* 21 ماۋسىم – مەديتسينا قىزمەتكەرى كۇنى
دەنساۋلىق – ادام ءۇشىن اسىل بايلىق
ۇلت دەنساۋلىعى – ءبىزدىڭ تابىستى بولاشاعىمىزدىڭ نەگىزى
دەنساۋلىق ساقتاۋدىڭ ۇلتتىق جۇيەسىن ۇزاق مەرزىمدى جاڭعىرتۋ اياسىندا ءبىز ەلدىڭ بارلىق اۋماعىندا مەديتسينالىق قىزمەتتەر ساپاسىنىڭ بىرىڭعاي ستاندارتتارىن ەنگىزۋگە, سونداي-اق, مەديتسينا مەكەمەلەرىنىڭ ماتەريالدىق-تەحنيكالىق جابدىقتالۋىن بىرىڭعايلاندىرۋعا ءتيىسپىز. نەگىزگى باسىمدىقتار: *ساپالى جانە قولجەتىمدى مەديتسينالىق قىزمەتتەر كورسەتۋمەن قامتاماسىز ەتۋ. *اۋرۋلار ءتۇرىنىڭ بارىنشا كەڭ سپەكترىن دياگنوستيكالاۋ جانە ەمدەۋمەن قامتاماسىز ەتۋ.ن.نازارباەۆ
«قازاقستان-2050» ستراتەگياسىنان.
كوپ جاعداي ەمدەلۋشىنىڭ وزىنە تىكەلەي بايلانىستى
بۇگىندە جامبىل وبلىسى حالقىنىڭ دەنساۋلىعى ءۇشىن 42 اۋرۋحانا, سونىڭ ىشىندە 10 ورتالىق اۋداندىق اۋرۋحانا جانە 7 اۋىلدىق اۋرۋحانا, سونداي-اق, 377 امبۋلاتوريالىق ەمحانا قىزمەت كورسەتەدى. ارينە, دەنساۋلىق ساقتاۋ سالاسىنىڭ نەگىزگى باعىتتارىنىڭ ءبىرى – تۇرعىنداردىڭ ورتاشا ءومىر ءسۇرۋ جاسىن ۇلعايتۋ ەكەنى انىق. 2014 جىلى تۇرعىنداردىڭ ءومىر ءسۇرۋ ۇزاقتىعى ءوسىپ, 69,6-نى قۇرادى. – سوندىقتان بۇگىنگى كۇنى دەنساۋلىق ساقتاۋ سالاسىنداعى ەڭ باسىمدى باعىتتاردىڭ ءبىرى – انا مەن بالانىڭ دەنساۋلىعىن قورعاۋ بولىپ تابىلادى, – دەيدى جامبىل وبلىستىق دەنساۋلىق ساقتاۋ باسقارماسىنىڭ باسشىسى ەرلان ماساليموۆ. – 2015 جىلدىڭ 4 ايىندا انالار ءولىمىنىڭ كورسەتكىشى 47,5 پايىزعا تومەندەدى. قازىر وبلىس حالقىنا مەديتسينالىق كومەكتى 2751 دارىگەر جانە 9834 ورتا بۋىن قىزمەتكەرلەرى كورسەتۋدە. سونداي-اق, جىلدان-جىلعا جاس ماماندار سانى دا وسۋدە. وتكەن جىلى وبلىسقا 121 جاس مامان كەلسە, ونىڭ 73,6 پايىزى اۋىلدىق جەرلەرگە جۇمىسقا ورنالاستىرىلدى. – وڭىرلەردە مەديتسينا سالاسىنىڭ قۇرىلىستارى ءبىر ءسات تە ءباسەڭسىگەن ەمەس. وسى باعىتتاعى جۇمىستاردى ءبىر ناقتىلاي كەتسەك. – 2014 جىلى جەرگىلىكتى بيۋدجەتتەن قۇنى – 1 301,3 ملن. تەڭگەنى قۇرايتىن 25 نىساننىڭ قۇرىلىسى جۇرگىزىلدى. ونىڭ ىشىندە 7 ءدارىگەرلىك امبۋلاتوريا, 1 فەلدشەرلىك-اكۋشەرلىك پۋنكت جانە 17 مەديتسينالىق پۋنكت بار. ال بيىل جوبادان تىس رەسپۋبليكالىق بيۋدجەت ەسەبىنەن تاراز قالاسىنداعى 300 توسەكتىك قالالىق كوپسالالى اۋرۋحانا, 200 توسەكتىك وبلىستىق پەريناتالدىق ورتالىعى جانە تالاس اۋدانى قاراتاۋ قالاسىنداعى 250 كەلۋشىگە ارنالعان اۋداندىق ورتالىق ەمحانا قۇرىلىستارى جۇرگىزىلۋدە. العاشقى ەكى قۇرىلىس جۇمىستارى اعىمداعى جىلدىڭ ەكىنشى جارتىجىلدىعىندا اياقتالادى. سونداي-اق, جەرگىلىكتى بيۋدجەتتەن 707,3 ملن. تەڭگەگە بايزاق اۋدانىنداعى 60 توسەكتىك تۋبەركۋلەزگە قارسى اۋرۋحانا قۇرىلىسى جۇرگىزىلۋدە. بۇل قۇرىلىس تا وسى جىلدىڭ قازان ايىنا دەيىن اياقتالادى دەپ كۇتىلۋدە. جالپى العاندا, رەسپۋبليكالىق جانە جەرگىلىكتى بيۋدجەت ەسەبىنەن 2010-2014 جىلدارى ارالىعىندا 74 دەنساۋلىق ساقتاۋ نىسانىنىڭ قۇرىلىسى ىسكە اسىرىلدى. – قازىر ەلىمىزدە «ۇلتتىق سكرينينگتىك باعدارلاما» دەپ اتالاتىن جاڭا جۇيە جۇمىس جاساپ جاتىر. ءبىر سوزبەن ايتقاندا, سكرينينگ – بۇل بەلگىلى ءبىر جاستاعى دەنى ساۋ ادامداردى پروفيلاكتيكالىق مەديتسينالىق تەكسەرىلۋدەن وتكىزۋ... – ءيا, ويىڭىزدى ءتۇسىندىم. ءبىزدىڭ ەلدە تۇرعىندار تۇرعىلىقتى مەكەنجايلارى بويىنشا وزدەرى تىركەلگەن مەديتسينالىق ۇيىمداردا سكرينينگتىك تەكسەرىلۋدەن تەگىن وتكىزىلەدى. ماسەلەن, قازاقستاندا بۇگىندە قاتەرلى ىسىكپەن اۋىراتىن 145 مىڭعا جۋىق ادام تىركەلگەن جانە جىل سايىن بۇل كورسەتكىش شامامەن 3-4 پايىزعا ءوسىپ وتىرعانى جاسىرىن ەمەس. سكرينينگتىك تەكسەرىلۋدەن ءوتۋ ارقىلى ونكوسىرقاتتاردىڭ الدىن الۋعا بولادى. مامانداردىڭ ايتۋىنشا, قازاقستاندا جىل سايىن وكپە راگىمەن اۋىراتىن 350-گە جۋىق ادامعا وپەراتسيا جاسالادى ەكەن, ياعني ناۋقاسى باستاپقى ساتىدا انىقتالعان ادامداردىڭ 5 پايىزىنا عانا وتا جاسالعان. تۇرعىنداردىڭ ەل ەكونوميكاسىنىڭ وسۋىمەن قاتار, دەنساۋلىق ساقتاۋ جۇيەسىنىڭ نىعايۋىن, ال مەديتسينالىق قىزمەتتەردىڭ مەيلىنشە قولجەتىمدى ءارى ساپالى بولۋىن قالايتىنى انىق. بۇل رەتتە ءبىز دە قوعام بولىپ, مەملەكەت بولىپ وسى مىندەتتى شەشۋ باعىتىندا جۇمىس ءىستەۋگە ءتيىسپىز. ويتكەنى, حالىقتىڭ دەنساۋلىعى – ەلىمىزدىڭ باستى بايلىعى. ال, وسى بايلىقتىڭ جاقسارۋى, ەڭ الدىمەن, ءار ادامنىڭ وزىنە بايلانىستى. دەنساۋلىق ساقتاۋ سالاسىن, دارىگەرلەردىڭ بىلىكتىلىگىن قانشا كوتەرگەنىمىزبەن, حالىق دەنساۋلىعىنىڭ جاقسارۋى وسى نارسەگە كەپ تىرەلەدى. سوندىقتان كەز كەلگەن اۋرۋدىڭ الدىن الۋ, جۇيەلى تۇردە ءوز دەنساۋلىعىن تەكسەرتىپ تۇرۋ, سالاماتتى ءومىر ءسۇرۋ – بۇگىنگى ءاربىر ازاماتتىڭ ءومىر ءسۇرۋ قالىبىنا اينالۋى ءتيىس. اڭگىمەلەسكەن ورالحان ءداۋىت, «ەگەمەن قازاقستان». جامبىل وبلىسى.