شىمكەنتتە «بەس ينستيتۋتتىق رەفورما – 100 ناقتى قادام: اقپاراتتىق قامتۋ جانە ىلگەرىلەتۋ» تاقىرىبىندا رەسپۋبليكادا العاش رەت ايماقتىق جۋرناليستەر فورۋمى ءوتتى.
بار تىرشىلىك بولمىسىن, ارمانىن ءوز جۇرتىنا ارناپ, ءوز الدىنا تاۋەلسىز مىقتى ەل بولۋىن ارمانداپ وتكەن ءاليحان بوكەيحانوۆ: «ءوز كۇشىنە سەنبەگەن ادام دا, حالىق تا ەشقاشان ءومىر بايگەسىن الا المايدى», دەگەن ەكەن. ەلباسى مەملەكەتىمىزدىڭ دامۋ جولدارىن جۇيەلەگەن 100 ناقتى قادام ارقىلى الداعى ۋاقىتتا نە ىستەلۋ كەرەكتىگىن جىك-جىگىمەن تارقاتىپ بەردى.
«100 ناقتى قادام» – بۇل جاھاندىق جانە ىشكى سىن-قاتەرلەرگە جاۋاپ, سونىمەن بىرگە, جاڭا تاريحي جاعدايلاردا ەلىمىزدىڭ دامىعان مەملەكەتتەردىڭ وتىزدىعىنا كىرۋى جونىندەگى جوسپارى. ال فورۋمدا «اقپاراتتىق قامتۋ جانە ءىلگەرىلەتۋ», «ماڭگىلىك ەل قازاقستاندىق بىرتەكتىلىك يدەيالارىن جۇزەگە اسىرۋ», «باق-تاعى, ينتەرنەتتەگى بۇقارالىق اقپاراتتىڭ جاڭا بۋىندارىن قالىپتاستىرۋ», «بارشاعا ارنالعان قازىرگى زامانعى يدەيانى جۇزەگە اسىرۋدىڭ نەگىزدەرى» تاقىرىپتارى بويىنشا پىكىر الماسۋلار ۇيىمداستىرىلدى.
ايماقتىق جانە وبلىستىق اقپارات قۇرالدارىنىڭ وكىلدەرى جيىلعان باسقوسۋدا قۇتتىقتاۋ ءسوز سويلەگەن وبلىس اكىمىنىڭ ورىنباسارى ەربول سادىر 100 ناقتى قادامنىڭ ەلباسى ۇكىمەتكە مىندەتتەگەن وزىق وتىز ەلدىڭ قاتارىنا كىرۋدە مىقتى باسپالداقتار ەكەندىگىن اتاپ ءوتتى.
‒ ءۇش ميلليونعا جۋىق تۇرعىنى بار وڭتۇستىك قازاقستان وبلىسىندا جالپى 236 بۇقارالىق اقپارات قۇرالى بار. ولاردىڭ 175-ءى گازەت بولسا, 37-ءى جۋرنال, 12-ءى تەلەارنا, 3-ءۋى راديو. بۇعان قوسا, 9 ينتەرنەت رەسۋرس حالىققا جىلدام ءارى تولىمدى اقپارات تاراتۋدا. باق وكىلدەرىن, ەلباسى ايتقانداي, ءبىر ۇلت بولىپ ۇيىسۋعا, ىلگەرىلەۋگە, ۇلت جوسپارى ماقساتىندا اتقارىلعان شارالارعا بەلسەنە قاتىسىپ, اقپاراتپەن قامتۋعا شاقىرامىز, ‒ دەدى ە.سادىر.
وڭىرلەردەگى بۇقارالىق اقپارات قۇرالدارىنىڭ باسىن قوسقان بۇل فورۋمعا «ارا.kz» جۋرنالىنىڭ باس رەداكتورى, قازاقستان جازۋشىلار وداعى ساتيرا كەڭەسىنىڭ توراعاسى ك.ءامىربەك, «تۇركىستان» گازەتىنىڭ باس رەداكتورى ش.پاتتەەۆ, «ايقىن» گازەتىنىڭ باس رەداكتورى ن.ءجۇسىپ, جامبىل وبلىستىق «اق جول» گازەتىنىڭ ديرەكتور-باس رەداكتورى ك.ءساتتىباي ۇلى, «قازاقستان-2050» جالپىۇلتتىق قوزعالىسىنىڭ مەديا-ديرەكتورى ق.اۋەسباي ۇلى, قازاقستان ستراتەگيالىق زەرتتەۋلەر ينستيتۋتىنىڭ ساراپشىسى ج.ءجۇمادىلوۆ سىندى بىلىكتى جۋرناليستەر استانا, الماتى, قىزىلوردا, جامبىل مەن شىعىس قازاقستان وبلىستارىنان قاتىسىپ, ءوز ويلارىن ورتاعا سالدى.
