قازاقستاننىڭ دۇنيەجۇزىلىك يۋنەسكو كلۋبتارى مەن قاۋىمداستىقتارىنىڭ فەدەراتسياسىنا توراعالىق ەتۋى اياسىنداعى THE PLANET OF ART - 2025 اتتى حالىقارالىق جاستار فەستيۆالى باستالدى, دەپ حابارلايدى Egemen.kz.
جوبا تالانتتى جاستاردى قولداۋ جانە ولاردىڭ شىعارماشىلىق الەۋەتىن جۇزەگە اسىرۋعا كومەكتەسۋ, مادەني ءوزىن-ءوزى كورسەتۋدىڭ الۋان ءتۇرلى فورمالارىن تانىمال ەتۋ جانە «بەيبىتشىلىك مادەنيەتى» تۇجىرىمداماسى نەگىزىندە وسكەلەڭ ۇرپاقتىڭ دوستىق بايلانىستارىن نىعايتۋعا باعىتتالعان.
THE PLANET OF ART – 2025 فەستيۆالى بۇۇ باس اسسامبلەياسى 2024 جىلى قىركۇيەكتە قابىلداعان «بولاشاق ءۇشىن پاكتىنى» ىلگەرىلەتۋ, انتۋان دە سەنت-ەكزيۋپەريدىڭ 125 جىلدىعى, مايا پليسەتسكايانىڭ 100 جىلدىعى, اباي قۇنانباي ۇلىنىڭ 180 جىلدىعى, نۇرعيسا تىلەنديەۆتىڭ 100 جىلدىعى جانە باسقا دا الەمدىك مادەنيەتكە ەلەۋلى ءىز قالدىرعان كورنەكتى قايراتكەرلەردىڭ اتاۋلى كۇندەرىن اتاپ ءوتۋ اياسىندا جۇزەگە اسىرىلادى.
فەستيۆال جاس دارىندارعا ۆوكالدىق, اسپاپتىق جانە حورەوگرافيالىق باعىتتاردا وزدەرىن كورسەتۋگە مۇمكىندىك بەرەدى. جوبا وزدەرىنىڭ كوركەمدىك داعدىلارىن دامىتۋعا جانە شىعارماشىلىق ارقىلى بەيبىتشىلىك پەن كەلىسىم يدەيالارىن ىلگەرىلەتۋگە ۇمتىلاتىن يۋنەسكو كلۋبتارى مەن قاۋىمداستىقتارى بار, يۋنەسكو-عا مۇشە ەلدەردەن 12-18 جاس ارالىعىنداعى قاتىسۋشىلارعا باعىتتالعان.
THE PLANET OF ART - 2025 حالىقارالىق مادەني الماسۋ ءۇشىن تۇعىرناما قۇرا وتىرىپ, قازاقستاندىق كومپوزيتورلار مەن حورەوگرافتاردىڭ تۋىندىلارىن قازىرگى ينتەرپرەتاتسيالاۋدى تانىمال ەتۋگە ىقپال ەتەدى. فەستيۆال شىعارماشىل جاستاردى قولداپ قانا قويماي, قاتىسۋشىلارعا ءوز ەلىن الەم مادەنيەتىنىڭ جاس امباسسادورلارى رەتىندە حالىقارالىق ساحنادا تانىتۋعا بىرەگەي مۇمكىندىك بەرەدى.
ىرىكتەۋ قازاقستاندىق قاتىسۋشىلار ءۇشىن ونلاين تۋر جانە وفلاين تىڭداۋ ارقىلى ەكى كەزەڭدە وتەدى, ودان كەيىن ۇزدىك قاتىسۋشىلار قازاقستاندا وتەتىن فينالعا شاقىرىلادى. فينالعا قاتىسۋشىلار قازاقستان رەسپۋبليكاسىنىڭ جەتەكشى پەداگوگتارى مەن ونەر قايراتكەرلەرىنىڭ قولداۋىمەن ۇيىمداستىرىلعان ءبىلىم بەرۋ جانە مادەني باعدارلاماعا قاتىسا الادى.
فەستيۆالدىڭ سوڭعى ءبولىمى الماتى قالاسىندا وتەتىن جەڭىمپازداردى ماراپاتتاۋ راسىمىمەن بىرگە اۋقىمدى گالا-كونتسەرت بولماق. كونتسەرت الەمدىك مۋزىكالىق مادەنيەت پەن وتاندىق كومپوزيتورلاردىڭ شىعارماشىلىعىن ءبىرتۇتاس تەاترلاندىرىلعان باعدارلاما اياسىندا بىرىكتىرەدى.