ەلىمىزدەگى ءىرى ۇيالى بايلانىس وپەراتورلارى – Altel مەن Tele2 برەندتەرىنە يەلىك ەتەتىن «موبايل تەلەكوم-سەرۆيس» (متس) كومپانياسى قاتاردىڭ Power International Holding (PIH) حولدينگىنە ساتىلدى. بۇل مامىلە تۋرالى اقپارات «قازاقتەلەكومنىڭ» 2024 جىلعى قارجىلىق ەسەبىندە جاريالاندى, دەپ حابارلايدى Egemen.kz.
مامىلە قۇنى – 1,1 ملرد دوللار. بۇل سوماعا كومپانيانىڭ بارلىق اكتيۆتەرىمەن قاتار, ونىڭ مىندەتتەمەلەرى دە كىرەدى. KASE سايتىندا جاريالانعان ەسەپتە «قازاقتەلەكوم» 2025 جىلعى قاڭتاردا متس-ءتىڭ 100% ۇلەسىن ساتقانىن راستايدى. مامىلە قۇنىنىڭ ءبىر بولىگى – شارتتى سىياقى رەتىندە بەلگىلەنگەن.
ساتۋعا شىعارىلعان اكتيۆتەردىڭ جالپى قۇنى – 577,3 ملرد تەڭگە. ونىڭ ىشىندە 167,4 ملرد تەڭگە – كومپانيانىڭ ءتۇرلى مىندەتتەمەلەرى نەسيەلەر, جالعا الۋ اقىسى, سالىقتار, سۋبسيديالار مەن بەرەشەكتەرى بار. بىلتىرعى جىلدىڭ قورىتىندىسىندا, «موبايل تەلەكوم-سەرۆيس» 161,2 ملرد تەڭگە تابىس تاپقان. بۇل – الدىڭعى جىلمەن سالىستىرعاندا 38,4% ارتىق. الايدا كومپانيانىڭ تازا تابىسى 22%-عا تومەندەپ, 53 ملرد تەڭگەنى قۇرادى.
قاتارلىق ينۆەستور كىم؟ Altel مەن Tele2 برەندتەرىنىڭ جاڭا يەسى – Power International Holding (PIH) – قاتارداعى ەڭ ءىرى جەكە حولدينگتەردىڭ ءبىرى. ونىڭ قۇرامىندا ەنەرگەتيكا, قۇرىلىس, ونەركاسىپ, تەلەكوممۋنيكاتسيا, اۋىل شارۋاشىلىعى, تاعام ءوندىرىسى, جىلجىمايتىن م ۇلىك جانە ءومىر سالتى سالالارى بار. 2024 جىلعى 4 ماۋسىمدا «قازاقتەلەكوم» PIH Interconnect Ltd كومپانياسىمەن كەلىسىمشارتقا قول قويدى. كەيىن, قاراشادا قۇجاتقا وزگەرىس ەنگىزىلىپ, ساتىپ الۋشى رەتىندە PIH Communication LLC كورسەتىلدى.