23 ءساۋىر - قازاقستاندا العاش رەت ۇلتتىق كىتاپ كۇنى اتاپ ءوتىلىپ جاتىر. بۇل كۇن بىلتىرعى جىلى مەملەكەت باسشىسىنىڭ باستاماسىمەن ۇلتتىق قۇرىلتايدا بەكىتىلدى. پرەزيدەنتتىڭ ايتۋىنشا, كىتاپ - ۇلتتىڭ ينتەللەكتۋالدىق جانە مادەني پروگرەسىنىڭ نەگىزى. سوندىقتان, ەلدەگى ادەبي مۇرانى ساقتاۋ جانە دامىتۋ ماقساتىندا وتاندىق اۆتورلاردىڭ 100 ەڭ تانىمال كىتابى تۋرالى جالپىۇلتتىق ساۋالناما جۇرگىزىلەدى, دەپ حابارلايدى Egemen.kz.
ساۋالنامانىڭ باستى ماقساتى - قازاقستاندىق جازۋشىلاردىڭ شىعارمالارىن ناسيحاتتاۋ, وقۋعا دەگەن قىزىعۋشىلىقتى ارتتىرۋ جانە باسپا ءىسىن قولداۋ. بۇل حالىقتىڭ كىتاپ وقۋعا دەگەن قىزىعۋشىلىعىن ارتتىرىپ, وتاندىق ادەبيەتتى دامىتۋعا ۇلەس قوسادى.
«مەملەكەت باسشىسى قاسىم-جومارت كەمەل ۇلى توقاەۆ بىلتىر ۇلتتىق قۇرىلتايدىڭ وتىرىسىندا «ۇلتتىق كىتاپ كۇنىن» بەلگىلەۋ يدەياسىن قولدادى. پرەزيدەنت: «وزىق ويلى ۇلت بولۋدىڭ ەڭ توتە جولى – كىتاپ وقۋ. سوندىقتان كىتاپ وقۋ مادەنيەتىن قوعامدا بارىنشا ورنىقتىرۋىمىز كەرەك», – دەپ ايتقان ەدى. بۇگىن ءبىز العاش رەت «ۇلتتىق كىتاپ كۇنىن» اتاپ ءوتىپ وتىرمىز. وسىناۋ ايتۋلى كۇنى ءتول ادەبيەتىمىزدەگى 100 تاڭداۋلى كىتاپتى ايقىنداۋعا ارنالعان جالپىۇلتتىق ساۋالناما باستالدى. بۇل ءتىزىم كىتاپ وقۋعا دەگەن قىزىعۋشىلىقتى ارتتىرادى جانە ادەبيەتىمىزدى دامىتۋعا ىقپال ەتەدى دەپ ويلايمىن», دەدى قر مەملەكەتتىك كەڭەسشىسى ەرلان قارين
ساۋالناما «ەلەكتروندى ۇكىمەت» ينفراقۇرىلىمى ارقىلى وتكىزىلەدى. EGov.kz رەسمي سايتىندا ساۋالناما جۇرگىزۋ ءۇشىن ارنايى فورما ورنالاستىرىلعان, وندا ءار ازامات سۇيىكتى قازاقستاندىق جازۋشىسىنىڭ شىعارمالارىن تاڭداي الادى.
قاتىسۋشىلار پروزادان باستاپ پوەزيا, فانتاستيكا, پۋبليتسيستيكا جانە تاريحي روماندارعا دەيىن ءارتۇرلى جانرلاردا 10 كىتاپتى تاڭداي الادى. سونىمەن قاتار, قاتىسۋشىلارعا ىنتالاندىرۋ سىيلىقتارى قاراستىرىلعان. العاشقى 1000 قاتىسۋشىعا Meloman-Marwin جەلىسىنەن كىتاپ جانە ارنايى نوميناتسيالار بويىنشا قوسىمشا سىيلىقتار بەرىلەدى.
ايتا كەتەيىك, ساۋالناما 3 اي بويى جالعاسادى, وسى ۋاقىت ارالىعىندا قازاقستاندىق ادەبيەت تۋرالى كەڭ اۋقىمدى پىكىرلەر قالىپتاسادى. ساۋالناما ناتيجەلەرى 10 تامىزدا جاريالانادى, بۇل كۇنى اباي كۇنىن اتاپ وتۋمەن بىرگە, وقۋعا دەگەن قىزىعۋشىلىقتى ارتتىرۋعا جانە ۇلتتىق ادەبيەتتى دامىتۋعا جاڭا قادام بولادى.
بۇل جوبا ۇلتتىق قۇرىلتايدىڭ باستاماسىمەن جۇزەگە اسىرىلىپ وتىر.
ۇلتتىق كىتاپ كۇنى - تەك مەرەكەلىك كۇن عانا ەمەس, قوعامىمىزدىڭ دامۋىنا باعىتتالعان ماڭىزدى باعدار. الەمدەگى قىسقا مەرزىمدى ترەندتەرگە قاراماستان, وقۋ مادەنيەتىن دامىتۋدى ەرەكشە اتاپ كورسەتۋ - بولاشاققا ارنالعان ماڭىزدى قادام. ءبىلىمنىڭ كوزى عانا ەمەس, سونداي-اق قۇندىلىقتاردىڭ جولى بولعان كىتاپتار, ءبىزدىڭ بولاشاعىمىزدى نىعايتۋعا ىقپال ەتەدى.
بۇگىندە ۇلى ابايدىڭ «ارتىق ءبىلىم كىتاپتا, ەرىنبەي وقىپ كورۋگە» دەگەن سوزدەرى وتە وزەكتى. الەمدىك اقپاراتتىق تولقىندا شىنايى ماڭىزدى نارسەلەردى ۇمىتپاۋ ءۇشىن كىتاپ وقۋ قاجەت. كىتاپ كۇنى – بۇل بىزگە جانە بالالارىمىزعا كىتاپتىڭ تەك ءبىلىمنىڭ كوزى عانا ەمەس, سونىمەن قاتار قۇندىلىقتارىمىزدى كورسەتۋ قۇرالى ەكەندىگىن ەسكە سالاتىن مۇمكىندىك.