الماتىدا زاڭ تالاپتارى ەسكەرىلمەي سالىنعان قۇرىلىس نىساندارىنا قاتىستى تالاپ بارىنشا كۇشەيتىلۋدە. قالا قۇرىلىسىن باقىلاۋ باسقارماسى گاگارين داڭعىلى, 284 مەكەنجايىنداعى زاڭسىز دەپ تانىلعان نىساندى بۇزۋ جۇمىستارى ءجۇرىپ جاتقانىن حابارلادى, دەپ جازادى Egemen.kz.
جاۋاپتىلاردىڭ ايتۋىنشا, بۇعان دەيىن نىسان يەسىنە (جەكە تۇلعا) قاتىستى اكىمشىلىك شارالار قولدانىلىپ, بۇزۋشىلىقتاردى جويۋ تۋرالى نۇسقاما بەرىلگەن. سونىمەن قاتار, نىساننىڭ ىرگەتاسىنا مەتالل قۇرىلىمدار ورناتۋ كەزەڭىندە قۇرىلىس جۇمىستارى توقتاتىلعان بولاتىن.
نۇسقاما مەرزىمى اياقتالعاننان كەيىن الماتى قالاسىنىڭ مامانداندىرىلعان اۋدانارالىق ەكونوميكالىق سوتىنا نىساندى بۇزۋ تۋرالى تالاپ ارىز بەرىلدى. 2024 جىلعى 22 اقپاندا سوت بۇل تالاپتى قاناعاتتاندىرعان. نىساندى بۇزۋ جۇمىستارى ادىلەت دەپارتامەنتى سوت ورىنداۋشىلارىنىڭ قاتىسۋىمەن باستالدى.
ەسكە سالا كەتەيىك, الماتى قالاسىنىڭ اكىمى ەربولات دوساەۆتىڭ قۇرىلىسقا باقىلاۋدى كۇشەيتۋ تۋرالى تاپسىرماسى اياسىندا 2023 جىلدىڭ باسىنان بەرى 71 زاڭسىز نىسان تولىقتاي نەمەسە جارتىلاي بۇزىلعان, ونىڭ ىشىندە «مەچتا», KHAN سەكىلدى ءىرى تۇرعىن ءۇي كەشەندەرى بار.