بۇگىن اقش پەن ۋكراينا اراسىندا ەلدىڭ تابيعي رەسۋرستارىن بىرلەسىپ يگەرۋ جانە سوعىستان قيراعان ينفراقۇرىلىمدى قالپىنا كەلتىرۋ ماقساتىندا ينۆەستيتسيالىق قور قۇرۋ تۋرالى ماڭىزدى كەلىسىم جاسالدى. اقش-تىڭ قارجى ءمينيسترى سكوتت بەسسەنت پەن ۋكراينا پرەمەر-ءمينيسترىنىڭ ورىنباسارى يۋليا سۆيريدەنكو بۇل كەلىسىمگە رەسمي تۇردە قول قويدى, دەپ حابارلايدى Egemen.kz.
ۋكراينا پرەزيدەنتى ۆلاديمير زەلەنسكي بۇل كەلىسىمدى ەل بولاشاعى ءۇشىن ماڭىزدى وقيعا دەپ اتادى.
«بۇل جاي عانا كەزدەسۋ ەمەس, ۋكراينا ءۇشىن ۇلكەن مۇمكىندىكتەرگە جول اشاتىن تاريحي كەلىسىم. ەكى تاراپتىڭ تەڭ قۇقىعىن جانە ادىلەت ءپرينتسيپىن ەسكەرە وتىرىپ جاسالدى. بۇل كەلىسىم ەلىمىزگە ءىرى ينۆەستيتسيالار تارتۋعا, ءوندىرىستى جاڭعىرتۋعا جانە زاڭ جۇيەمىزدى جەتىلدىرۋگە مۇمكىندىك بەرەدى», دەدى زەلەنسكي.
كەلىسىم اياسىندا اقش ۋكرايناداعى 20-عا جۋىق ستراتەگيالىق شيكىزات تۇرىنە قول جەتكىزۋدى كوزدەپ وتىر. ولاردىڭ قاتارىندا مۇناي, گاز, تيتان, ۋران, ليتي, گرافيت جانە مارگانەتس بار.
ايتا كەتەيىك, اتالعان رەسۋرستاردىڭ اۆياتسيالىق ءوندىرىس, يادرولىق وتىن, ەلەكتروموبيل باتارەياسى, مەديتسينالىق جابدىقتار جانە قارۋ-جاراق ءوندىرىسى ءۇشىن اسا ماڭىزدى ەكەنى اتاپ وتىلگەن.
جاڭا ينۆەستيتسيالىق قور ۋكراينا ەكونوميكاسىن قالپىنا كەلتىرۋگە سەرپىن بەرىپ, ەلدىڭ ونەركاسىپتىك الەۋەتىن ارتتىرۋعا باعىتتالعان.