وبلىس اكىمدىگى ۇيىتقى بولىپ, رەسپۋبليكادا اقپارات قۇرالدارى اراسىندا العاشقىلاردىڭ ءبىرى بولىپ وتكىزىلگەن القا-قوتان كەڭەستە ءسوز العان وڭتۇستىك قازاقستان وبلىستىق ىشكى ساياسات جانە ءدىن ىستەرى باسقارماسىنىڭ باسشىسى بەرىك قۇرمانعالي:
– مەملەكەت باسشىسىنىڭ بەس ينستيتۋتتىق رەفورماسىن جۇزەگە اسىرۋدىڭ 100 ناقتى قادامىنىڭ 90-قادامىندا باق-تا, ينتەرنەتتە, سونداي-اق, الەۋمەتتىك جەلىلەردە قازاقستاندىق بىرتەكتىلىك يدەيالارىن جۇزەگە اسىرۋدى اقپاراتتىق قامتۋ جانە ىلگەرىلەتۋ تۋرالى تاپسىرماسىن ورىنداۋ, جەرگىلىكتى بيلىك پەن باق اراسىنداعى بايلانىستى ودان ءارى نىعايتۋ, وڭىردە اتقارىلىپ جاتقان جۇمىستاردى كەڭىنەن ناسيحاتتاۋ ماقساتىندا «وڭتۇستىك» اقپارات ورتالىعى قۇرىلىپ, جۇمىس جاساۋدا. اتالعان ورتالىقتا جاۋاپتى باسشىلار كۇندەلىكتى وتەتىن بريفينگتەرگە قاتىسىپ, بيلىك پەن باق اراسىندا اشىق ۇنقاتىسۋ الاڭىن ورناتتى. مۇندا كۇن سايىن ءباسپاسوز ءماسليحاتتارى ۇيىمداستىرىلىپ, وڭىردە جاسالىپ جاتقان جۇمىستار باياندالۋدا, ‒ دەدى.
فورۋمدا كەلەلى ماسەلەلەر, ناقتى ۇسىنىستار, وتكىر سىن دا ايتىلدى. قازاق حالقىنىڭ ۇلتتىق قۇندىلىقتارىنا ورىس ءتىلدى باسىلىمداردىڭ نەمقۇرايدىلاۋ قارايتىندىعى, جاناشىرلىقپەن تەرەڭ قاۋزاپ جازبايتىندىعى سپيكەرلەردىڭ سويلەگەن سوزدەرىندە ناقتى مىسالمەن كورىندى. بۇل دۇرىس تا شىعار. ايتسە دە, مەدالدىڭ ەكىنشى جاعى بولاتىندىعىن دا ۇمىتپاعان ءلازىم. ەلباسى «ماڭگىلىك ەل» يدەياسى ارقىلى قازاقستان حالقىن ءبىر ماقسات, ءبىر مۇددە توڭىرەگىندە توپتاستىرۋعا كۇش سالىپ وتىر.
وتكەندە وڭتۇستىككە كەلگەندە ءابىش كەكىلباەۆ اعامىز «ەلىمىز تاۋەلسىزدىك العاندا قازاقتاردىڭ ۇلەسى 40 پايىزعا جەتپەگەن ەدى» دەگەن دەرەكتى العا تارتقان. قازاقستانعا تاعدىر-تالايىمەن كەلگەن ونداعان ۇلتتار مەن ۇلىستار ەلباسىنىڭ سىندارلى ساياساتىنىڭ ارقاسىندا مەملەكەتىمىزدىڭ تۇتاستىعى ءۇشىن داۋىس بەردى. اتا-بابا اڭساعان تاۋەلسىزدىكتە ولاردىڭ اسقار تاۋداي ۇلەسى بار. بۇگىندە ءوز قولىم ءوز اۋزىما جەتتى دەپ ولاردى ارعى جاعالاۋعا ىسىرىپ قويۋعا بولمايدى. «التاۋ الا بولسا, اۋىزداعىنىڭ كەتىپ, تورتەۋ تۇگەل بولعاندا توبەدەگىنىڭ كەلەتىنىن» ۇعىپ بولدىق قوي.
بىزدىڭشە, وسىنداي تالقىلاۋ, اشىق ۇنقاتىسۋعا ولاردى دا شاقىرىپ, پىكىرلەرىن تىڭداعان ارتىق بولماس ەدى. سوندا ارادا اجىك-كۇجىك ارتىق اڭگىمە ەمەس, ءوزارا تۇسىنىستىك جۇرەدى. «كەڭەسىپ ءپىشكەن توپ كەلتە بولمايدى» دەگەن عوي بىزدىكى.
قورىتا ايتقاندا, فورۋم جوعارى دەڭگەيدە ءوتتى. وسىندا ايتىلعان ۇسىنىستار مەن پىكىرلەر ەكشەلىپ, جيناقتالىپ ەل پايداسىنا جۇمىس جاسايتىن بولادى.
باقتيار تايجان,
«ەگەمەن قازاقستان».
وڭتۇستىك قازاقستان وبلىسى.