نيۋ-يورك قالاسىنىڭ كورىكتى جەرلەرىن ارالاۋ كەزىندە تىكۇشاق گۋدزون وزەنىنە قۇلاپ, ءبىر وتباسى مەن ۇشقىش قازا تاپقان, دەپ حابارلايدى Egemen.kz The New York Times باسىلىمىنا سىلتەمە جاساپ.
قۇتقارۋشىلار نيۋ-دجەرسي شتاتىنىڭ دجەرسي-سيتي ماڭىندا اپاتقا ۇشىراعان تىكۇشاقتىڭ بولىكتەرىن قالپىنا كەلتىرىپ جاتىر.
اپاتتان Siemens تەحنولوگيالىق كومپانياسىنىڭ يسپاندىق فيليالىنىڭ پرەزيدەنتى اگۋستين ەسكوبار مەن ونىڭ ايەلى جانە ءۇش بالاسى مەرت بولعانى حابارلاندى.
تىكۇشاقتى New York Helicopter اتتى جەرگىلىكتى تۋريستىك كومپانيا باسقارعان, ول تۋريستەرگە بىرنەشە ءجۇز دوللارعا نەبارى 15 مينۋت ىشىندە قالانىڭ كورىكتى جەرلەرىن – ورتالىق ساياباقتى, بوستاندىق ءمۇسىنىن جوعارىدان كورۋگە مۇمكىندىك بەرەدى.
اپاتقا بايلانىستى دجەرسي-سيتي قالاسىنىڭ توتەنشە جاعدايلار باسقارماسى تەرگەۋ جۇرگىزىپ جاتىر. كۋاگەرلەردىڭ ايتۋىنشا, اسپاندا قاتتى گۇرس ەتكەن دىبىس ەستىلگەن سوڭ تىكۇشاقتىڭ قۇلاپ بارا جاتقانىن كورگەن. قۇلاعان سىنىقتار جاقىن ماڭداعى قايىقتاردا بولعان ادامداردىڭ زارەسىن العان.
اقش پرەزيدەنتى دونالد ترامپ Truth Social جەلىسىندە تىكۇشاق اپاتىنان قازا بولعانداردىڭ وتباسىلارى مەن جاقىندارىنا كوڭىل ايتقان. ول ەلدىڭ كولىك ءمينيسترى شون داففي باستاعان ماماندار وقيعانى زەرتتەپ جاتقانىن جانە جاقىن ارادا رەسمي مالىمدەمە جاسالاتىنىن جەتكىزدى.