اقتوبەدە ءوزىن ەمشى رەتىندە تانىستىرىپ, ادامدارعا بانكتەن نەسيە راسىمدەتكەن ايەلدىڭ ءىسى قارالىپ جاتىر, دەپ جازادى Egemen.kz.
№2 اقتوبە قالالىق سوتىندا باستالعان پروتسەسكە سايكەس, وعان قىلمىستىق كودەكستىڭ "الاياقتىق" بابىمەن ايىپ تاعىلعان. ءىس ماتەريالدارىنا سۇيەنسەك, 2018 جىلدان باستاپ 2024 جىلعا دەيىن ول 90 ادامدى الداپ, ءىرى كولەمدە قاراجات جىمقىرعان.
ءوزىن شىعىس حالىق مەديتسيناسىنىڭ ماگيسترى جانە كاسىبي ەمشى رەتىندە تانىستىرعان قازىباەۆا تۇرعىنداردى اقكول اۋىلىندا مارقۇم ءىنىسىنىڭ اتىنا مەشىت سالۋ جانە قىزىنىڭ تۇركيادا ەمدەلۋىنە اقشا قاجەت دەگەن جەلەۋمەن سەندىرىپ, نەسيەلەر راسىمدەتكەن. ول زارداپ شەككەندەرگە العان اقشانى ەكى اي ىشىندە قايتاراتىنىن ايتىپ سەندىرگەن.
— سۇلۋشاش قازىباەۆا قاساقانا پايدا تابۋ ماقساتىندا ادامداردى الداپ, بىرنەشە مارتە بوتەننىڭ مۇلكىن يەمدەنگەن. بۇل ارەكەتىن ۇزاق ۋاقىت بويى جۇرگىزىپ كەلگەن, — دەدى مەملەكەتتىك ايىپتاۋشى گۇلنازىم اليەۆا.
سوت وتىرىسىنا جابىرلەنۋشىلەردىڭ بىرقاتارى قاتىستى. ولاردىڭ ايتۋىنشا, قازىباەۆاعا سەنىپ, ءىرى كولەمدە نەسيە الىپ بەرگەن.
— قىزىمىزدىڭ دەنساۋلىعى ءۇشىن ەم ىزدەپ بارعانبىز. ول وتىرمايدى, جۇرە المايدى. سۇلۋشاشقا سەنىپ, 6 اي ەم الدىق, بىراق ناتيجە بولمادى. ءوزىم 2,5 ملن تەڭگە, جولداسىم 2 ملن تەڭگە نەسيە الدى. قازىر ول قارا تىزىمگە ەنبەۋ ءۇشىن قارىزدى ءوزى وتەپ جاتىر. ءبىز ساياجايدا تۇرامىز, — دەدى جابىرلەنۋشى گۇلبانۋ ناۋانوۆا.
ايىپتالۋشىنىڭ ەكى قىزى بار, ءوزى وتباسىلى. ول سوت پروتسەسىنىڭ جابىق ءوتۋىن سۇراعانىمەن, ءىس زاڭ تالاپتارىنا سايكەس اشىق تۇردە قارالىپ جاتىر.