الماتىداعى ورتالىق مەملەكەتتىك كينو-قۇجاتتار جانە دىبىس جازبالار ارحيۆىندە 1940-1950 جىلدار ارالىعىندا ساقتالعان كينو-فوتوقۇجاتتار كورمەسى ءوتتى. وعان اقش كونسۋلدىعى وكىلدەرى قاتىستى, دەپ حابارلايدى Egemen.kz.
ورتالىق مەملەكەتتىك كينو-فوتوقۇجاتتار مەن دىبىس جازبالارىنىڭ مۇراعاتى ەلىمىزدەگى كينو-فوتو-فونوقۇجاتتاردا قازاقستان تاريحى مەن مادەنيەتى بويىنشا بىرەگەي ماتەريالدارىن ساقتاپ وتىرعان بىردەن-ءبىر اۋديوۆيزۋالدى مۇراعات. Cونداي-اق, پوستكەڭەستىك كەڭىستىكتەگى ەڭ كولەمدىسى سانالادى. ەلىمىز تاريحى بويىنشا اۋديوۆيزۋالدى قۇجاتتاردى تولىقتىرۋ, ساقتاۋ جانە پايدالانۋ سالاسىندا شەتەلدىك ارحيۆ, عىلىمي جانە مۇراجاي مەكەمەلەرىمەن بەلسەندى ىنتىماقتاسىپ كەلەدى. ارحيۆ قورىندا 1940-1950 جىلدارداعى قازاقستان-اقش قارىم-قاتىناسىن ايعاقتايتىن كينو-فوتوقۇجاتتار ساقتالعان.
ارحيۆ ديرەكتورى ءىلياس ىسقاقوۆ قازاقستان مەن امەريكا زەرتتەۋشىلەرىنە ورتاق تاقىرىپتارعا توقتالىپ, اقش كونگرەسىنىڭ كىتاپحاناسىمەن اۋديوۆيزۋالدى قۇجاتتارمەن الماسۋ جانە كورمە قىزمەتى سالاسىنداعى بىرلەسكەن قىزمەت تۋرالى اتاپ ءوتتى. ءوز كەزەگىندە اقش-تىڭ الماتى قالاسىنداعى باس كونسۋلى ميشەل ەركىن ەكى ەلدىڭ اۋديوۆيزۋالدى كوللەكتسيالارىندا مادەني بايلانىستار تاريحىن دارىپتەۋ مەن كاسىبي مۇراعاتتىق بايلانىستاردى دامىتۋعا جان-جاقتى قولداۋ كورسەتۋ بويىنشا بىرلەسكەن جۇمىستارعا قىزىعۋشىلىق تانىتسا, سىرتقى ىستەر مينيسترلىگى الماتى قالاسىنداعى ساياسي ىنتىماقتاستىق باسقارماسىنىڭ جەتەكشىسى الماشا ارەنوۆا مادەنيەت, ءبىلىم, عىلىم سالاسىنداعى ىقپالداستىق اياسىندا ارحيۆ قورلارىنداعى وسى ەلدەرگە ءتان تاريحي دەرەكتەردى زەرتتەۋ ءىسىنىڭ ماڭىزىن اتاپ ءوتتى.
كەزدەسۋگە كونسۋلدىق قىزمەتكەرلەرى حيرا كور كامبوج, ەراسىل تولەۋعازينوۆ, ايگۇل قاسىموۆا, مەرۋەرت بولتاەۆا قاتىسىپ, «مۇراعات 2025» باعدارلاماسى بويىنشا انىقتالعان بىرەگەي كينو-فوتو جانە فونوقۇجاتتاردىڭ تۇپنۇسقالارىن ساقتاۋ, تسيفرلاندىرۋ سالاسىنداعى مۇراعاتتى ارالاپ كوردى. سونداي-اق, 1944-1968 جىلدارى قازاق كسر مەن اقش اراسىنداعى ىنتىماقتاستىق تاريحىن سيپاتتايتىن فوتوكورمە, سيرەك كەزدەسەتىن كينوكادرلارمەن تانىستى.
كەزدەسۋدە ەكى ەلدىڭ ارحيۆتەرى اراسىنداعى ىنتىماقتاستىقتى جانداندىرا وتىرىپ, ەلىمىزدىڭ ۇلتتىق تسيفرلىق ءارحيۆىن دامىتۋ ماقساتىندا اقش-تىڭ ۇلتتىق ارحيۆ جانە قۇجاتتاما باسقارماسىمەن (NARA) ارحيۆ قىزمەتكەرلەرىنىڭ بىلىكتىلىگىن ارتتىرۋ, تاجىريبە الماسۋى, ارحيۆ ءىسى جانە تسيفرلىق ارحيۆتەر سالاسىنداعى بىرلەسكەن جوبالاردى دامىتۋ كوزدەلگەن.
الماتى