ءماجىلىس دەپۋتاتى ەربولات ساۋرىقوۆ كيىك سانىن رەتتەۋ ماسەلەسىنە ارنالعان دوڭگەلەك ۇستەل وتىرىسى الدىندا جۋرناليستەرگە ءوز كوزقاراسىن ءبىلدىردى, دەپ حابارلايدى Egemen.kz.
«اۋىل» پارتياسىنىڭ مۇشەسى قازىرگى تاڭدا كيىك جايلاعان ايماقتارداعى شارۋالار تاراپىنان كوپتەگەن شاعىم ءتۇسىپ جاتقانىن جەتكىزدى. وسىعان بايلانىستى ول بۇل تۇيتكىلدى شەشۋدىڭ ءتيىمدى جولىن تابۋ قاجەتتىگىن اتاپ ءوتتى. الايدا, ونىڭ ويىنشا, بۇل جول ەش جاعدايدا كيىكتى اتۋ ارقىلى جۇزەگە اسپاۋى ءتيىس.
«جەكە پىكىرىم – كيىك سانىن اتۋ ارقىلى رەتتەۋگە قارسىمىن. وتكەن جىلى 235 مىڭ كيىكتى اتۋعا رۇقسات بەرىلگەن كەزدە, بۇل ماسەلە بويىنشا مينيسترمەن تىكەلەي سويلەستىم. قاڭتار ايىندا 85 مىڭ باستى اتۋ جوسپارلانعانىن, بۇل رۇقساتتىڭ 10 اقپانعا دەيىن جارامدى ەكەنىن ايتتى. وسىعان بايلانىستى مەن پرەمەر-مينيستر ولجاس بەكتەنوۆكە رەسمي حات جولداپ, بۇل ءۇردىستى توقتاتۋعا اتسالىسقان ەدىم. ويتكەنى بۋاز كەزىندە, ىشىندە 2-3 لاعى بار كيىكتەردى اتۋ وبال بولادى», دەيدى دەپۋتات.
ساۋرىقوۆتىڭ ايتۋىنشا, كيىك سانىن رەتتەۋدىڭ بالاما ءتاسىلى بار.
«بۇل ءۇشىن ارنايى وڭدەۋ تسەحتارىن اشىپ, بۇقتىرىلعان ەت ءوندىرىسىن ۇيىمداستىرۋ قاجەت. بىراق مۇنداي جاعدايدا كيىكتى اتىپ ەمەس, ارنايى تورلار ارقىلى ۇستاۋ نەمەسە قاماۋدا ءوسىرۋ ادىستەرىن قولدانعان ءجون. شەتەلدەردە جولبارىس, ارىستان سەكىلدى جىرتقىشتاردى اتىپ الماي-اق ۇستاپ جاتقانى سەكىلدى, كيىكتەرگە دە سونداي تاسىلدەردى قولدانۋعا بولادى دەپ سانايمىن», دەيدى دەپۋتات.