سەناتور ايگۇل قاپباروۆا پارلامەنت سەناتىنىڭ سپيكەرى ماۋلەن اشىمباەۆتىڭ توراعالىعىمەن وتكەن پالاتا وتىرىسىندا مىڭداعان قازاقستاندىقتاردىڭ وسى ۋاقىتقا دەيىن مەملەكەت مويىنداماعان جانە ۇلتتىق جىكتەۋىشكە ەنگىزىلمەگەن جاڭا تسيفرلىق جانە زاماناۋي كاسىپتەردە جۇمىس ىستەپ جۇرگەنىنە توقتالدى, دەپ حابارلايدى Egemen.kz.
سەناتوردىڭ ايتۋىنشا بۇل مامانداردى قۇقىقتىق جانە الەۋمەتتىك قورعاۋدان ايىرادى, كادرلاردى جۇيەلى دايارلاۋعا كەدەرگى كەلتىرەدى جانە سالىق اشىقتىعىن تومەندەتەدى.
«ەلىمىزدە مىڭداعان ادام رەسمي كلاسسيفيكاتوردا جوق ماماندىق يەسى رەتىندە جۇمىس ىستەپ ءجۇر. الايدا ولاردىڭ كوبى كولەڭكەلى سەكتوردا جۇمىس ىستەيدى, كاسىبى رەسمي تىركەلمەگەن. بۇل – ەڭبەك قۇقىعى مەن الەۋمەتتىك كەپىلدىكتەردەن ايىرىلعان ۇلكەن اۋديتوريا. بۇگىندە «IT مامانى», «تسيفرلاندىرۋ سالاسى», «ينتەرنەت تەحنولوگيالارى» دەگەن كەڭ ۇعىمدار ءوز ىشىنەن جۇزدەگەن ءتۇرلى جەكە ماماندىقتارعا بولىنگەن. بۇل ماماندىقتاردىڭ ارقايسىسى ناقتى كاسىبي قىزمەت, ناقتى قۇرال مەن ناقتى نارىقتىق سۇرانىسقا يە», دەپ اتاپ ءوتتى قاپباروۆا.
سەناتوردىڭ پىكىرىنشە 1 ميلليوننان استام ادام بەيرەسمي تۇردە جانە ولاردىڭ بىلىكتىلىگىن مويىنداماي جۇمىس ىستەۋى ەرەكشە الاڭداۋشىلىق تۋعىزادى. بۇل وسىنداي جۇمىسشىلاردى الەۋمەتتىك قورعاۋدى قيىنداتادى جانە ادامي كاپيتالدى ءتيىمسىز پايدالانۋعا اكەلەدى.
«نارىقتا تۇراقتى سۇرانىسقا يە تسيفرلىق جانە زاماناۋي ماماندىقتاردى ۇلتتىق كاسىپتەر كلاسسيفيكاتورىنا ەنگىزۋ كەرەك. سالا ساراپشىلارى مەن قاۋىمداستىقتارىمەن بىرلەسكەن ساراپتامالىق توپ قۇرۋ, بەيرەسمي سەكتوردا جۇمىس ىستەپ جۇرگەندەردىڭ داعدىلارىن تانۋ تەتىكتەرىن دامىتۋ كەرەك. سالىق جانە الەۋمەتتىك جۇيەگە بەيىمدەلىپ, NEET ساناتىنداعى جاستاردى ينتەگراتسيالاۋ, ولاردى ءوز الەۋەتىن كاسىبي تۇردە دامىتۋعا ىنتالاندىرۋ كەرەك. ەڭبەك نارىعىنىڭ زاماناۋي قۇرىلىمىن قامتيتىن جاڭا ستاتيستيكالىق ەسەپ قۇرالدارى ەنگىزىلۋى ءتيىس», دەپ اتاپ ءوتتى قاپباروۆا.