تاياۋدا وسكەمەندە ءحىح حالىقتىق سپورت ويىندارىنىڭ اياسىندا كيىز ۇيلەر كورمەسى ءوتتى. شىعىس ءوڭىرىنىڭ 19 قالا مەن اۋدانى تىككەن اقشاڭقان كيىز ۇيلەر ەرتىستىڭ جاعاسىنا ەرتەدەگى قازاق اۋىلى كوشىپ كەلگەندەي كوزىمىزگە جىلى ۇشىرادى. ۇلتتىق ءداستۇر مەن مادەنيەتتى پاش ەتەتىن كيىز ۇيلەر قالاشىعى شاراعا قاتىسۋشى قوناقتارعا ۇلتتىق تاعامدار مەن سۋسىندارىن ۇسىنىپ, مەيماندوس كوڭىلىمەن كۇتىپ الدى. اتالعان شاراعا قاتىسقان وبلىس اكىمى دانيال احمەتوۆ كيىز ۇيلەردى ارالاپ كورىپ, ارقايسىسىنىڭ بەزەندىرىلۋ بارىسىنداعى وزىندىك ەرەكشەلىكتەرىن جوعارى باعالادى.
– بۇل حالىقتىق ويىندار بولعاندىقتان, ءبارى حالىق ءۇشىن جاسالىپ جاتىر. قازاقتىڭ عاجايىپ مۇراسىنا قىزىعۋشىلىق تانىتۋشىلار كوپ ەكەنىن بايقايمىز. كيىز ۇيلەردى كورگەن جاستار, قوناقتار ۇلتىمىزدىڭ سالت-داستۇرىمەن جاقىنىراق تانىسۋعا مۇمكىندىك الادى, – دەدى وبلىس باسشىسى.
قازىلار القاسىنىڭ توراعاسى بەكەن تەمىروۆ بارشا كيىز ءۇيدىڭ قوجايىندارى جوعارى دايىندىقپەن كەلگەنىن, كيىز ۇيلەردىڭ جابدىقتالۋى, بەزەندىرىلۋى, تابيعي ونىمدەردى پايدالانۋى ايرىقشا ەكەنىن اتاپ ءوتتى.
جارىسقا قاتىسۋشىلار كيىز ءۇيدىڭ ءىشى مەن سىرتىن كوركەمدەپ قانا قويماي, ۇلتتىق داستۇرلەردىڭ وزىق ۇلگىلەرىنەن كورىنىستەر دە دايارلاعان ەكەن. ونىڭ ىشىندە, كەلىن ءتۇسىرۋ, بالانى بەسىككە بولەۋ, تۇساۋ كەسۋ سىندى تال بەسىكتەن جەر بەسىككە دەيىنگى قازاقتىڭ سالت-داستۇرلەرى قامتىلدى. كيىز ءۇي يەلەرىنىڭ بەسىك جىرى مەن بەتاشار, جار-جار ورىنداۋى دا تاماشا اسەر قالدىردى.
قالا تۇرعىندارى مەن الىستان كەلگەن مەيماندار ءار كيىز ۇيدەن سابا ءپىسىپ, قىمىز دايىنداۋ, نان يلەپ, باۋىرساق ءپىسىرۋ, قۇرت قايناتۋ سىندى ۇلتتىق تاعامداردى دايىنداۋ ۇدەرىسىن كورىپ, قازاقتىڭ مول داستارقانىنان ءدام تاتتى.
دۋمان اناش,
«ەگەمەن قازاقستان».
وسكەمەن.