قر پرەمەر-ءمينيسترى ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا ءورت قاۋپى جوعارى كەزەڭگە دايىندىق ماسەلەسى قارالدى, دەپ حابارلايدى Egemen.kz.
پرەمەر-مينيستر اكىمدىكتەردىڭ نازارىن ءورت ءسوندىرۋ كەزىندە جەدەل ارەكەت ەتىپ, ءوزارا ءىس-قيمىل بويىنشا مەملەكەتتىك ورگانداردىڭ جاڭا ءىس-قيمىل الگوريتمىن ەنگىزۋ قاجەتتىگىنە اۋداردى.
سونىمەن قاتار ولجاس بەكتەنوۆ ءورت ءسوندىرۋ كەزىندە شۇعىل ارەكەت ەتىپ, ءتيىستى كۇشتەردى جۇمىلدىرۋ ءۇشىن جاڭادان مەملەكەتتىك ورگانداردىڭ ءىس-قيمىل الگوريتمى ازىرلەنگەنىن اتاپ ءوتتى.
«الايدا بيىل پاۆلودار جانە اباي وبلىستارىندا بولعان تابيعي ءورت بۇل الگوريتمنىڭ ورىندالماي وتىرعانىن كورسەتتى. مىسالى, اباي وبلىسىندا ورمان شارۋاشىلىعى مەكەمەلەرىنىڭ قىزمەتكەرلەرى ورتكە قارسى شۇعىل قيمىلداۋ بىلاي تۇرسىن, ءتىپتى توتەنشە جاعدايلار, ىشكى ىستەر جانە قورعانىس مينيسترلىكتەرىنە ءورتتىڭ شىققانى تۋرالى تەز ارادا حابار دا بەرمەگەن. پاۆلودار وبلىسىندا دا ءدال وسىنداي جاعداي ورىن الدى. ەكولوگيا, توتەنشە جاعدايلار جانە ىشكى ىستەر مينيسترلىكتەرىنە وسى ەكى وڭىردەگى ءورتتىڭ شىعۋ سەبەپتەرىن تەكسەرىپ, ءتيىستى شارالار قابىلداۋدى جانە كىنالىلەردى انىقتاپ, جاۋاپكەرشىلىككە تارتۋدى تاپسىرامىن», دەدى ۇكىمەت باسشىسى.