كەڭشاردا ۇزاق جىل شوپان بولعان انام وتباسىنداعى ۇيەلمەلى-سۇيەلمەلى ون پەرزەنتى تۋرالى «جىل بويى ءتورت-بەس رەت كوشىپ-قونىپ جۇرسەك تە, كۇنى ۇزاعىنا وتار سوڭىندا بولساق تا, قۇدايعا شۇكىر, بىرەۋىڭنىڭ ساۋساقتارىڭنىڭ ۇشىن دا كۇيدىرمەگەن ەكەنبىز», دەپ تاۋبە ەتىپ وتىرادى. ءوزىمىز اۋرۋحانا ەسىگىن اتتاماساق تا, اۋدانداعى ءبىلىمدى, بىلىكتى دارىگەرلەر تۋرالى ءبىلىپ وستىك. وعان سەبەپ ەل اراسىنداعى ولار تۋرالى ايتىلاتىن جاعىمدى پىكىرلەر, ريزاشىلىق پەيىلدەر بولسا كەرەك.
جۋىردا قاتتى اۋىرعان ءبىر تانىستىڭ: «استاناعا باراسىڭ, دياگنوزدى سول جاق قويادى», دەگەن وبلىس دارىگەرلەرىنىڭ سوزىنە: «ەگەر ماعان وتا جاساۋ كەرەك بولسا, تەك قانا بەينەۋدەگى امىرحانعا جاساتام», دەپ جاۋاپ قاتقانى ەسىمە ءتۇستى. ءالى دياگنوزى ناقتى قويىلماي ۇرەي مەن ۋايىم قۇشاعىندا جۇرگەن ازاماتتىڭ ءۇمىتى مەن جۇبانىشىنا اينالۋىنا قاراپ, ءامىرحان اعايدى ءوزىم كورمەسەم دە, ۇزاق جىلدار بويى اۋدان تۇرعىندارىنىڭ ريزاشىلىعىن ارقالاپ جۇرگەندىگىن تاعى ءبىر رەت اڭعارىپ قالعانمىن.
قاناەۆ ءامىرحان ايتباي ۇلى 1954 جىلى قۇلسارى قالاسىندا قاراپايىم وتباسىندا دۇنيەگە كەلىپتى. ورتا مەكتەپتى 1970 جىلى ۇزدىك بىتىرگەن 16 جاسقا تولماعان اۋىل بالاسى سول جىلى الماتى مەملەكەتتىك مەديتسينا ينستيتۋتىنىڭ ەمدەۋ فاكۋلتەتىنە تۇسەدى دە, ونى 1976 جىلى ەمدەۋ ءىسى ماماندىعى بويىنشا ءبىتىرىپ شىقتى. ءبىر جىل ماڭعىستاۋ وبلىستىق اۋرۋحاناسىندا دارىگەر-حيرۋرگ بولىپ جۇمىس جاساپ, 1977 جىلى سارىقامىس ۋچاسكەلىك اۋرۋحاناسىنا جۇمىسقا اۋىستىرىلادى. ول كەزەڭ جوعارى ءبىلىمدى دارىگەرلەردىڭ اۋىلدىق وڭىرلەرگە جەتىسپەيتىن كەزى. ونىڭ ۇستىنە جاس تا بولسا بىلىكتىلىگىمەن كوزگە تۇسكەن جىگىت جەرگىلىكتى حالىقتىڭ قۇرمەتىنە بىردەن يە بولادى. كوپ ۇزاماي وبلىستىق دەنساۋلىق ساقتاۋ ءبولىمىنىڭ بۇيرىعىمەن 1981 جىلى جاڭادان قۇرىلىپ, جۇمىس ىستەي باستاعان بەينەۋ اۋداندىق اۋرۋحاناسىنىڭ حيرۋرگيا ءبولىمىنىڭ مەڭگەرۋشىلىك قىزمەتىنە اۋىستىرىلىپتى. ودان بەرگى 34 جىل بويى وسى جەردە اۋدان حالقىنا قىزمەت ەتىپ كەلەدى.ءوزىنىڭ ۇزاق جىلعى دارىگەرلىك مىندەتىن اتقارىپ كەلە جاتقان ازامات اۋداننىڭ دەنساۋلىق سالاسىن دامىتۋعا زور ۇلەسىن قوستى. ءبىلىمى مەن تاجىريبەسىن ۇشتاستىرىپ, وعان ادامي مىنەزدى قابىستىرا قىزمەت ەتكەن جاننىڭ بەدەل-باعاسى بيىك بولماق. ءا.