اقتوبە وڭىرىندە كەڭەس وداعىنىڭ باتىرى ءاليا مولداعۇلوۆانىڭ 90 جىلدىق مەرەيتويى اياسىندا كوپتەگەن مادەني-كوپشىلىك شارالار وتكىزىلۋدە. سونىڭ ءبىرى – عازيزا جۇبانوۆا اتىنداعى وبلىستىق فيلارمونيادا وتكىزىلگەن «جەرىم مەنىڭ» پاتريوتتىق اندەر بايقاۋى. بايقاۋدى قازىلار القاسىنىڭ توراعاسى, كومپوزيتور, كەڭەس دۇيسەكەەۆ اشىپ, ونەر دوداسىنا قاتىسۋشىلاردى قۇتتىقتادى. وبلىستا بيىل ەكىنشى رەت جانە العاش رەت حالىقارالىق دەڭگەيدە ۇيىمداستىرىلىپ وتىرعان كورنەكتى كومپوزيتور, اقتوبە ءوڭىرىنىڭ تۋماسى بەيبىت ورال ۇلىنىڭ اندەرىن ورىنداۋشىلاردىڭ بايقاۋىنا ساتتىلىك تىلەدى. بەيبىت ورال ۇلى تۋرالى جىلى لەبىز بىلدىرە كەلىپ, جاس ورىنداۋشىلارعا ونەردە ءوز بيىكتەرىن باعىندىرۋعا دەگەن ىزگى نيەتىن ءبىلدىردى.
بايقاۋعا ەلىمىزدىڭ بارلىق ايماعىنان جانە رەسەي, ازەربايجان, قىرعىزستاننان 17 جاس ورىنداۋشى قاتىستى. بايقاۋدىڭ شارتى بويىنشا ولار بەيبىت ورال ۇلىنىڭ ءبىر ءانىن جانە ءوز قالاۋى بويىنشا ءبىر ءان ورىندادى. بايقاۋعا قاتىسۋشىلاردىڭ ونەرىن قازىلار القاسىنىڭ توراعاسى, كومپوزيتور كەڭەس دۇيسەكەەۆ, مۇشەلەرى – كومپوزيتور بەيبىت ورال ۇلى, كومپوزيتور, ازەربايجان رەسپۋبليكاسىنىڭ ەڭبەك سىڭىرگەن ونەر قايراتكەرى ساردار فارادجەۆ, «دارىن» مەملەكەتتىك جاستار سىيلىعىنىڭ لاۋرەاتى, التىناي جوراباەۆا, كومپوزيتور, پروديۋسەر رەنات عايسين, «دارىن» مەملەكەتتىك جاستار سىيلىعىنىڭ لاۋرەاتى اسىلبەك ەڭسەپوۆ, ءانشى گاۋھار قاسپاقوۆا باعالادى.
بايقاۋ شىمىلدىعىن اقتوبەلىك ءسابيت بەگمان بەيبىت ورال ۇلىنىڭ «ماحابباتىم ومىردەگى مەنىڭ» انىمەن اشتى. ونەر سايىسىنا ۇكىلى ۇمىتپەن كەلگەن جاس انشىلەر كەزەگىمەن ساحنا تورىنە كوتەرىلدى. ناتيجەسىندە بايقاۋدىڭ گران-پري جۇلدەسىن قاراعاندى وبلىسىنان كەلگەن ءانشى ارايلىم جوكەنوۆا جەڭىپ الدى. ءبىرىنشى ورىندى باتىس قازاقستان وبلىسىنىڭ ءانشىسى ايىمبەك سارتىقوۆا يەلەندى. اقتوبەلىك نۇرجان ورازوۆ پەن ازەربايجان رەسپۋبليكاسىنىڭ جاس تالانتى فاحري كازيم-نيدجات ەكىنشى ورىنعا تابان تىرەدى. وڭتۇستىك قازاقستان وبلىسىنىڭ «سەمسەر» توبى مەن جاس ءانشى گۇلحان جۋاشباەۆعا, اقتوبەلىك لاۋرا تاۋساروۆاعا ءۇشىنشى ورىن بۇيىردى.
جاس انشىلەردىڭ شەبەرلىگىن شىڭداعان بايقاۋ قازاقستان كومپوزيتورلار وداعىنىڭ مۇشەسى بەيبىت ورال ۇلىنىڭ 60 جىلدىق مەرەيتويىنا ارنالعان «اۋىلىم – اق بەسىگىم» اتتى شىعارماشىلىق كەشكە ۇلاستى. كەش بارىسىندا مەرەيتوي يەسى اتىنا جىلى لەبىزدەر ايتىلىپ, سىي-سياپات جاسادى.
ساتىبالدى ءساۋىرباي,
«ەگەمەن قازاقستان».
اقتوبە.