ۇلتتىق ۇلاننىڭ 6505 اسكەري بولىمىندە ساربازدار ءۇشىن ەرەكشە كەزدەسۋلەردىڭ ءبىرى ءوتتى. بۇل جولى ۇلاندىق جاۋىنگەرلەر ازيا چەمپيونى, بوكستان حالىقارالىق دارەجەدەگى سپورت شەبەرى ايدا ابىكەەۆامەن جۇزدەسىپ, ونىڭ تابىستى جولىنان موتيۆاتسيا الدى, دەپ حابارلايدى Egemen.kz.
ءىس-شارانىڭ نەگىزگى ماقساتى — جاس ساربازداردى رۋحتاندىرۋ, سالاۋاتتى ءومىر سالتىن دارىپتەۋ جانە پاتريوتتىق سەزىمدى ارتتىرۋ. ايدا ابىكەەۆا اسكەري بولىمگە ارنايى كەلىپ, ءوزىنىڭ سپورتتاعى جولىن, جەڭىستەرگە جەتۋ جولىنداعى ەڭبەك پەن كۇش-جىگەرىن بولىسكەن.
ءوز سوزىندە چەمپيون جەڭىسكە جەتۋدە ءتارتىپ پەن قاجىرلى ەڭبەكتىڭ ايرىقشا ماڭىزىن اتاپ ءوتتى. ونىڭ ايتۋىنشا, سپورتتاعى جانە ومىردەگى ساتتىلىكتىڭ كىلتى — ءوز ىسىڭە ادال بولۋ, العا ماقسات قويىپ, سول جولدا تىنىمسىز ەڭبەكتەنۋ. سپورتشىنىڭ جىگەرلى ويلارى مەن ومىرلىك تاجىريبەسى ساربازدارعا ۇلكەن اسەر قالدىردى.
كەزدەسۋ ەركىن سۇحبات فورماتىندا وتكەن. جاس جاۋىنگەرلەر چەمپيونعا ەرەكشە قىزىعۋشىلىقپەن ءتۇرلى سۇراقتار قويىپ, ونىڭ كۇن ءتارتىبى, جاتتىعۋ رەجيمى, جارىستارعا دايىندىعى تۋرالى ماعلۇمات الدى. ايدا ءوز كەزەگىندە اسكەري قىزمەتتىڭ ماڭىزىن اتاپ ءوتىپ, ساربازدارعا ەل تىنىشتىعىن قورعاۋدا تابىس تىلەدى.
ءىس-شارا سوڭىندا اسكەري ءبولىم باسشىلىعى اتىنان ايدا ابىكەەۆاعا العىس حات پەن ەستەلىك سىيلىقتار تابىستالدى. مۇنداي كەزدەسۋلەر ساربازداردىڭ رۋحىن كوتەرىپ, بولاشاققا دەگەن سەنىمىن نىعايتاتىنى ءسوزسىز.