بۇل تۋرالى قالا اكىمى جەڭىس قاسىمبەك ينۆەستيتسيالىق شتاب وتىرىسىندا ايتتى, دەپ حابارلايدى Egemen.kz.
ونىڭ ايتۋىنشا, ەلوردانىڭ دامۋى ءۇشىن جەكە ينۆەستيتسيالاردى تارتۋ جۇمىستارى جالعاستىرىلادى.
«بۇل قالا ەكونوميكاسىنىڭ ورنىقتى دامۋىن قامتاماسىز ەتىپ قانا قويماي, تۇراقتى جۇمىس ورىندارىن اشۋعا مۇمكىندىك بەرەدى. مىسالى, 2024 جىلى قالا ەكونوميكاسىنا 2 ترلن تەڭگەگە جۋىق ينۆەستيتسيا تارتىلدى, بۇل 2023 جىلعى كورسەتكىشتەن ارتىق», دەپ جازدى جەڭىس قاسىمبەك.
سونىمەن قاتار ينۆەستيتسيالىق شتاب وتىرىسىندا ينۆەستورلاردىڭ بىرقاتار ۇسىنىستارى قارالدى. مىسالى, ولاردىڭ قاتارىندا مەتالل كونسترۋكتسيالارىن وندىرەتىن جانە تەمىرجول كولىگىنە سەرۆيستىك قىزمەت كورسەتەتىن زاۋىتتىڭ, جيھاز دايىندايتىن وندىرىستىك كەشەننىڭ, مەديتسينالىق قولعاپ شىعاراتىن زاۋىتتىڭ قۇرىلىسى بار.
«سونداي-اق, ا+ كلاستى كولىك-لوگيستيكالىق ورتالىعىن, 460 ورىندىق بالاباقشانى, تىڭايتقىشتار مەن پەستيتسيدتەر وندىرەتىن اگروحيميالىق كەشەندى جانە ت.ب. سالۋدى قامتيتىن جوبالاردى قاراستىردىق. جوعارىدا اتالعان جوبالار شامامەن 1500 جۇمىس ورنىن اشۋعا مۇمكىندىك بەرەدى. وڭىرلىك ينۆەستيتسيالىق شتاب وتىرىستارىن تۇراقتى نەگىزدە وتكىزەمىز. جاۋاپتى باسقارمالارعا ينۆەستورلارمەن تىعىز جۇمىس ىستەۋدى جانە ولارعا جان-جاقتى قولداۋ كورسەتۋدى تاپسىردىم», دەپ جازدى قالا اكىمى.