الماتى حالىقارالىق اۋەجايىنىڭ ىشكى رەيستەرگە ارنالعان ۇشۋ زالىندا قىسقا مەرزىمدى جۇيەلىك اقاۋ ورىن الىپ, رەيستەر كەشىگىپ جاتىر, دەپ حابارلايدى Egemen.kz.
اۋەجايدىڭ ءباسپاسوز قىزمەتىنىڭ مالىمەتىنشە, 5 مامىر كۇنى ىشكى رەيستەردىڭ كەلۋ ايماعىندا قولجەتىمدىلىكتى باقىلاۋ جۇيەسىندە اقاۋ تىركەلگەن. سونىڭ سالدارىنان جولاۋشىلار اعىنى ارالاسىپ, قاۋىپسىزدىك الگوريتمىنە سايكەس جولاۋشىلار قايتا تەكسەرىلگەن.
«بەلگىلەنگەن قاۋىپسىزدىك تارتىبىنە سايكەس جولاۋشىلاردى قايتا تەكسەرۋ شارالارى جەدەل تۇردە جۇرگىزىلدى. بۇل ءىس-شارالار رەيستەر كەستەسىنە ايتارلىقتاي اسەر ەتكەن جوق. ورتاشا كىدىرۋ ۋاقىتى 25 مينۋتتان اسپادى. قازىرگى ۋاقىتتا اۋەجاي قالىپتى رەجيمدە جۇمىس ىستەپ جاتىر. ىڭعايسىزدىقتار ءۇشىن كەشىرىم سۇرايمىز جانە تۇسىنىستىك تانىتقاندارىڭىزعا العىس ايتامىز», دەلىنگەن حابارلامادا.