استانادا ينكليۋزيۆتى قوعام قۇرۋ يدەياسىن قولداۋشىلاردىڭ باسىن قوسقان «Run for Autism» قايىرىمدىلىق جارىسى ءوتتى. بيىل اتالعان ءىس-شاراعا 3 مىڭنان اسا ادام قاتىستى.
سەنات توراعاسى ماۋلەن اشىمباەۆ داستۇرگە سايكەس يگىلىكتى ىسكە ارنايى قاتىسىپ, اشىلۋ سالتاناتىندا ءسوز سويلەدى. ول بۇل جارىس سالاماتتى ءومىر سالتىن دارىپتەيتىن جانە ەرەكشە قاجەتتىلىكتەرى بار بالالاردى قولداۋدى كوزدەيتىن ماڭىزدى قوعامدىق باستاماعا اينالىپ كەلە جاتقانىن ايتتى.
«پرەزيدەنت قاسىم-جومارت توقاەۆ ينكليۋزيانى دامىتۋ ماسەلەسىنە ۇنەمى باسا ءمان بەرىپ كەلەدى. مەملەكەت باسشىسى ۇلتتىق قۇرىلتاي وتىرىسىندا ەرەكشە قاجەتتىلىكتەرى بار بالالاردى جان-جاقتى قولداۋعا ارنالعان جاڭا زاڭ ازىرلەۋدى تاپسىردى. قازىر وسى باستاما بويىنشا ءتيىستى جۇمىستار قولعا الىندى. اتالعان زاڭ شىن مانىندە ازاماتتارعا پايدالى بولۋى ءۇشىن سەناتورلار قوعامدىق ۇيىمداردىڭ وكىلدەرىمەن جانە ساراپشىلارمەن بىرگە بۇل باعىتتا قانداي باسىمدىقتارعا نازار اۋدارۋ كەرەكتىگىن جان-جاقتى تالقىلاپ, بەلسەندى جۇمىس جۇرگىزىپ كەلەدى», دەدى م.اشىمباەۆ.
سونىمەن قاتار پالاتا سپيكەرى جارىستى ۇيىمداستىرۋشىلارعا العىس ءبىلدىرىپ, ولاردىڭ ون جىلدان اسا ۋاقىت بويى ينكليۋزيۆتى ءبىلىم بەرۋ ءىسىن دامىتۋ ءۇشىن ەسەلى ەڭبەك ەتىپ كەلە جاتقانىنا نازار اۋداردى. وسىنداي تاباندى جۇمىستىڭ ارقاسىندا ءاۋتيزمى بار جۇزدەگەن بالا ءوز قاتارلاستارىمەن بىرگە مەكتەپتەر مەن بالاباقشالاردا وقۋعا مۇمكىندىك العانىن اتاپ وتكەن ءجون.