بيىل كۇزدە م.قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ قازاقستان-امەريكا قوس ديپلومدىق باعدارلاماسىمەن وقيتىن 40 ستۋدەنتى 3-كۋرستان كەيىن اريزونا شتاتىنداعى تۋسون قالاسىنىڭ ۋنيۆەرسيتەتىنە بارىپ, وقۋىن جالعاستىرادى.
مەملەكەت باسشىسىنىڭ تاپسىرماسىمەن قولعا الىنعان بۇل جوبامەن قازىر ءبىر مىڭعا جۋىق ستۋدەنت وقىپ جاتىر. ولار قازاقستاننان عانا ەمەس, جاقىن شەتەلدەن دە كەلگەن. ازىرگە قوس ديپلومدىق باعدارلاماعا اۋىل شارۋاشىلىعى مەن ينجەنەريا, ءىت-گە قاتىستى ماماندىقتار ەنگىزىلگەن. ولار: بيوتەحنولوگيا; باسقارۋدىڭ اقپاراتتىق جۇيەسى; بىلىمدەگى پسيحولوگيا; العاشقى ءبىلىم جانە ينكليۋزيۆتىك تاجىريبە جانە ارناۋلى ءبىلىم جانە ينكليۋزيۆتىك تاجىريبە.
وقۋ اعىلشىن تىلىندە جۇرگىزىلەدى, ال وقىتۋشىلار قۇرامى قازاقستانمەن قاتار اقش, تۇركيا ەلدەرىنەن كەلگەن. سولاردىڭ ىشىندە ستۋدەنتتەرگە اندرەا زۋككولو, دجەلال چەكەن, ساۋلە مۋسۋروۆا سەكىلدى پروفەسسورلار ءدارىس وقيدى. جۋىردا امەريكادان تاعى دا رود ۆينگ, دجەننيفەر ۆينگ, ۆلادلەنا حارچەنكو سياقتى پروفەسسورلار كەلىپ, فلورا مەن فاۋنانىڭ سەكۆەنتۋم (جالعاستىق) ماسەلەلەرىنە قاتىستى سەمينار وتكىزىپ جاتىر. ال پروفەسسور توني سپاركس بىرلەسكەن باعدارلاما بويىنشا ينكليۋزيۆتىك پەداگوگيكا ماسەلەلەرىن قاداعالايدى.
مەملەكەت باسشىسىنىڭ تاپسىرماسىندا وتاندىق ۋنيۆەرسيتەتتى عىلىمي زەرتتەۋ جوعارى وقۋ ورنىنا اينالدىرۋ تۋرالى ايتىلعان ەدى. وسىعان وراي عىلىمعا ستۋدەنتتەردى تارتۋ كوزدەلگەن. بۇل كۇردەلى جۇمىس سولتۇستىك قازاقستان ۋنيۆەرسيتەتىنە جۇكتەلىپ, اۋىل شارۋاشىلىعى, ينجەنەريا جانە ءىت باعىتتارىن يگەرۋ قولعا الىنعان-دى. ونى جەكە-دارا ىسكە اسىرۋ قيىن بولعاندىقتان اريزونا ۋنيۆەرسيتەتىمەن ىسكەرلىك بايلانىس پەن ىنتىماقتاستىق ورنادى. ءبىزدىڭ ستۋدەنتتەر الدىمەن 3-كۋرستى وزىمىزدە وقىپ, قالعان وقۋدى تۋسون قالاسىنا بارىپ جالعاستىرادى. جوعارىدا ايتقانىمىزداي, بيىل كۇزدە العاشقى 40 ستۋدەنت امەريكاعا اتتانادى. ال كەلەسى جىلى 125 ستۋدەنت بارادى دەپ جوسپارلانىپ وتىر.
امەريكالىق پروفەسسورلار قازاقستان ستۋدەنتتەرىنىڭ بىلىمگە دەگەن ىنتاسى جوعارى ەكەنىن ايتادى. «ولاردىڭ ءبارى دە تەرەڭ ءبىلىم الۋعا قۇشتار ەكەنىن بايقادىق. بىزگە بەرگەن سۇراقتارى دا الىپ جاتقان ماماندىقتارىمەن تىعىز بايلانىستى بولدى. وزدەرىنىڭ تەزىرەك اريزوناعا بارعىسى كەلەتىندەرىن دە ءبىلدىردى», دەدى پروفەسسور رود ۆينگ.
سونىمەن بىرگە امەريكالىق عالىمدار ەلىمىزدەگى سۋ جاندىكتەرىنىڭ گەنوميكالىق جالعاستىق ماسەلەلەرىن دە زەرتتەيتىنىن جەتكىزدى. وسىعان وراي كاسپيدىڭ يتبالىعىنان سىناما الماق ەكەن. سۋ رەسۋرستارىن زەرتتەۋ بويىنشا م.قوزىباەۆ اتىنداعى سولتۇستىك قازاقستان ۋنيۆەرسيتەتىمەن قاتار قىتايدىڭ سولتۇستىك-باتىس اۋىلشارۋاشىلىق جانە ورمانشارۋاشىلىق ۋنيۆەرسيتەتىمەن ۇشجاقتى كەلىسىمگە قول قويىلعان كورىنەدى. ايتا كەتەيىك, ۆيزا الۋ مەن بارۋ-قايتۋ شىعىنى ۋنيۆەرسيتەتتىڭ ەسەبىنەن, وسىنىڭ ءوزى ستۋدەنتتەرگە زور كومەك ەكەنى داۋسىز.
پەتروپاۆل