اقتاۋ. 11 اقپان. اقتاۋ قالاسىن اباتتاندىرۋعا جەرگىلىكتى كاسىپكەرلەر اتسالىساتىن بولدى. بۇل تۋرالى egemen.kz ءتىلشىسى حابارلادى.
اقتاۋ قالاسىنىڭ اكىمى ە.جاڭبىرشين قالانى اباتتاندىرۋ باعىتىندا كاسىپكەرلەرمەن كەزدەسۋ وتكىزىپ, وبلىس ورتالىعىندا كاسىپكەرلىك ءىسىن جۇرگىزىپ, وزدەرىنە تيەسىلى نىساننىڭ اينالاسىن اباتتاندىرۋعا جەر تەلىمدەرىن الۋ ماسەلەسى زاڭ تالاپتارىنا ساي بەلگىلى ءبىر ۋاقىتتى جانە قارجىنى تالاپ ەتەتىندىگىن ايتتى. وسى ماسەلەنى جويۋ ءۇشىن اباتتاندىرىلۋى ءتيىس اۋماقتاردى كاسىپكەرلەرمەن مەموراندۋمعا قول قويۋ ارقىلى شەشۋ كەلىسىلگەنىن اتاپ ءوتتى.
– اباتتاندىرۋ جۇمىستارىن جۇرگىزۋ – قالامىز ءۇشىن وتە وزەكتى ماسەلەلەردىڭ ءبىرى. اقتاۋ – جاس, كورىكتى قالا. الايدا, ءتۇرلى قۇرىلىس-جوندەۋ جۇمىستارىنان كەيىن, كليماتتىق جاعدايلاردىڭ اسەرىنەن بىزدە بىرقاتار اباتتاندىرىلماعان اۋماقتار پايدا بولادى. اسىرەسە, قالانىڭ ەسكى بولىگىندە. وسى جىلى ءبىز قالانى اباتتاندىرۋدىڭ كونتسەپتسياسىن جاساقتادىق. بۇل باعىتتا ءبىر شاعىن اۋداندى تولىقتاي اباتتاندىرۋ (اۆتوتۇراق, كولىك جولدارىن كەڭeيتۋ, جاياۋ جۇرگىنشىلەر جولدارىن سالۋ تاعى س.س.) ءۇشىن ەسەبىمىز بويىنشا 470 ملن. تەڭگە جۇمسالادى. سوندىقتان اتالعان جۇمىستارعا ينۆەستورلاردى دا تارتۋدى كوزدەيمىز جانە كەزەڭ-كەزەڭىمەن جاساۋدى جوسپارلاپ وتىرمىز, – دەگەن ەدىل تەرەكباي ۇلى كاسىپكەرلەردىڭ الەۋمەتتىك جاۋاپكەرشىلىگى نەگىزىندە قالانى اباتتاندىرۋ جۇمىستارى قولعا الىنعانىن ايتتى.
كەزدەسۋ بارىسىندا اقتاۋ قالاسىنىڭ اكىمدىگى مەن كاسىپكەرلەر اراسىندا ەكىجاقتى مەموراندۋمدارعا قول قويىلدى.كەلىسىمگە قول قويعان كاسىپكەرلەر «Royal Cars Aktau» جشس, «ارىستان موتورس» جشس, «يرسيميز» جشس, «نەيرون» جشس جانە جەكە كاسىپكەرلەر د.فومين, ق.بيساليەۆ, ي.گۋرماناەۆالار قالانى اباتتاندىرۋعا باعىتتالعان ەكىجاقتى مەموراندۋمنىڭ الەۋمەتتىك-ەكونوميكالىق ماڭىزى زور ەكەندىگىنە, وبلىس ورتالىعىنىڭ ودان ءارى كوركەيۋىنە وڭ ىقپالىن تيگىزەتىنىنە سەنىم ءبىلدىردى.
گۇلايىم شىنتەمىرقىزى.
دەرەك, سۋرەت: egemen.kz.