستىكتەردىڭ مۇشەلەرى «قازاقستان حالقى اسسامبلەياسىنا – 20 جىل» مەرەيتويلىق مەدالدارىمەن ماراپاتتالدى.
گۇلزەينەپ سادىرقىزى,
«ەگەمەن قازاقستان».