قىزىلورداداعى ءابىلدا تاجىباەۆ اتىنداعى وبلىستىق امبەباپ عىلىمي كىتاپحاناسى 23 ءساۋىر – بۇكىلالەمدىك كىتاپ جانە اۆتورلىق قۇقىق كۇنى مەرەكەسىنە وراي «تاعىلىمدى تارتۋ – كىتاپحاناعا كىتاپ سىيلاۋ» اكتسياسىن ۇيىمداستىردى.
اكتسيانىڭ نەگىزگى ماقساتى – جاستاردىڭ تۋعان جەرگە دەگەن سۇيىسپەنشىلىگىن ارتتىرىپ, بىرلىككە شاقىرىپ, قۇرمەت پەن جاسامپازدىق رۋحىنداعى پاتريوتتىق تاربيەگە باۋلۋ. سونىمەن قاتار, كىتاپ وقۋعا دەگەن قىزىعۋشىلىعىن ارتتىرىپ, ۇرپاقتار ساباقتاستىعىن جالعاستىرۋ.
سوناۋ حIح عاسىردان بەرى عۇلامالار مۇراسىن عاسىردان-عاسىرعا دەيىن ساقتاپ, تالاي وقىرمان ءۇشىن ءبىلىم ورداسى بولعان كيەلى شاڭىراق, بۇگىندە جاڭا زامان تالاپتارىنا ساي قىزمەت كورسەتۋدە. بۇگىنگى كىتاپحانانىڭ مۇراتى قالا جۇرتشىلىعىنىڭ سۇرانىسىن قامتاماسىز ەتۋ ءۇشىن ءوز اقپاراتتىق الەۋەتىن نىعايتۋ, پايدالانۋشىلاردىڭ وسكەلەڭ تالابىن قاناعاتتاندىرۋ جانە جوعارى ەستەتيكالىق تالعام قالىپتاستىرۋ, اقپاراتتاردى بىلۋگە دەگەن تالاپ-تىلەكتەرىنە قولداۋ كورسەتۋ, ەلەكتروندىق رەسۋرستاردى ءتيىمدى قولدانۋعا ۇيرەتۋ ەكەن.
كىتاپحانا قورىن ءتۇرلى قۇجاتتارمەن قامتاماسىز ەتىپ, جاستاردى وقۋعا تارتۋ ماقساتىندا ۇيىمداستىرىلعان اكتسياعا قازاقستان جازۋشىلار وداعىنىڭ قىزىلوردا وبلىستىق فيليالىنىڭ ديرەكتورى, اقىن قارشىعا ەسىمسەيىتوۆا, جازۋشى بەگىمباي ۇزاقباەۆ, قىزىلوردا مەملەكەتتىك ۋنيۆەرسيتەتىنىڭ پروفەسسورى م.ماتاەۆ, عالىمدار, زيالى قاۋىم وكىلدەرى, سۋرەتشىلەر مەن كىتاپحانانىڭ تۇراقتى وقىرماندارى قاتىستى. ايماقتاردان جەكە ازاماتتار ارنايى حابارلاسىپ, تارتۋ-تارالعىسىن ۇسىندى. اتاپ ايتقاندا, ا.سوپىبەكوۆ, ا.سادىبەك ۇلى, ر.ناۋرىزباەۆا, س.اڭساتوۆ, س.جۇباتىروۆ, ا.شاماحوۆا, ر.بەكبەرگەنوۆا, ت.تەبەگەنوۆ, ن.كوبەگەن ۇلى, ج.جاقىپ, ش.بەكماعانبەتوۆ وزدەرىنىڭ تۋىندىلارىن جانە جەكە كىتاپحانالارىنان قۇندى دۇنيەلەرىن سىيعا تارتىپ, قالىڭ وقىرماندى قۋانتتى.
بىلاي قاراساڭىز, كىتاپتار دا ادامدار سياقتى. ونىڭ دا وزىندىك تاعدىرى بار. ولار دا تۇلعالار سەكىلدى ادامزاتپەن بىرگە جاسايدى, يەسىمەن بىرگە تۋىلىپ, يەسىمەن بىرگە ءومىر سۇرەدى. كىتاپ – ادامدى ارمان بيىگىنە سامعاتادى, اقىل-وي الەمىنە شارلاتادى.
كىتاپحانا فويەسىندە «سىيعا تارتىلعان كىتاپتار», «ءسىزدىڭ شىعارماڭىز» اتتى كورمە ۇيىمداستىرىلدى. وبلىستىق فيلارمونيا انشىلەرى اكتسياعا قاتىسۋشىلارعا ءان شاشۋلارىن سىيلادى. بۇل كۇنى كىتاپحانا قورى 202 دانا كىتاپپەن تولىقتى.
ەرجان بايتىلەس,
«ەگەمەن قازاقستان».
قىزىلوردا وبلىسى.