اقش پرەزيدەنتى دونالد ترامپ قىتايدان كەلەتىن تاۋارلارعا سالىناتىن كەدەندىك باج سالىعىن 125%-عا دەيىن ارتتىرعانىن مالىمدەدى. بۇل شەشىم قىتايدىڭ اقش ونىمدەرىنە سالاتىن ساۋدا سالىعىن 84%-عا دەيىن كوتەرگەنىنە جاۋاپ رەتىندە قابىلدانعان, دەپ حابارلايدى Egemen.kz.
اتالعان مالىمدەمە ترامپتىڭ جەكە TruthSocial الەۋمەتتىك جەلىسىندە جاريالاندى.
«قىتاي الەمدىك نارىق ەرەجەلەرىن ەلەمەيتىندىكتەن, مەن قىتايدان يمپورتتالاتىن ونىمدەرگە قاتىستى تاريفتەردى 125%-عا دەيىن ارتتىرۋ تۋرالى شەشىم قابىلدادىم. بۇل شەشىم دەرەۋ كۇشىنە ەنەدى», دەپ جازدى ترامپ.
ونىڭ ايتۋىنشا, قىتايعا «اقش پەن باسقا مەملەكەتتەردىڭ ەسەبىنەن پايدا كورۋگە بولمايتىنىن» تۇسىنەتىن ۋاقىت جەتتى.
بۇدان ءبىر كۇن بۇرىن ترامپ قىتايلىق تاۋارلارعا كەدەندىك الىمداردى 104%-عا دەيىن ۇلعايتقان بولاتىن. بۇعان جاۋاپ رەتىندە قىتاي بيلىگى اقش-تان اكەلىنەتىن ونىمدەرگە سالىناتىن سالىقتى 84%-عا دەيىن كوتەرگەن ەدى.
وسى جاعدايدان سوڭ بەيجىڭ دۇنيەجۇزىلىك ساۋدا ۇيىمىنا شاعىمدانۋعا شەشىم قابىلدادى.
بىرقاتار مەملەكەت اق ۇيمەن تاريف ماسەلەسىن كەلىسۋ جولدارىن ىزدەستىرىپ جاتسا, قىتاي اقش-قا قارسى شارالار قولدانىپ, جاۋاپ رەتىندە ءوز تاريفتەرىن ەنگىزىپ وتىر. بۇل ارەكەتتەر الەمدەگى ەڭ ءىرى ەكى ەكونوميكانىڭ اراسىنداعى ساۋدا قاقتىعىسىن ودان ءارى ۋشىعۋعا اكەلدى.