قارۋلى كۇشتەر ارداگەرلەرىنىڭ باستاماسىمەن 1 كەڭساي مەن ورتالىق زيراتتا جەرلەنگەن ەكىنشى دۇنيەجۇزىلىك سوعىس باتىرلارى قابىرلەرىنىڭ باسىندا ءىس-شارا ۇيىمداستىرىلدى, دەپ حابارلايدى Egemen.kz.
وعان قالالىق قورعانىس ىستەرى جونىندەگى دەپارتامەنتتىڭ اسكەري قىزمەتشىلەرى, «قارۋلى كۇشتەردىڭ ارداگەرلەرى» رقب فيليالىنىڭ باسشىلىعى, ساعادات نۇرماعامبەتوۆ اتىنداعى قۇرلىق اسكەرلەرى اسكەري ينستيتۋتىنىڭ كۋرسانتتارى, پوليتەحنيكالىق ۋنيۆەرسيتەت پەن ازاماتتىق اۆياتسيا اكادەمياسى اسكەري كافەدراسىنىڭ ستۋدەنتتەرى قاتىستى.
قورعانىس مينيسترلىگىنىڭ ءباسپاسوز قىزمەتىنىڭ مالىمدەۋىنشە كەڭساي زيراتىندا ەكى مارتە كەڭەس وداعىنىڭ باتىرى اۆياتسيا گەنەرال-مايورى تالعات بيگەلدينوۆ, كەڭەس وداعىنىڭ باتىرى پولكوۆنيك باۋىرجان مومىش ۇلى, كەڭەس وداعىنىڭ باتىرى, حالىق قاھارمانى ارميا گەنەرالى ساعادات نۇرماعامبەتوۆ, حالىق قاھارماندارى راقىمجان قوشقارباەۆ جانە قاسىم قايسەنوۆ جەرلەنگەن. اكتسياعا قاتىسۋشىلار قابىرلەردىڭ اينالاسىن رەتكە كەلتىرىپ, پليتالار مەن ەسكەرتكىشتەردى تازارتتى.
ء«بىزدىڭ اكەلەرىمىز بەن اتالارىمىز جانقيارلىقپەن شايقاستى. ولاردىڭ ەرلىگىن ەستە ساقتايمىز. مايدانگەرلەردىڭ جاۋىنگەرلىك جانە ءومىر جولى بولاشاق وتان قورعاۋشىلار ءۇشىن ۇلگى. سوندىقتان جەڭىس كۇنى قارساڭىندا زيرات باسىنا كەلىپ, قاھارمانداردىڭ رۋحىنا تاعزىم ەتتىك», دەدى «قارۋلى كۇشتەردىڭ ارداگەرلەرى» رقب الماتى فيليالى توراعاسىنىڭ ورىنباسارى وتستاۆكاداعى پولكوۆنيك تولەگەن مۇستافين.
سول كۇنى الماتى قالاسىنىڭ ورتالىق زيراتىندا ازاماتتىق اۆياتسيا اكادەمياسى اسكەري كافەدراسىنىڭ ستۋدەنتتەرى اتى اڭىزعا اينالعان ۇشقىش كەڭەس وداعىنىڭ ەكى مارتە باتىرى اۆياتسيا گەنەرال-مايورى سەرگەي لۋگانسكيدىڭ قابىرىنە جينالدى. مۇنداعى ءىس-شارا اۋە قورعانىسى كۇشتەرى ارداگەرلەر كەڭەسىنىڭ توراعاسى, وتستاۆكاداعى پولكوۆنيك ۆالەري كۋزمەنكونىڭ باسشىلىعىمەن ءوتتى.
«جەڭىسكە 100 كۇن» اكتسياسى جالعاسىپ جاتىر. وعان قاتىسۋشىلار ءتۇرلى ءىس-شارالار وتكىزىپ, سوعىس ارداگەرلەرى مەن تىل ەڭبەككەرلەرىنە جاردەم كورسەتەدى.