بۇگىندە بوكستان وزبەك اعايىنداردىڭ داڭقى دۇركىرەپ تۇر. مەملەكەت تاراپىنان سالاماتتى ءومىر سالتىن ناسيحاتتاۋعا, جاستاردى سپورتقا باۋلۋعا باسا نازار اۋدارىلىپ كەلەدى. سپورتپەن اينالىساتىن جاستارعا دا بارلىق جاعداي جاسالعان. اۋىل-ايماقتاردا اشىلىپ جاتقان زاماناۋي سپورت زالدارى مەن كەشەندەرى – وسىنىڭ ايعاعى.
بوكس دەمەكشى, وزبەكستان قۇراما كومانداسىنىڭ ساپىندا قازاق وعلاندارى دا ولجا سالىپ ءجۇر. قاجىرلى ەڭبەگى مەن جىگەرىنىڭ ارقاسىندا الەمدىك ارەنادا جەڭىس تۇعىرىنان كورىنىپ جۇرگەن قانداستارىمىز از ەمەس. سولاردىڭ ءبىرى – تاشكەنت وبلىسى قىبىراي اۋدانى قىپشاق اۋىلىنان شىققان تالانتتى بوكسشى, الەم چەمپيونى رۋسلان ابدۋللاەۆ.
جاقىندا ول اقش-تىڭ كاليفورنيا شتاتىنان ولجالى ورالدى. وشۋسسەنسايد قالاسىندا وتكەن كاسىپقوي بوكس كەشىندە فيليپپيندىك دجينو رودريگونى ۇپاي باسىمدىعىمەن (80–71, 80–71, 80–71) جەڭدى. 8 راۋندقا ۇلاسقان جەكپە-جەكتە رۋسلان قارسىلاسىن نوكداۋنعا ءتۇسىردى. رودريگونىڭ ابدۋللاەۆقا قاراعاندا تاجىريبەسى مول. ول كاسىپقوي بوكستا 13 جەكپە-جەك وتكىزدى. ال رۋسلان ءوزىنىڭ ەكىنشى ايقاسىنا شىقتى ءارى چەمپيوندىق بەلبەۋ ءۇشىن تارتىسقا ءتۇستى.
بۇل – رۋسلاننىڭ عانا ەمەس, كۇللى ەلدىڭ مەرەيىن وسىرگەن تاريحي جەڭىس. مۇحيتتىڭ ارعى جاعىنان جەڭىسپەن ورالعان بوكسشىنى قىبىراي اۋدانى اكىمىنىڭ ورىنباسارى ر.حاسانوۆ, جەرگىلىكتى حالىق سالتاناتتى تۇردە قارسى الدى. جانكۇيەرلەرىنىڭ ىستىق ىقىلاسىنا بولەنگەن بوكسشىعا ەرەكشە قۇرمەت كورسەتىلىپ, اۋدان اكىمدىگى اتىنان ەستەلىك سىيلىق تابىس ەتىلدى.
قىپشاق اۋىلى – تاريحى تەرەڭ, ءداستۇرى باي مەكەن. اقساقالداردىڭ ايتقانىنا سۇيەنسەك, سوعىس جىلدارىندا قازاقتىڭ داڭقتى بالۋانى قاجىمۇقان مۇڭايتپاس ۇلى اۋىلعا قوناق بولعان كورىنەدى. سول ءبىر تاريحي ءسات اۋىل تۇرعىندارىنىڭ جادىندا ايرىقشا ساقتالعان, ال بۇگىنگى رۋسلان – اتاقتى بالۋاننىڭ ءىزىن جالعاعان داڭقتى بوكسشى.
رۋسلان اۋەسقوي بوكستا ۇلكەن بەلەستەردى ەڭسەردى. 2022 جىلى ازيا قۇرلىعىندا دارا شىقتى. سول كەزدە-اق تەگەۋرىندى بوكسشى ءوسىپ كەلە جاتقانى بايقالىپ, ونىڭ ەسىم-سويى كاسىبي مامانداردىڭ نازارىنا ىلىكتى. ال 2023 جىلى تاشكەنت تورىندە وتكەن الەم چەمپيوناتىندا رۋسلان شيرەك فينالدا فرانتسۋز بوكسشىسى لۋنەس ءامراۋيدى ايقىن باسىمدىقپەن ۇتتى. جارتىلاي فينالدىق جەكپە-جەكتە توكيو وليمپياداسىنىڭ قولا جۇلدەگەرى ارمەنيالىق وۆانەس بوچكوۆتى ءسۇرىندىردى. ال فينالدىق ايقاستا جازعى وليمپيا ويىندارىنىڭ قاتىسۋشىسى, ازيا چەمپيونى موڭعوليالىق بااتارسۋحين چينزوريگتى ءسۇرىندىرىپ, 63,5 كگ سالماق دارەجەسىندە الەم چەمپيونى اتاندى.
بولاشاعىنان زور ءۇمىت كۇتتىرەتىن رۋسلان ابدۋللاەۆتىڭ جەڭىستى جولى جالعاسىن تابارىنا سەنىم مول. ونىڭ 2028 جىلى لوس-اندجەلەستە وتەتىن وليمپيا ويىندارىندا دا ەل نامىسىن ابىرويمەن قورعايتىنىنا بارشا جۇرت ءۇمىت ارتىپ وتىر. وزبەكستان ۇلتتىق قۇراماسىنىڭ باس باپكەرى تولقىن قىلىشەۆ رۋسلاننىڭ قارىشتى قادامىنا رازىلىق ءبىلدىرىپ, «بوكس كورولى» ءوسىپ كەلەدى» دەپ باعا بەردى. بۇل تەڭەۋ دە تەگىن ايتىلماسا كەرەك.
ايگۇل ەركىن,
جۋرناليست
تاشكەنت