قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ استاناعا العاشقى رەسمي ساپارمەن كەلگەن سەررا-لەونە رەسپۋبليكاسىنىڭ سىرتقى ىستەر جانە حالىقارالىق ىنتىماقتاستىق ءمينيسترى تيموتي مۋسا كاببامەن كەزدەستى, دەپ حابارلايدى Egemen.kz.
سۇحبات بارىسىندا تاراپتار ساياسي, ەكونوميكالىق جانە مادەني-گۋمانيتارلىق سالالارداعى ىنتىماقتاستىقتى كەڭەيتۋ بويىنشا بىرقاتار ماڭىزدى ماسەلەلەردى تالقىلادى.
جۇزدەسۋدە مينيسترلەر شارتتىق-قۇقىقتىق بازانى جەتىلدىرۋ جانە ءتۇرلى دەڭگەيلەردە ساپارلارمەن الماسۋ تاجىريبەسىن دامىتۋ بويىنشا كۇش-جىگەر جۇمساۋعا دايىن ەكەنىن ءبىلدىردى.
«گەوگرافيالىق قاشىقتىققا قاراماستان ءبىز سەنىم مەن تەڭدىككە نەگىزدەلگەن قارىم-قاتىناس ورناتۋعا قىزىعۋشىلىق تانىتۋدامىز. ساۋدا, كولىك جانە لوگيستيكا, دەنساۋلىق ساقتاۋ, اۋىل شارۋاشىلىعى جانە باسقا دا ماڭىزدى سالالاردا جەمىستى ىنتىماقتاستىققا زور الەۋەت بار», دەدى م.نۇرتىلەۋ.
ەسكە سالساق, قازاقستان الەمدەگى ەڭ ءىرى ون استىق ءوندىرۋشى مەملەكەتتىڭ ءبىرى. كەزدەسۋدە ەلىمىزدىڭ ترانسكاسپي حالىقارالىق كولىك باعىتىن پايدالانىپ استىق, ءداندى جانە مايلى داقىلدار, جوعارى ساپالى ەت جانە ورگانيكالىق ونىمدەردى افريكا ەلدەرىنە جەتكىزۋگە مۇددەلى ەكەنى ايتىلدى.
سونداي-اق مينيسترلەر اقپاراتتىق تەحنولوگيالار جانە تسيفرلاندىرۋ سالاسىنداعى, ونىڭ ىشىندە ورتالىق ازياداعى ەڭ ءىرى IT ستارتاپ-پارك «Astana Hub» بازاسىن ءسوز ەتتى. بىلتىر وسى سالادا مەموراندۋمعا قول قويىلىپ, قازاقستان «KazAID» اگەنتتىگى ارقىلى سەررا-لەونەمەن e-Gov كومپونەنتتىك ەلەمەنتتەرىمەن بولىسكەن ەدى.
قازاقستان ءسىم باسشىسى ءوز ارىپتەسىنە الماتىدا ورتالىق ازيا مەن اۋعانستان ءۇشىن ورنىقتى دامۋ ماقساتتارى بويىنشا بۇۇ وڭىرلىك ورتالىعىن قۇرۋ تۋرالى بۇۇ باس اسسامبلەياسىنىڭ رەزوليۋتسياسىنا قولداۋ كورسەتكەنى جانە تەڭ اۆتورى بولعانى ءۇشىن العىسىن ءبىلدىردى. ول استانانىڭ تۇراقتى دامۋ سالاسىندا ءارى قاراي ىنتىماقتاستىققا جانە حالىقارالىق باستامالار شەڭبەرىندە بەلسەندى سەرىكتتەستىككە دايىن ەكەنىن اتاپ ءوتتى.
وسىلايشا تاراپتار حالىقارالىق كۇن تارتىبىندەگى وزەكتى ماسەلەلەر جونىنەن پىكىر الماسىپ, ءتۇرلى دەڭگەيلەردە كۇش-جىگەردى ۇيلەستىرۋدى جالعاستىرۋعا كەلىستى.
كەلىسسوزدەر قورىتىندىسىندا سىرتقى ساياسي ۆەدومستۆولاردىڭ باسشىلارى قازاقستان رەسپۋبليكاسىنىڭ سىرتقى ىستەر مينيسترلىگى مەن سەررا-لەونە رەسپۋبليكاسىنىڭ سىرتقى ىستەر جانە حالىقارالىق ىنتىماقتاستىق مينيسترلىگى اراسىنداعى ىنتىماقتاستىق جونىندەگى جول كارتاسىنا قول قويدى.