«قازگيدرومەت» سينوپتيكتەرى ەلوردا مەن كوكشەتاۋ قالاسىندا اۋا ساپاسىنىڭ ناشارلايتىنى تۋرالى رەسمي ەسكەرتۋ جاريالادى, دەپ حابارلايدى Egemen.kz.
بۇگىن, 3 مامىردا ەلوردادا تاڭەرتەڭنەن بەرى جەلسىز اۋا رايى ساقتالىپ تۇر. سونىڭ سالدارىنان قالا ءۇستىن قويۋ ءتۇتىن مەن جەڭىل تۇمان باسىپ, اتموسفەرانىڭ تومەنگى قاباتىندا زياندى زاتتاردىڭ جينالىپ قالۋى بايقالادى. سونداي-اق اۋادا پلاستيك جانعانعا ۇقساس وتكىر ءيىس سەزىلەدى.
مۇنداي قولايسىز مەتەورولوگيالىق جاعدايدا ماماندار تۇرعىندارعا كەلەسى ساقتىق شارالارىن ساقتاۋدى ۇسىنادى:
دالادا سەرۋەندەۋ ۋاقىتىن بارىنشا قىسقارتۋ; پاتەرلەر مەن كەڭسەلەردەگى تەرەزەلەردى اشپاۋ, جەلدەتۋدى تەك اۋا تازارعان كەزدە جۇرگىزۋ; وكپە, جۇرەك-قانتامىرلارى جانە اللەرگيالىق اۋرۋلارى بار ادامدارعا قاجەتتى ءدارى-دارمەكتەرىن وزىمەن بىرگە الىپ ءجۇرۋ.سينوپتيكتەردىڭ مالىمەتىنشە, ءدال وسىنداي جاعداي كوكشەتاۋ قالاسىندا دا قالىپتاسىپ وتىر. ماماندار جەلسىز اۋا رايى كەزىندە زياندى زاتتاردىڭ تارالۋى باياۋلايتىنىن, سوندىقتان ساقتىق شارالارىن ەلەۋسىز قالدىرماۋ كەرەكتىگىن ەسكەرتەدى.
ەسكە سالا كەتەيىك, بۇگىن سينوپتيكتەر ەل اۋماعىندا قولايسىز اۋا رايى بولاتىنىن ەسكەرتتى.