قىزىلوردا قالاسىن كوركەيتۋگە قاتىستى كوپتەگەن شارا قولعا الىندى. ورتالىق كوشەلەر جوندەلىپ, جارىق باعانالارى اۋىستىرىلىپ, ايالدامالار جاڭارتىلىپ, جاياۋ جۇرگىنشىلەر جولى سالىنىپ جاتىر. الداعى ۋاقىتتا دا اقمەشىتتىڭ اجارىن ارتتىرۋعا قاتىستى كوپتەگەن شارۋا قولعا الىنباق.
مىسالى, «اراي» شاعىن اۋدانىنان جاڭا تۇرعىن ءۇي كەشەنى بوي كوتەرمەك. ساۋلەت-قالا قۇرىلىسى كەڭەسىنىڭ وتىرىسىندا «جەتۋ» جك مەردىگەر كومپانياسىنىڭ باسشىسى ءالايدار سىزدىقوۆ تۇرعىن ءۇي كەشەنى جوباسىمەن تانىستىردى.
«ارايداعى» ءابدىمومىنوۆ كوشەسىنەن سالىناتىن بۇل كەشەندە 3 قاباتتى 12 جانە 18 پاتەرلى 2 ءۇي, 2 قاباتتى تانحاۋستان تۇرماق. سونداي-اق, كوتتەدج ءۇيلەر دە بوي كوتەرمەك. بالالارعا ارنالعان ويىن, سپورت الاڭدارى دا قاراستىرىلعان. مەردىگەر جوبانى ءوز قاراجاتى ەسەبىنەن جۇزەگە اسىرماقشى. قۇرىلىس جۇمىسى تولىعىمەن 2016 جىلى اياقتالاتىن بولادى.
كەڭەس وتىرىسىندا تۇرعىن ءۇي كەشەنىنىڭ ەسكيزدىك جوباسى ماقۇلداندى. وبلىس اكىمى قىرىمبەك كوشەرباەۆ نىساندى ساپالى ءارى ۋاقتىلى اياقتاۋدى تاپسىردى. سالىناتىن قۇرىلىس نىساندارىنىڭ بارلىعى تەحنيكالىق تالاپقا ساي جانە قالانىڭ ساۋلەتىنە كەرى اسەرىن تيگىزبەۋى كەرەكتىگىن ەسكەرتتى.
سونىمەن قاتار, قىزىلوردادا زاماناۋي ساۋدا ويىن-ساۋىق كەشەنى سالىنادى. ساۋدا ويىن-ساۋىق كەشەنىن «قۇرىلىس-كولىك كومپانياسى» جشس قارجىسى ەسەبىنەن سۇلتان بەيبارىس كوشەسىندە سالۋ جوسپارلانۋدا. بۇل جوبا ءۇشىن 8 گەكتارعا جۋىق جەر ءبولىندى.
جوبا بويىنشا ساۋدا ويىن-ساۋىق كەشەنى تولىقتاي ينجەنەرلىك ينفراقۇرىلىممەن قامتاماسىز ەتىلىپ, ونىڭ اۋماعى اباتتاندىرىلادى. ويىن-ساۋىق ورتالىعىندا «رامستور» ساۋدا جەلىسى, كينوتەاتر, «بەبيلون» بالالار ويىن ورتالىعى, مەيرامحانا, كيىم دۇكەندەرى, اۋە, تەمىرجول جانە تۋريستىك اگەنتتىكتەردىڭ كەڭسەلەرى سياقتى قىزمەت كورسەتۋ ورىندارى بولادى. سونىمەن قاتار, 300 اۆتوكولىككە ارنالعان اشىق اۆتوتۇراق تا سالىنباق. مەردىگەر جوبانى جۇزەگە اسىرۋ ءۇشىن ەكىنشى دەڭگەيلى بانكتەردەن 3 ميلليارد تەڭگەگە جۋىق قاراجاتتى نەسيەگە الۋدى كوزدەيدى. قۇرىلىس كەزىندە 300 ادام, قۇرىلىس ءبىتكەن سوڭ تۇراقتى 150 ادام, 30 مۇمكىندىگى شەكتەۋلى جان جۇمىسپەن قامتىلماق. ايماق باسشىسى جاڭا عيماراتتىڭ اينالاسىن كوگالداندىرۋ جانە كوركەيتۋ جۇمىستارىندا تامشىلاتىپ سۋارۋ ءادىسىن پايدالانۋ قاجەتتىگىن ايتتى.
ەرجان بايتىلەس,
«ەگەمەن قازاقستان».
قىزىلوردا.