قاناەۆ الدىنا كەلگەن ناۋقاستاردى جىلى قابىلداپ, ونى مازالاعان قانداي سىرقات, ەندى نە ىستەۋ كەرەكتىگىن ۇعىنىقتى تىلمەن ءتۇسىندىرىپ, ءتىپتى, ولاردىڭ كوڭىلىن كوتەرۋ ءۇشىن اراسىندا ازىلدەپ وتىراتىندىعىن ايتادى جۇرت. دارىگەر رەتىندە جىلدان-جىلعا دامىپ وتىرعان مەديتسينانىڭ سوڭعى جاڭالىقتارىن ءىس جۇزىندە پايدالانا وتىرىپ, اۋرۋحانا جانىنان جاڭا بولىمشەلەردى – ورتالىق زارارسىزداندىرۋ بولىمشەسى, قان قۇيۋ پۋنكتى, دياگنوستيكالىق ورتالىقتى اشۋعا تىكەلەي قاتىسىپ, ءوز جۇمىسىنا قوسىمشا اتقارىپ, جۇمىستارىن ۇيىمداستىرا ءبىلدى. ونىڭ تاجىريبەسىندە قىسىلتاياڭ كەزدە ادام جۇرەگىنە وتا جاساۋعا تۋرا كەلگەن كەزدەرى دە بولىپتى. تاجىريبەلى ماماننىڭ تولاسسىز ەڭبەگىنىڭ ولشەمىندە ءومىر قۋانىشىمەن قايتا قاۋىشقان تالاي ادامداردىڭ تاعدىرى تۇر, اسىرەسە, شالعاي اۋدان ورتالىعىنداعى كريتيكالىق جاعدايعا تۇسكەن جۇكتى انا مەن شارانا ءسابيدىڭ ءومىرىن قۇتقارۋداعى ەڭبەگى ەرەن. 1999 جىلى بەينەۋدە وتە قاۋىپتى جۇقپالى اۋرۋ – وبامەن اۋىرعان ناۋقاس تۇسكەندە بىردەن دياگنوزىن قويىپ, ءتيىستى شارالاردى بىلىكتىلىكپەن دەر كەزىندە پايدالانۋى ناۋقاستىڭ امان قالۋىن, اۋرۋدىڭ باسقا ادامدارعا تاراماۋىن قامتاماسىز ەتتى. كوپ جىل تالماي جۇمىس ىستەگەن بىلىكتى ماماننىڭ ەڭ باستى جەتىستىگى – بۇكىل ءبىر اۋدان حالقىنىڭ كوڭىلىنە تىرەك ەتكەن سەنىمدى دارىگەرىنە, ارقاسۇيەر ازاماتىنا اينالدى, ال مەملەكەت تاراپىنان دا ەڭبەگى ەلەۋسىز ەمەس. 2001 جىلى «قازاقستان رەسپۋبليكاسىنىڭ تاۋەلسىزدىگىنە 10 جىل» مەرەكەلىك مەدالىمەن, 2005 جىلى «شاپاعات» مەدالىمەن ماراپاتتالدى. وسى جىلى «قازاقستان رەسپۋبليكاسى دەنساۋلىق ساقتاۋ ءىسىنىڭ ۇزدىگى» بەلگىسىن ومىراۋىنا تاعىپ, ارادا توعىز جىل وتكەندە «وتاندىق دەنساۋلىق ساقتاۋ ءىسىن دامىتۋعا قوسقان ۇلكەن ۇلەسى ءۇشىن جانە كوپجىلدىق رياسىز ەڭبەگى ءۇشىن» ءوز ماماندىعى سالاسى بويىنشا ەڭ بيىك ماراپات – ن.ي.پيروگوۆ مەدالىن الدى.
اۋىرعان جانعا اق حالات كيگەن ءدارىگەردەن ىستىق ادام بولمايدى دەسەك, بەينەۋدەگى ءامىرحان ايتباي ۇلى مىڭداعان ادامنىڭ العىسىن الىپ, ولاردىڭ جۇرەكتەرىندە ومىرىنە اراشاشى رەتىندە سومدالعان ازامات. جارى ءمارزيا ەكەۋى 3 قىز, 1 ۇل تاربيەلەپ ءوسىردى. قىزدارى تۇرمىستا, ءبارى دە جوعارى ءبىلىم الىپ, وتانىمىزدىڭ حالىق شارۋاشىلىعىنىڭ ءارتۇرلى سالاسىندا جۇمىس جاسايدى, ال ۇلى بولسا جوعارى وقۋ ورنىن تامامداعاننان كەيىن جەكە كاسىپكەرلىكتى تاڭداپ, ءوز ماماندىعى بويىنشا ەلگە قىزمەت ەتۋدە.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.