2025 جىلعى 2 مامىردا قازاقستان رەسپۋبليكاسى مادەنيەت جانە اقپارات مينيسترلىگىنىڭ قولداۋىمەن, قازاقستان رەسپۋبليكاسىنىڭ ۇلتتىق مۋزەيى مەن ماكەن تورەگەلدين اتىنداعى جەزدى كەنتىندەگى تاۋ-كەن جانە بالقىتۋ ءىسى تاريحى مۋزەيىنىڭ بىرلەسكەن جوباسى – «قازاقستان – مايدان ارسەنالى» اتتى كورمەنىڭ سالتاناتتى اشىلۋى ءوتتى. كورمە ۇلتتىق مۋزەيدىڭ اتريۋم زالىندا ۇيىمداستىرىلىپ, 9 ماۋسىمعا دەيىن جالعاسادى. بۇل مادەني شارا – ەلىمىزدىڭ تاريحىنداعى ماڭىزدى بەلەستەردىڭ ءبىرى – ۇلى وتان سوعىسىنداعى جەڭىستىڭ 80 جىلدىعىنا ارنالعان, دەپ حابارلايدى Egemen.kz.
جەڭىس پەن بىرلىكتىڭ 80 جىلدىعىنا وراي اتالىپ وتەتىن بۇل جىل, حالىق جادىنا وتتى جىلدارداعى ەرلىك پەن قاجىرلى ەڭبەك, تىل مەن مايدان اراسىنداعى مىزعىماس بايلانىس, ەلدىك پەن بىرلىك ۇعىمدارىن تەرەڭىنەن سىڭىرۋگە مۇمكىندىك بەرەدى. وسى تۇرعىدان العاندا, «قازاقستان – مايدان ارسەنالى» كورمەسى – رۋحاني جاڭعىرۋ مەن ۇرپاق ساباقتاستىعىنىڭ كورىنىسى.
كورمەنىڭ باستى ماقساتى – قازاقستان حالقىنىڭ ۇلى وتان سوعىسىنداعى جەڭىسكە قوسقان سۇبەلى ۇلەسىن, تىل ەڭبەككەرلەرىنىڭ قاجىرلى ەڭبەگى مەن پاتريوتتىق رۋحىن مۋزەي قورىنداعى تاريحي جادىگەرلەر ارقىلى كوپشىلىككە تانىستىرۋ. سونىمەن قاتار, بۇل كورمە جاس ۇرپاقتىڭ تاريحي ساناسىن جاڭعىرتىپ, وتانسۇيگىشتىككە, ەلگە دەگەن ماحابباتقا تاربيەلەۋدى كوزدەيدى. ەكسپوزيتسيا ءتورت تاقىرىپتىق بولىمنەن تۇرادى.
قازاقستاننىڭ كەن ورىندارى مەن مۇنايى – ەلىمىزدىڭ تابيعي رەسۋرستارىن ءتيىمدى پايدالانۋ ارقىلى مايداندى قاجەتتى شيكىزاتپەن قامتۋ بارىسى. اسىرەسە, سوعىس جىلدارىندا قانىش ساتباەۆتىڭ جەتەكشىلىگىمەن اشىلعان جەزدى مارگانەتس كەن ورنىنىڭ ماڭىزى ەرەكشە اتاپ وتىلەدى. بۇل كەن ورنى مايدان ءۇشىن قاجەت ستراتەگيالىق مەتالداردىڭ ءبىرى – مارگانەتستىڭ نەگىزگى كوزىنە اينالدى.
سوعىس جىلدارىنداعى قازاقستاننىڭ ءوندىرىس ورىندارى – ەلىمىزگە ەۆاكۋاتسيالانعان زاۋىتتار مەن فابريكالاردىڭ جۇمىس ىستەۋى, قورعاسىن, مىس سياقتى مەتالداردىڭ ءوندىرىلۋى مەن ونىڭ مايدان قاجەتتىلىكتەرىن قامتاماسىز ەتۋى.
اۋىل شارۋاشىلىعى – تىلداعى اۋىل حالقىنىڭ جانقيارلىق ەڭبەگى, جامبىل, قىزىلوردا, وڭتۇستىك قازاقستان وبلىستارىنداعى كۇرىش, بيداي, ماقتا القاپتارىنىڭ ونىمدىلىگى. اتاقتى كۇرىششى ىبىراي جاقاەۆتىڭ وراعى مەن كەتپەنى – اۋىل شارۋاشىلىعىنداعى ەڭبەكتىڭ سيمۆولى رەتىندە ۇسىنىلعان.
مايدان بريگادالارى – قازاقستاندا قۇرىلعان اسكەري بولىمدەر, ولاردىڭ مايدانداعى ەرلىكتەرى مەن جاۋىنگەرلىك جولى. سونىمەن قاتار, حالىقتىڭ مايدانعا كورسەتكەن كومەگى – قاجىمۇقان مۇڭايتپاسوۆتىڭ ءوز قارجىسىنا ۇشاق جاساتىپ, ونى قىزىل ارمياعا سىيعا تارتۋى جونىندەگى تاريحي قۇجاتتار مەن العىس حات ەرەكشە نازار اۋدارارلىق.
سونىمەر قاتار كورمە اياسىندا ارحيۆتىك قۇجاتتار, فوتوماتەريالدار, سيرەك كەزدەسەتىن جادىگەرلەر مەن تۇرمىستىق بۇيىمدار ۇسىنىلدى. جادىگەرلەر اراسىندا زاماناۋي ينتەراكتيۆ تەحنولوگيالارمەن تولىقتىرىلعان ەكسپوزيتسيالار دا بار: ۆيرتۋالدى شولۋ, 3D مودەلدەۋ, اۋديوگيدتەر. وسى كورمە ارقىلى ۇلى وتان سوعىسى جىلدارىنداعى حالقىمىزدىڭ توزىمدىلىگى مەن بىرلىگىن قايتا جاڭعىرتىپ, جاۋىنگەرلەر مەن تىل ەڭبەككەرلەرىنىڭ ەڭبەگى كورسەتىلدى.