ازيانىڭ 4 دۇركىن چەمپيونى, 2024 جىل الەم بىرىنشىلىگىنىڭ التىن جۇلدەگەرى ءارى سول ءدۇبىرلى دودانىڭ ۇزدىگى اتانعان قازاقستاندىق دارىندى بوكسشى تورەحان سابىرحان كاسىپقوي رينگتە دەبيۋت جاسادى. 5 ءساۋىر ەلورداداعى «بارىس ارەنادا» وتكەن «Battle of the brave» تۋرنيرىندە تورەحان «بالۋانعا وڭى مەن سولى بىردەي» ەكەنىن دالەلدەپ, چەحيالىق قارسىلاسىنا قارسى تەحنيكالىق نوكاۋت تىركەدى. قازاقستاندا العاش رەت قوس بىردەي بەلبەۋ ساراپقا سالىنعان ءالىمحان ۇلى-نگامەسسينگە تاريحي كەشىندە تورەحان سابىرحان كاسىبي بوكستا وزىنە تيەسىلى تاريح پاراعىن اشتى, دەپ جازادى Egemen.kz.
جارتىلاي ورتا سالماقتاعى جەكپە-جەكتە وتانداسىمىزدىڭ قارسىلاسى چەحيالىق يرجي حاۋكە (4-6, 2 كو) بولدى. تورەحان كەزدەسۋدىڭ العاشقى مينۋتتارىنان- اق بەلسەندى سوققى جاساپ, 6 راۋندقا جوسپارلانعان كەزدەسۋ تاعدىرىن 3-راۋندتا شەشىپ تاستادى. شايقاستىڭ بۇل كەزەڭىندە وتانداسىمىز قارسىلاسىن 2 رەت نوكداۋنعا جىبەرىپ, سوڭعىسىندا چەحيالىق ورنىنان تۇرا الماي, جەڭىس تورەحان سابىرحاننىڭ ەنشىسىنە جازىلدى. وسى جارقىن جەڭىسىنەن كەيىن تورەحان سابىرحان بىزگە سۇحبات بەرىپ, الداعى جوسپارلارىمەن ءبولىستى.
- تورەحان, كەزدەسۋ الدىنداعى تاكتيكاڭىز قانداي ەدى؟ قارسىلاسىڭىزدىڭ قاۋقارىن قالاي باعالايسىز؟
- باستاپقى جوسپار بويىنشا 4-5- راۋندتاردا شوت اشىپ, 6 راۋندتا نۇكتەسىن قويۋدى جوسپارلاعانبىز. دەسە دە قارسىلاس ءۇشىنشى راۋندتا ىشتەن اۋىر سوققى وتكىزىپ الدى. نەگىزىندە يرجي حاۋكە كاسىبي بوكستاعى جولىن باستاپ كەتكەن قارسىلاس. باستاپقى تاڭداۋدا وسى قارسىلاسپەن جۇدىرىقتاسامىن دەپ شەشكەنمىن. باستىسى تارتىس ناتيجەسى ءبىز قالاعانىمىزداي بولدى.
- كاسىبي بوكستاعى قادامىڭىزدى ءساتتى باستادىڭىز, وسى جەكپە-جەكتەن كەيىن تۇبەگەيلى كاسىپقوي بوكسقا اۋىساسىز با؟ اۋەسقوي بوكستاعى جوسپارلارىڭىزبەن دە بولىسسەڭىز؟
- اۋەسقوي بوكستا ەرەسەكتەر اراسىندا مەن باعىندىرماعان ءبىرشاما بەلەس بار. ونىڭ ىشىندە الەم چەمپيوناتى مەن وليمپيادا شىڭى دا بار. سوندىقتان الداعى ۋاقىتتا وسى بيىكتەردى ەڭسەرگىم كەلەدى. ءومىرىن سپورتپەن ۇشتاستىرعان ءار ادامنىڭ ارمانى وليمپيادا التىنىن تاعىنۋ. مەن دە وسى جولدا تەر توگىپ, 2028 جىلعى لوس-اندجەلەس وليمپياداسىندا ءانۇرانىمىزدى اۋەلەتكىم كەلەدى. بارشاڭىزعا ءمالىم, كەيىنگى وليمپيادا ويىندارىندا بىلعارى قولعاپ شەبەرلەرى التىن ەنشىلەمەدى. وسى ولقىلىقتىڭ ورنىن تولتىرعىم كەلەدى. ودان كەيىنگى باعىتىمىز كاسىبي بوكسقا قاراي بۇرىلادى.
- تورەحان قازىر جاسىڭىز 19-دا. وسىنى ەسەپكە الا وتىرىپ, ەل تاريحىندا ەكى دۇركىن وليمپيادا چەمپيونى اتانۋدى كوزدەمەيسىز بە؟
- بۇل تۋرالى ناقتى شەشىم قابىلدامادىق. الداعى ۋاقىتتا ەكجەي-تەگجەي ويلانامىز. ەكىنشى جاعىنان قانشالىقتى ەرتە كاسىبي بوكسقا دەن قويسام, سونشالىقتى شەبەرلىگىمدى شىڭداپ, ماقساتتارىما جەتەمىن دەپ ويلايمىن.
- «Battle of the brave» تۋرنيرىندە اعاڭىز پاريج وليمپياداسىنىڭ قاتىسۋشىسى ماحمۇد سابىرحان دا باق سىنادى. ول شارشى الاڭدا بولعاندا قانداي ەموتسيالىق كۇيدە بولدىڭىز؟ قوبالجۋ بولدى ما؟
- اعامنىڭ قارسىلاسى جەكپە-جەككە تاياۋ قالعاندا اۋىسىپ كەتتى. ءبىز ونى سالماق ولشەۋ راسىمىندە ءبىر-اق بىلدىك. باستاپقىدا بەلگىلەنگەن قارسىلاسى كولۋمبيالىق ەدى. سول بوكسشىمەن جۇدىرىقتاسقاندا قوبالجۋىمىز مۇمكىن ەدى. ال ۆەتنامدىقتى 1 نەمەسە 2-راۋندتا تىزە بۇكتىرەتىنىن بولجاي بىلدىك.
- اڭگىمەڭىزگە راقمەت!
ايتا كەتەيىك, ماحمۇد سابىرحان كومانداسى بولجاعانداي ۆەتنامدىق دانگ داك حاينحتى ەكىنشى راۋنتدا نوكاۋتقا جىبەردى.