سوڭعى ۋاقىتتا جاساندى ينتەللەكت تەحنولوگيالارىنىڭ دامۋىنا بايلانىستى الاياقتار ازاماتتاردى الداۋدىڭ جاڭا تاسىلدەرىن يگەرىپ جاتىر. ولار ەندى داۋىس كوشىرمەسىن جاساپ, جالعان ۆيدەولار قۇراستىرىپ, تانىس ادامداردىڭ بەينەسىن يميتاتسيالاپ, ءتىپتى نەيروجەلىلەر ارقىلى جەكە اككاۋنتتاردى بۇزىپ كىرە الادى, دەپ حابارلايدى Egemen.kz.
پوليتسەيلەر مەكتەپتەرگە, جوعارى وقۋ ورىندارىنا, ۇيىمدارعا جانە تۇرعىن ءۇي كەشەندەرىنە بارىپ, اقپاراتتىق پاراقشالار تاراتىپ, الاياقتاردىڭ قۇربانى بولماۋدىڭ جولدارىن تۇسىندىرۋدە.
«بۇرىن قىلمىسكەرلەر بانكتەر مەن پوليتسيا اتىنان حابارلاساتىن بولسا, قازىر ولار جاقىن تۋىستارىڭىزدىڭ داۋسىن كوشىرىپ, شۇعىل تۇردە اقشا اۋدارۋدى سۇراۋى مۇمكىن. سونىمەن قاتار جاساندى ينتەللەكت كومەگىمەن ءسىزدىڭ اتىڭىزدان جالعان ۆيدەو جاساپ, شانتاجبەن اينالىسادى. بۇل تەحنولوگيالار الاياقتىقتى شىنايى ەتىپ كورسەتەتىندىكتەن, اسا ساق بولۋ قاجەت», دەدى جامبىل وبلىسى پد كيبەرقىلمىسپەن كۇرەس باسقارماسىنىڭ باستىعى ءۋاليحان اعىباەۆ.
جاساندى ينتەللەكت ارقىلى جاسالاتىن الاياقتىقتىڭ قۇربانى بولماۋ ءۇشىن نە ىستەۋ كەرەك؟
جاقىندارىڭىزعا قايتا قوڭىراۋ شالىڭىز – ەگەر كومەك سۇراعان كۇماندى داۋىس حابارلاماسى كەلسە, ونىڭ راسىندا جاقىنىڭىز ەكەنىن انىقتاپ الىڭىز. الاياقتار داۋىستى ۇقساتىپ جاساپ الادى. اۋديو نەمەسە ۆيدەو حابارلامالار ارقىلى اقشا جىبەرمەڭىز – ول تانىسىڭىزدان كەلگەندەي كورىنۋى مۇمكىن. الدىمەن باسقا بايلانىس تاسىلىمەن ناقتىلاپ الىڭىز. مەسسەندجەرلەردەگى شۇعىل وتىنىشتەرگە سەنبەڭىز – اسىرەسە, جاعدايدىڭ شۇعىل ەكەنىن ايتىپ, سەندىرۋگە تىرىسقان ساتتە. الاياقتار اككاۋنتتاردى بۇزىپ, دوستارىڭىزدىڭ اتىنان حات جازا الادى. كۇدىكتى سىلتەمەلەر مەن فايلداردى اشپاڭىز – الاياقتار جي ارقىلى جالعان بانك سايتتارىن جاساپ, سول ارقىلى ءسىزدىڭ جەكە دەرەكتەرىڭىزدى الۋى مۇمكىن. اقپاراتتى تەكسەرىڭىز – ەگەر سىزگە كۇمان تۋدىراتىن ۆيدەو نەمەسە داۋىس حابارلاماسى كەلسە, ونى رەسمي دەرەككوزدەردەن تەكسەرۋگە تىرىسىڭىز. ەكى فاكتورلى اۋتەنتيفيكاتسيانى ورناتىڭىز – بۇل الەۋمەتتىك جەلىلەر مەن مەسسەندجەردەگى اككاۋنتتارىڭىزدى بۇزىلۋدان قورعايدى. «جەڭىل تابىس» تۋرالى ۇسىنىستاردان ساق بولىڭىز – الاياقتار جي ارقىلى اۆتوماتتاندىرىلعان حات-حابار تاراتىپ, ينۆەستيتسيالىق سحەمالار, ۇتىستار مەن قارجىلىق ايلا-شارعىلار ۇسىنۋى مۇمكىن. پوليتسيا جاساندى ينتەللەكت تەحنولوگيالارىن قولداناتىن الاياقتارعا تاپ بولساڭىز, دەرەۋ «102» نومىرىنە حابارلاسۋعا شاقىرادى.