بىلتىر ەلىمىزدە فارماتسەۆتيكا نارىعىنىڭ كولەمى 2,5 ملرد دوللاردان استى. سالانىڭ ءوسۋى ىشىنارا ەكسپورتتىق الەۋەت ەسەبىنەن قولداۋ تاپقان. الايدا وتاندىق ءوندىرىستىڭ ۇلەسى تومەن دەڭگەيدە (نەبارى 15%) قالىپ وتىر, دەپ حابارلايدى Egemen.kz.
الداعى بەسجىلدىقتا فارماتسەۆتيكالىق نارىقتاعى وتاندىق تاۋار ءوندىرىسىنىڭ ۇلەسىن 50%-عا دەيىن ۇلعايتۋ ماقساتى قويىلعان. وسى ماقساتقا قول جەتكىزۋ قادامدارى, وتاندىق وندىرۋشىگە, جەكە ينۆەستورعا تارتىمدى جاعدايلار جاساۋ مۇمكىندىگى «اتامەكەن» كاسىپكەرلەر پالاتاسى ۇيىمداستىرعان جيىندا تالقىلاندى.
ۇقپ تورالقاسىنىڭ فارماتسەۆتيكالىق, مەديتسينالىق ونەركاسىپ جانە مەديتسينالىق قىزمەتتەر كوميتەتىنىڭ توراعاسى نۇرجان وتارباەۆتىڭ ايتۋىنشا, بىلتىر ەلىمىزدە ينۆەستيتسيا كولەمىنىڭ ۇشتەن بىرگە قىسقارۋى دەنساۋلىق ساقتاۋ سالاسىنىڭ كورسەتكىشتەرىنە تەرىس اسەر ەتتى. سوڭعى كەزدەرى ءوسىمنىڭ نەگىزگى كوزى – مەملەكەت قاراجاتى بولىپ وتىر. بۇل مەديتسينا سەكتورىندا جەكە ينۆەستور ءرولىنىڭ تومەندەۋىن كورسەتەدى.
«ەلىمىزدە 2029 جىلعا دەيىنگى ينۆەستيتسيالىق ساياساتتىڭ تۇجىرىمداماسى بەكىتىلىپ, ونىڭ شەڭبەرىندە كەمىندە 150 ملرد دوللار تارتۋ جوسپارلانۋدا. شەتەلدىك ينۆەستيتسياعا قاتىستى پروبلەمالاردىڭ ۇلتتىق سيپاتتا ەكەنىن تۇسىنەمىز, سوندىقتان قىسقا مەرزىمدە وتاندىق ينۆەستورلارعا نازار اۋدارۋ كەرەك», دەدى سپيكەر.
ينۆەستيتسيالىق احۋالدى جاقسارتۋعا كەدەرگى كەلتىرەتىن فاكتورلار – بيۋدجەتتىك ساياساتتىڭ بەلگىسىزدىگى, كەلىسىمشارتتاردىڭ تۇراقسىزدىعى, قاجەتتىلىكتەردى جاناما بۇعاتتاۋ جانە سالالىق نورماتيۆتىك قۇقىقتىق اكتىلەردەگى وزگەرىستەردىڭ باياۋلىعى. سوڭعى جىلدارى شەكتى باعامەن دارىلىك زاتتاردى, مەديتسينالىق بۇيىمداردى ساتىپ الۋ تىزىمدەرىن بەكىتۋدىڭ كەشىكتىرىلۋىنە بايلانىستى قويمالاردا قوردىڭ ارتىلۋى جيىلەگەن.
«بىرىڭعاي ديستريبيۋتورمەن جاسالعان ۇزاق مەرزىمدى كەلىسىمشارتتارعا قاراماستان, مەن وتاندىق ءوندىرۋشى رەتىندە دەنساۋلىق ساقتاۋ مينيسترلىگىنىڭ تاپسىرىستارىن شەكتى باعامەن بەكىتۋدىڭ كەشىكتىرىلۋىنە نەمەسە بەلگىسىز سەبەپتەرمەن دەنساۋلىق ساقتاۋ مينيسترلىگىنىڭ تاپسىرىستارىنا زاتتاردىڭ ەنگىزىلمەۋىنە بايلانىستى ءوزىمنىڭ مەديتسينالىق ونىمدەرىمدى ساتا المايمىن», دەيدى «ZHULDYZ KENAN» جشس ديرەكتورى باعلان باققۇلوۆا.
مەديتسينالىق قۇرال-جابدىقتاردى وندىرۋشىلەر قاۋىمداستىعىنىڭ توراعاسى گۇلميرا مۇحامەدجانوۆا دەنساۋلىق ساقتاۋ مينيسترلىگى ۇسىنىپ وتىرعان مەديتسينالىق تەحنيكانى ساتىپ الۋ ادىستەرىن تولىعىمەن قايتا قاراۋ قاجەتتىگىن جەتكىزدى. ونىڭ ايتۋىنشا, بۇل نارىقتىڭ مونوپوليالانۋىنا جانە ساپاسىز مەديتسينالىق قۇرال-جابدىقتاردى جەتكىزۋ قاۋپىنە اكەلۋى مۇمكىن.
دەنساۋلىق ساقتاۋ ۆيتسە-مينيسترى ەرجان نۇرلىباەۆ باعامەن تاپسىرىستاردى بەكىتۋ جانە نارىققا شىعارىلاتىن ونىمدەردى رەينجينيرينگتەۋ مەرزىمدەرى باقىلاۋدا ەكەنىن ايتتى. قازىر مەديتسينالىق بۇيىمدار نومەنكلاتۋراسىنىڭ جوباسى ازىرلەنىپ جاتىر.
ماسەلەلەردى شەشۋ ءۇشىن بيزنەس بىرقاتار باستامالاردى: وتاندىق ينۆەستور مارتەبەسىن ەنگىزۋدى, مەملەكەتتىك-جەكەمەنشىك ارىپتەستىكتى قولداۋدى, ساتىپ الۋدى وڭتايلاندىرۋدى جانە فارماتسەۆتيكالىق جانە مەديتسينالىق ونىمدەر نارىعىنا شىعۋ تەتىكتەرىن جەڭىلدەتۋدى ۇسىنىپ وتىر. كوتەرىلگەن پروبلەمالاردى ەگجەي-تەگجەيلى زەردەلەۋ ءۇشىن ناقتى باعىتتار بويىنشا قوسىمشا كەڭەستەر وتكىزىلمەك.