تاراز. 11 اقپان. جامبىل وبلىستىق ىشكى ىستەر دەپارتامەنتىنىڭ قىزمەتكەرلەرى بىرنەشە قىلمىسقا قاتىسى بار 22 جانە 23 جاستاعى تاراز قالاسىنىڭ جەرگىلىكتى تۇرعىندارىن قۇرىقتادى. بۇل تۋرالى جامبىل وبلىستىق ىشكى ىستەر دەپارتامەنتىنىڭ ءباسپاسوز قىزمەتى حابارلادى.
بيىلعى جىلدىڭ 27 قاڭتارىندا ساعات 04.30 شاماسىندا ل. مەن د. ەسىمدى كۇدىكتىلەر الدىن-الا ءسوز بايلاسىپ, وبلىس ورتالىعىنداعى قوناەۆ كوشەسىندە ورنالاسقان دارىحاناعا باسىپ كىرگەن. ءدارى-دارمەك ساتۋشىنى قارۋمەن قورقىتۋ ارقىلى كۇش قولدانىپ, كاسساداعى 50 مىڭنان اسا تەڭگەنى يەلەنبەكشى بولعان سەزىكتىلەر وقيعا ورنىندا ۇستالدى.
وقيعا ورىنا شۇعىل جەتكەن تاراز قالاسى 3-پب جەدەل-تەرگەۋ توبى ۇستالعان كۇدىكتىلەردەن ايعاق رەتىندە تاپانشا جانە اقشا الدى. قاراقشىلىق جاساعان قىلمىسكەرلەردىڭ ۇستىنەن قىلمىستىق ءىس قوزعالىپ, ولاردى تەرگەۋ يزولياتورىنا قامالدى.
سونداي-اق, تەرگەۋ بارىسىندا كۇدىكتى ل. جانە د. ەكەۋى 24 قاڭتاردا تۇنگى ساعات 03.00 شاماسىندا تاراز قالاسى, كوممۋنالنايا كوشەسىندە ورنالاسقان تۇنگى دۇكەنگە شابۋىل جاساپ, ساتۋشىعا كۇش قولدانىپ, دۇكەننىڭ كاسساسىنان اقشاسىن العانى دا اشكەرەلەندى. جوعارىدا اتالعان دەرەكتەر بويىنشا ۇستالعان كۇدىكتىلەر وزدەرىنىڭ جاساعان قىلمىستىق ارەكەتتەرىن مويىندادى.
قازىرگى تاڭدا قىلمىستىق كودەكستىڭ 191-بابى 2-بولىگىمەن قىلمىستىق ءىس قوزعالىپ, كۇدىكتىلەردىڭ باسقادا قىلمىسقا قاتىسى بار جوعى انىقتالۋدا جانە سوتقا دەيىن تەرگەپ تەكسەرۋ امالدارى جۇرگىزىلۋدە.
ورالحان ءداۋىت.
دەرەك: جامبىل وبلىستىق ىشكى ىستەر دەپارتامەنتىنىڭ ءباسپاسوز قىزمەتى.
سۋرەت: newskaz.kz.