سەمەيدە اباي وبلىستىق سوتىنىڭ ءتورت قاباتتى جاڭا عيماراتىنىڭ سالتاناتتى اشىلۋى ءوتتى.
2023 جىلى كۇزدە اباي ەلىنە ارنايى كەلگەن جوعارعى سوت توراعاسى اسلامبەك مەرعاليەۆ بولاشاق نىساننىڭ ورنىنا سيمۆوليكالىق كاپسۋلا سالىپ, قۇرىلىستىڭ باستالۋىنا نەگىز قالاعان ەدى.
راسىمگە جوعارعى سوتتىڭ اكىمشىلىك ىستەر جونىندەگى سوت القاسىنىڭ توراعاسى اسلان تۇكيەۆ, اباي وبلىسىنىڭ اكىمى بەرىك ءۋالي, سوت اكىمشىلىگى باسشىسىنىڭ ءبىرىنشى ورىنباسارى شاكىر شاياحمەتوۆ, سۋديالار, جەرگىلىكتى اتقارۋشى ورگانداردىڭ وكىلدەرى, سوت جۇيەسىنىڭ ارداگەرلەرى مەن قوعام قايراتكەرلەرى قاتىستى. اشىلۋ سالتاناتىندا ءسوز سويلەگەن اسلان تۇكيەۆ پرەزيدەنتتىڭ زاڭ ۇستەمدىگىن نىعايتۋعا جانە ادام قۇقىقتارىن قورعاۋعا ەرەكشە ءمان بەرەتىنىن اتاپ ءوتتى. ونىڭ ايتۋىنشا, جاڭا عيماراتتا ازاماتتارعا قولايلى جاعداي جاسالعان, ال سوت كورپۋسى ءادىل سوت تورەلىگىن قامتاماسىز ەتۋگە باعىتتالعان.
وبلىس اكىمى بەرىك ءۋالي بۇل قۇرىلىستىڭ سوت ينفراقۇرىلىمىن دامىتۋداعى ماڭىزدى قادام ەكەنىن جانە سەمەي قالاسىنىڭ ساۋلەتتىك كەلبەتىمەن ۇيلەسىم تاپقانىن باسا ايتتى. وبلىستىق سوت توراعاسى قايرات چاكپانتاەۆ عيماراتتىڭ قالانىڭ قارقىندى دامىپ كەلە جاتقان اۋدانىندا زاماناۋي تالاپتارعا ساي سالىنعانىن ايتتى. ول سۋديالاردىڭ سوتقا دەگەن سەنىمنىڭ ارتۋىنا ءوز ۇلەستەرىن قوساتىنىنا سەنىم ءبىلدىردى. سوت جۇيەسىنىڭ ارداگەرى كەنجەش مۇقاشوۆتىڭ باتاسىنان كەيىن قوناقتار سوت زالدارىن, وزىنە-ءوزى قىزمەت كورسەتۋ تەرمينالدارى بار فرونت-كەڭسەنى, سونداي-اق سۋديالار, پروكۋرورلار, ادۆوكاتتار جانە مەدياتورلار كابينەتتەرىن ارالاپ كوردى. ءبىرىنشى قاباتتا سوت كەڭسەلەرى, سالقىنداتقىشى بار كۇتۋ زالدارى, تەلەديدارلار جانە اقپاراتتىق ستەندتەر ورنالاسقان.
ساپار بارىسىندا اسلان تۇكيەۆ وبلىستىڭ سوت كورپۋسىمەن دە كەزدەسىپ, سوت جۇيەسىندەگى رەفورمالاردىڭ بارىسىن تالقىلادى.