كەشە رۋدنىي قالاسىنداعى «ەرەكشە ءبىلىم بەرۋ قاجەتتىلىگى بار وتباسىلاردى قولداۋ ورتالىعى» مەكەمەسىنەن رۇقساتسىز شىعىپ كەتكەن 15,17 جاستاعى ەكى ءجاسوسپىرىم بۇگىن امان-ەسەن تابىلدى, دەپ حابارلايدى Egemen.kz.
بالالاردى تۇنىمەن پوليتسيا قىزمەتكەرلەرى مەن ەكى بىردەي ەرىكتىلەر جاساعى, ۇزىن ىرعاسى 34 تەحنيكا, 100-گە جۋىق ادام ىزدەدى.
بۇگىن ەكى ءجاسوسپىرىمنىڭ رۋدنىيدان شىعىپ, قوستاناي اۋدانىنا قاراستى كونستانتينوۆ اۋىلىنا جاياۋ جەتكەنى بەلگىلى بولدى. وسى اۋىلدىڭ ماڭىنداعى ورمانعا تۇنەپ شىققان بالالار بۇگىن تاڭەرتەڭ كۇرە جولدىڭ بويىنا شىعىپ, جەرگىلىكتى ۆەتەريناريا قىزمەتىنىڭ اۆتوكولىگىنە وتىرعان.
«كولىك يەسى دەرەۋ ۋچاسكەلىك پوليتسەيلەر جاسۇلان ابىلعازى مەن ماحامبەت ەرۋباەۆقا حابارلاسقان. ولار كولىكتىڭ ماركاسى مەن ءنومىرىن جازىپ الىپ, ارىپتەستەرىنە حابار جىبەرەدى. پوليتسيا ينسپەكتورى نۇرسۇلتان ماحين بالالار مىنگەن «نيۆا» كولىگىن سادوۆىي مەن التىنسارين ەلدى مەكەندەرىنىڭ ماڭىندا توقتاتىپ, ەكى ءجاسوسپىرىمدى پوليتسيا بولىمىنە جەتكىزدى. بالالار ەشبىر زارداپ شەكپەگەن. قازىر ولارمەن يۋۆەنالدى پوليتسيا قىزمەتكەرلەرى سويلەسىپ جاتىر. جاقىن ارادا رۋدنىيعا قايتارىلادى», دەپ حابارلادى وبلىستىق پد-نىڭ ءباسپاسوز قىزمەتى.
جاسوسپىرىمدەردىڭ ءبىرى پوليتسيا قىزمەتكەرلەرىنە قوستانايدا تۇراتىن اناسىنا كەتىپ بارا جاتقانىن ايتقان.