پارلامەنت ءماجىلىسىنىڭ دەپۋتاتى, قارجى جانە بيۋدجەت كوميتەتىنىڭ مۇشەسى نۇرلان جازىلبەكوۆ رۋمىنيا پارلامەنتىنىڭ دەپۋتاتتار پالاتاسى پارلامەنتارالىق وداقپەن بىرلەسىپ ۇيىمداستىرعان ورتالىق جانە شىعىس ەۋروپا پارلامەنتتەرىنىڭ ورنىقتى دامۋ ماقساتتارى جونىندەگى وڭىرلىك سەمينار جۇمىسىنا قاتىستى. سەمينار بۋحارەست قالاسىندا ءوتتى.
ءىس-شارا بارىسىندا ورنىقتى دامۋ ماقساتتارى جانە ولاردىڭ ورتالىق جانە شىعىس ەۋروپا وڭىرىندەگى ءمانى, ولاردى ىسكە اسىرۋداعى پارلامەنتتەردىڭ ءرولى, پارلامەنتتەر مەن ازاماتتىق قوعامنىڭ بىرلەسكەن جۇمىسى, گەندەرلىك تەڭدىك, سونداي-اق, ورنىقتى دامۋ ماقساتتارىن جۇزەگە اسىرۋ ارقىلى توتەنشە جاعدايلار مەن كليماتتىڭ وزگەرۋ تاۋەكەلدەرىن ازايتۋ ماسەلەلەرى تالقىلاندى.
ءىس-شارا بارىسىندا ن.جازىلبەكوۆ رۋمىنيانىڭ پارلامەنتى دەپۋتاتتار پالاتاسىنىڭ سىرتقى ساياسات كوميتەتىنىڭ توراعاسى لاسلو باربەلامەن كەزدەستى. دەپۋتاتتار وزەكتى حالىقارالىق كۇن تارتىبىندەگى ماسەلەلەر جونىندە پىكىر الماستى.
ساپار بارىسىندا قازاقستاندىق دەپۋتات «قازاقستان-رۋمىنيا» پارلامەنتتىك دوستىق توبىنىڭ باسشىسى, رۋمىنيا پارلامەنتى دەپۋتاتتار پالاتاسىنىڭ مۇشەسى كوستەل الەكسەمەن كەزدەسۋ وتكىزىپ, قازىرگى كەزدەگى پارلامەنتارالىق ىنتىماقتاستىقتىڭ جاي-كۇيىن, سونداي-اق, ەكى ەل پارلامەنتتەرى اراسىنداعى بايلانىستى دامىتۋ جايىن تالقىلادى.
كەزدەسۋ سوڭىندا ك.الەكسە رۋمىنيا پارلامەنتى دەپۋتاتتار پالاتاسىنىڭ توراعاسى ۆالەريۋ زگونيانىڭ قازاقستان پارلامەنتى ءماجىلىسىنىڭ توراعاسى ق.جاقىپوۆقا بۋحارەستكە رەسمي ساپارمەن كەلۋ جونىندەگى شاقىرۋىن تابىس ەتتى, دەپ حابارلادى ءماجىلىستىڭ ءباسپاسوز قىزمەتى.