اقمولا وبلىسىندا اسىراپ العان مۇگەدەك بالاسىن ۇرىپ-سوعىپ, قاتىگەزدىكپەن قورلاپ كەلگەن ايەلگە سوت ۇكىمى شىقتى, دەپ حابارلايدى Egemen.kz.
بۋراباي اۋداندىق سوتىنىڭ ءباسپاسوز قىزمەتىنەن حابارلاعانداي, كامەلەتكە تولماعان بالانى تاربيەلەۋ بويىنشا مىندەتتەرىن ءتيىستى ورىنداماعانى ءۇشىن ايىپپۇل تاعايىندالدى.
«سوتتا انىقتالعانداي, ششۋچينسك قالاسىنىڭ تۇرعىنى س. 2022 جىلدىڭ ناۋرىزىندا پسيحيكالىق اۋرۋ دياگنوزىمەن 2014 جىلى تۋعان كامەلەتكە تولماعان چ.-نى پاتروناتتىق تاربيەلەۋگە الىپ, ونى تاربيەلەۋ جانە وعان قامقورلىق جاساۋ جونىندەگى مىندەتتەردى ءوز موينىنا جۇكتەسە دە, بالانى ءجيى ۇرىپ-سوققان. سولايشا, 2024 جىلدىڭ قازانىندا س. بالانىڭ اياعىن تەمىر ۇساقتاعىشپەن ۇرىپ, دەنەسىنە زاقىم كەلتىرگەن”, - دەلىنگەن سوت حابارلاماسىندا.
سوت-مەديتسينالىق ساراپتامانىڭ قورىتىندىسىنا سايكەس, بالادا سىزاتتار, تىرتىق تۇرىندە دەنە جاراقاتتارى انىقتالدى.
جازا تاعايىنداۋدا سوت اۋىرلاتاتىن ءمان-جاي دەپ كىنالىگە تاۋەلدى دارمەنسىز بالاعا قاتىستى قىلمىستىق تەرىس قىلىق جاساعانىن ەسكەردى.
«سوت ۇكىمىمەن س.-عا پەداگوگيكالىق لاۋازىمداردى اتقارۋ نەمەسە كامەلەتكە تولماعان بالالاردى تاربيەلەۋگە بايلانىستى قىزمەتپەن اينالىسۋ قۇقىعىنان 2 جىلعا ايىرا وتىرىپ, 80 اەك (295 360 تەڭگە) مولشەرىندە ايىپپۇل تاعايىندالدى», - دەلىنگەن حابارلامادا.
سوت اكتىسى زاڭدى كۇشىنە ەنگەن جوق.