تازىلار تارتىسقا ءتۇستى

سايىسقا الماتى, شىعىس قازاقستان, اباي جانە جەتىسۋ وبلىستارىنان 70-تەن اسا ساياتشى, سونداي-اق كورشى قىرعىز ەلىنەن دە قۇماي تازى باپتاۋشىلار كەلدى. بۇل جارىس شىرعا تارتۋدان وبلىستاعى جازعى ماۋسىمنىڭ اشىلعانىن بىلدىرەدى.

ء«بىزدىڭ وبلىستا قۇماي تازى وسىرۋدە ىلە, تالعار جانە ەڭبەكشىقازاق اۋداندارى الدا كەلەدى. «اسىل مۇرا» وبلىستىق فەدەراتسياسى قۇرىلدى. بىلتىر دەمەۋشىلەردىڭ ارقاسىندا وسى تەكتەس 7 جارىس ۇيىمداستىردىق. بيىل مامىر جانە قازان ايلارىندا قاراوي اۋىلىندا رەسپۋبليكالىق سايىس وتكىزۋدى جوسپارلاپ وتىرمىز. ەگەر تاعى دا دەمەۋشىلەر تابىلىپ جاتسا, قوسىمشا تۋرنير وتكىزۋدى قولعا الامىز. بارعان سايىن جارىس اۋقىمى كەڭەيە تۇسۋدە. قىرعىزستاننان قاتىسۋشىلار كەلىپ جاتىر. بۇعان, ارينە, قۋاناسىڭ. ويتكەنى, مۇنداي باستامالاردىڭ قاي-قايسىسى دا ۇلتتىق مۇرامىزدى ساقتاۋعا قىزمەت ەتەدى», دەيدى «اسىل مۇرا» وبلىستىق تازى فەدەراتسياسىنىڭ پرەزيدەنتى ەرنار مۇپتەكەەۆ.

«Asyl qazyna» رەسپۋبليكالىق تازى فەدەراتسياسىنىڭ بەكىتىلگەن ەرەجەسىنە سايكەس, جارىستا قاشىقتىق 1000 مەتردى قۇرادى. تازىلار ەكى كەزەڭ بويىنشا سىنعا ءتۇستى. الدىمەن شاعىن توپتارعا ءبولىنىپ كىم مىقتىنى انىقتادى. بۇدان كەيىنگى باسەكە شاعىن توپتار جەڭىمپازدارى اراسىندا ءوتتى.

«بۇگىنگى كوڭىل-كۇيىمىز تاماشا. تازىمدى سايىسقا وسىمەن ءتورتىنشى رەت قاتىستىرىپ وتىرمىن. جارىس وتە تارتىستى ءوتتى. اباي ءوڭىرىنىڭ اسىل تۇقىمدى يتتەرىنە ەسە جىبەرىپ قالدىق. ەڭ باستىسى, بۇل جارىستان تازى باپتاۋدىڭ ءادىس-تاسىلدەرىنە قانىعىپ, ءبىراز تاجىريبە جيناقتادىق», دەيدى ساياتشى ەرمەك ساياقوۆ.

«ۇرعاشى قۇماي تازى» نوميناتسياسى بويىنشا 25 تازى باق سىنادى. ناتيجەسىندە اباي وبلىسىنان امان دۇكەنوۆتىڭ «جۇلدىز» اتتى تازىسى ءبىرىنشى ورىن الدى. جەتىسۋ وبلىسىنان قاتىسقان  مەرەي احمەتوۆتىڭ «قارشىعاسى» ەكىنشى ورىن يەلەندى. ال ءۇشىنشى جۇلدە ىلە اۋدانىنان نۇرعالي نۇرىشەۆتىڭ «الامان» اتتى تازىسىنا بۇيىردى.

60 تازى جارىسقا تۇسكەن «ەركەك قۇماي تازى» نوميناتسياسىندا ىلەلىك ايدىن قۇدايبەرگەنوۆتىڭ «سىلدى» تازىسى, جەتىسۋلىق تالاس مۇحتاربەكوۆتىڭ «كاراجولى» جانە بالقاش اۋدانىنان ەرلان شىبەكوۆ باپتاعان  «كوكداۋىل» اتتى تازىسى جۇلدەگەر اتاندى.