شىعىس قازاقستان وبلىسىنداعى شەمونايحا اۋدانى, ۆولچانكا اۋىلىندا دارىگەرلىك امبۋلاتوريا سالۋ جۇمىستارىن اياقتاۋعا قارجى ارناۋلى مەملەكەتتىك قوردان بەرىلدى, دەپ جازادى Egemen.kz.
بۇگىنگى تاڭدا نىساننىڭ قۇرىلىسى 65%-عا ورىندالعان. جالپى قۇنى 419 ملن تەڭگەنى قۇرايتىن جوباعا بۇرىن ۇكىمەت رەزەرۆىنەن جانە وبلىستىق بيۋدجەتتەن قارجى بولىنگەن. قازىر ينجەنەرلىك جەلىلەر: سۋمەن جابدىقتاۋ, ەلەكتر ەنەرگياسى جانە كوممۋنيكاتسيالاردى جۇرگىزۋ بويىنشا جۇمىستار اتقارىلىپ جاتىر. ۇكىمەتتىڭ ءباسپاسوز قىزمەتىنىڭ مالىمەتىنشە, قۇرىلىستى تولىق اياقتاپ تاپسىرۋ 2025 جىلدىڭ مامىرىنا جوسپارلانعان.
قازاقستاندا «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 655 نىسان, سونىڭ ىشىندە مەديتسينالىق جانە فەلدشەرلىك-اكۋشەرلىك پۋنكت, دارىگەرلىك امبۋلاتوريا سالۋ جوسپارلانعان. بۇگىندە 467 نىساننىڭ قۇرىلىسى اياقتالدى. العاشقى مەديتسينالىق-سانيتاريالىق كومەك نىساندارىن سالۋعا جانە اۋرۋحانالاردى رەكونسترۋكتسيالاۋعا قاراجات رەسپۋبليكالىق بيۋدجەتتەن بولىنەدى. قارجىلاندىرۋ ارناۋلى مەملەكەتتىك قوردان دا جۇرگىزىلەدى. پرەمەر-مينيستر دەنساۋلىق ساقتاۋ مينيسترلىگى مەن اكىمدىككە قالعان 188 مەديتسينالىق نىساننىڭ قۇرىلىسىنا جانە اۋرۋحانالاردىڭ قايتا قۇرىلۋىنا اپتا سايىن مونيتورينگ جۇرگىزۋدى تاپسىرىپ وتىر.