اۋىل بالاسى عالامشاردى زەرتتەيتىن جاساندى ينتەللەكت ۇلگىسىن شىعاردى. عىلىمعا قۇشتار جاس زەرتتەۋشى ەندى وسى باعدارلاماسى ارقىلى مارستىڭ كليماتىن بولجاماقشى. ونىڭ بۇل جوباسى حالىقارالىق دەڭگەيدە جوعارى باعالانىپ, عارىشتىق زەرتتەۋلەر سالاسىنداعى جاڭا قادامعا اينالىپ وتىر.
اباي وبلىسى اياگوز اۋدانىنىڭ 10-سىنىپ وقۋشىسى جاقسىلىق سەكەنوۆ جاساعان باعدارلاما «Kaggle» پلاتفورماسىنداعى اۋا رايى مالىمەتتەرىن, ونىڭ ىشىندە NASA-نىڭ عارىشتىق قۇرالدارىنان الىنعان اشىق دەرەكتەردى قولدانادى. ماشينالىق وقىتۋ ادىستەرىنىڭ كومەگىمەن جۇيە تەمپەراتۋراسىنىڭ وزگەرۋىن انىقتاپ, مارستاعى ۋاقىت, ورنالاسقان جەر جانە ماۋسىمدارعا قاراي تەمپەراتۋرانىڭ قالاي وزگەرەتىنىن بولجايدى. جاقسىلىق ءۇش ءتۇرلى مودەلدى سىناپ كوردى: سىزىقتىق رەگرەسسيا, «Random Forest» جانە «Gradient Boosting». سوڭىندا ونىڭ تاڭداۋى ەڭ ءدال ناتيجە بەرگەن «Gradient Boosting» مودەلىنە ءتۇسىپتى.
ءوز جوباسى تۋرالى وقۋشى: «مەن وزگە پلانەتالارداعى كليمات قالاي جۇمىس ىستەيتىنىن تۇسىنگىم كەلدى. مارس ەرەكشە قىزىقتىردى, سەبەبى وندا اتموسفەرا جوقتىڭ قاسى, ال تەمپەراتۋرا كۇرت وزگەرەدى. وسىنداي جاعدايلاردى جاساندى ينتەللەكت ارقىلى ەسەپتەۋگە بولا ما دەگەن وي مازالادى. نەگىزى بۇل يدەيا مارسقا زەرتتەۋ جۇرگىزەتىن عارىشتىق قۇرىلعىلار تۋرالى دەرەكتى فيلم كورگەننەن كەيىن پايدا بولدى», دەيدى.
جاقسىلىق تەحنيكالىق بولىگىن اشىق دەرەككوزدەر مەن وقىتۋ پلاتفورمالارىن, NASA دەرەكتەرىن پايدالانا ءجۇرىپ ءوز بەتىنشە مەڭگەرگەن. كەيىپكەرىمىز بولاشاعىن عارىشتىق تەحنولوگيالار سالاسىمەن بايلانىستىرعىسى كەلەدى. ول وزگە پلانەتالاردى زەرتتەۋگە, بولاشاقتا عارىشتىق ميسسيالارعا دايىندالۋعا كومەكتەسەتىن ينتەللەكتۋالدى جۇيەلەر جاساۋدى ارماندايدى.