مەركى اۋدانىندا مەرينوس قويدىڭ جاڭا تۇقىمى پايدا بولدى. وسى اۋدانداعى مەركى اسىل تۇقىمدى قوي زاۋىتى ەتتى ءارى ءجۇنى دە ساپالى ت ۇلىكتىڭ بۇل ءتۇرىن ومىرگە اكەلۋ ءۇشىن جارتى عاسىرداي ۋاقىت تەر توگىپتى. جاقىندا عانا بۇل جاڭالىقتى راستاۋعا كەلگەن مەملەكەتتىك جانە شەتەلدىك كوميسسيا قوي تۇقىمىن ساراپتامادان وتكىزدى. سونىمەن, اسىل تۇقىمدى بيازى ءجۇندى قوي «قازاقستان مەرينوسى» دەگەن اتاۋ الدى.
– عالىمداردىڭ ارقاسىندا اسىل تۇقىمدى قوي شارۋاشىلىعىنداعى ماماندارمەن بىرلەسە وتىرىپ, ءبىز قويدىڭ اۆستراليانىڭ مەرينوسىنا پارا-پار كەلەتىن, ءجۇنىنىڭ ساپاسى جاعىنان ەشبىر قالىسپايتىن, ال بىراق جەرگىلىكتى جەرگە جاقسى بەيىمدەلگەن, ءوسىمتال, سالماعى ۇلكەن قويدىڭ جاڭا تۇقىمىن دۇنيەگە اكەلدىك دەپ ايتۋعا بولادى. اسىل تۇقىمدى «قازاقستان مەرينوسىنىڭ» بىرەۋى 14-15 كيلو ساپالى ءجۇن بەرەدى. ەتتى كەلەدى. سالماعى 120 كيلوعا بارادى. جازدا – جايلاۋعا, قىستا قۇمعا ايداۋعا دا بەيىم, – دەيدى قازاق قوي شارۋاشىلىعى عىلىمي-زەرتتەۋ ينستيتۋتىنىڭ ديرەكتورى سەرىك وسپانوۆ.
بۇل تۇقىمنىڭ بۇرىنعى ءوسىرىلىپ جۇرگەن «وڭتۇستىك قازاق مەرينوسىنان» ەرەكشەلىگى – ءجۇنىنىڭ ساپاسىندا. قازىر ساپالى بيازى, جىڭىشكە تالشىقتى ءجۇندى قويلارعا سۇرانىس وتە جوعارى. ءجۇننىڭ ۇزىندىعى, ءجۇننىڭ تىعىزدىعى وتە جوعارى. مەركى اۋدانىنداعى اسىل تۇقىمدى قوي زاۋىتى – ەلىمىزدەگى ىرگەلى شارۋاشىلىقتاردىڭ ءبىرى. قازىر مۇندا 26 مىڭنان استام قوي بار. شارۋاشىلىق ۇجىمى الداعى ۋاقىتتا تولدەردىڭ سانىن ارتتىرىپ, ودان ءارى جەتىلدىرۋدى قولعا الۋدا. بۇگىندە بۇل شارۋاشىلىقتا 300-دەن استام اۋىل تۇرعىنى ەڭبەك ەتەدى. ولاردىڭ ءوسىرىپ وتىرعان قويلارى ەندى ەلىمىزدىڭ وزگە ايماقتارىندا دا ورىستەمەك. قازىردىڭ وزىندە كوپتەگەن شارۋالار اسىل تۇقىمدى قويلاردى الۋعا نيەت ءبىلدىرىپ وتىر.
ورالحان ءداۋىت,
«ەگەمەن قازاقستان».
جامبىل وبلىسى.